Sfuei Mensîl Furlan Indipendent
Archivi de Patrie

CULTURE – IL FRIÛL TAL ETERE. Mondanitât furlane

............

Lis gnocis dal an, tignudis ai 12 di Lui, te glesie di Sante Margherita dal Gruagn, a àn puartat in Friûl une des cubiis plui «paparazadis» di Los Angeles. Jê, la campionesse dal tenis Maria Sharapova, e lui, zuiador tai «Lakers», Sasha Vujacic, a àn passât 4 dîs a Udin, in ocasion dal matrimoni de nestre «star» televisive Marina Presello, ex Telefriuli, vuê in fuarcis a «Free». La gnove e burì fûr, daspò di une prime pagjine dal Messaggero. Cussì, la cubie e je stade inseguide cence pâs ancje chi di nô.
Si che duncje in cheste rubriche là chi di solit o fevelìn di television, chest viaç si dedichin al peteç. Sicome che la Presello e tignì blindât ogni detai, dut ce che o riferìs, lu ai «estuart» a cualchidun dai 120, fortunâts, invidâts. Tra chescj, degns di note e di colôr a figuravin: dut il staff di Free, comprendût il diretôr di rêt, Lorenzo Petiziol, e l’editôr – rivât in moto – Thomas Panto. La amie de nuvice e compagne dal esordi, vuê in fuarcis a SkySport24, Giorgia Bortolossi. L’ex zuiadôr dal Udin, vuê cu la Fiorentine, Felipe.
Vujacic – ex Snaidero come il nuviç e so testimoni- e Sharapova a àn durmît tal cjistiel di Vilalte. La cubie però no jere di bessole. La biondissime e veve daûr pari, mari e alenadôr privât: ogni dì, par jê, des 5 aes 7 oris di rachetis e «grande slam», prime intun Tenis club dal Friûl di mieç, po intun plui modest cjamput di peton dongje di cjase de nuvice. Tal cjistiel, la biondissime di 25 milions di verdons (dolars) ogni an, e confidà di vê sintût la fantasime, ma che dute la trasfierte e je stade «Great!».
Vistît colôr di grîs, cun pizzo neri, cualchi decoltè cun tac vot e pochette color arint, in pandanne cu lis scarpis: impussibil no viodile. E balà simpri tichignade cul so Sasha, a un ciert pont e molà lis scarpis tal mieç dal prât par zuiâ di balon sul vert dal curtîl interni dal cjistiel.
La cubie e aprezà cetant il gustâ: soredut i «blecs», cun tocj di masurin e po i confets cun 7 guscj di sielte – dal cafè al cacao, fintremai a chel di angurie e miluç – e che i invidâts si siervirin a buffet, daspò il secont. La sabide prime, intun locâl di Rodean dal Bas, Maria – che la riviste «Forbes», dal 2005 al 2009, e inserì jenfri lis celebritâts plui potentis dal mont – e cerçâ ancje il frico. Domandant «bis», tra flums di champagne.
Duncje, par dute rispueste ae straçarie di bêçs par Ciccio Depardieu e il so «fricò-fricò-fricò», la miôr publicitât nus e à fate indiretementri Maria Sherapova. E par di plui a gratis.
JAN TOTI

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +