CULTURE – E-MARILENGHE. Un spot sul “smartphone”

LCui che al à un smartphone (i telefonuts di ultime gjenerazion che a permetin ancje di navigâ su Internet, ndr) forsit al à za viodude la ultime novitât in cont di promozion de nestre riviste.
In colaborazion cu la TradinvestTV (www.tradinvest.tv), webtv nassude a Londre tal 2006, te prime metât di Setembar o vin inviade la prime campagne publicitarie di cheste fate par une riviste periodiche in lenghe furlane.
Si è tratât di un prin spot cun protagonist il nestri diretôr, che al presente il nestri gjornâl. La TradinvestTV e dopre une tecnologjie che e permet di vê une fuarte compression dal formât video (gp3) fasintlu deventâ plui lizêr di trasmeti, ma cence pierdi la cualitât de imagjin.
I video messaçs a son curts (massim 30 seconts) e a rivin sui smartphone sotforme di un sempliç sms compagnât di un link (chest al diseve: «Mandi, cjale chest link e se tu puedis mandilu ai tiei amîs, grazie: www.tradinvest.tv/mobile/valcic.3gp»), rimandant propit al video, che in 5 dîs al è stât visualizât plui di 500 voltis. «La prime difusion no je lade mâl» e comente la TradinvestTV «Si à ancje di tignî cont che in Friûl no ducj a àn inmò un smartphone, ma la tindince dai prossims mês e fâs imagjinâ une cressite dal ûs di chescj imprescj, simpri di plui».
Cheste esperience, prime in regjon ma no dome, e nas dal incuintri cuntun furlan emigrât di passe 20 agns a Londre «Cu la Patrie dal Friûl si sin cjatâts subit in sintonie» al declare Marco Macorigh aministradôr di TradinvestTV «Intun mont globalizât, dulà che Internet al è il spieli plui imediât di chest procès, nus somee strategjic pontâ ancje su la lenghe furlane, parcè che par dîle cun Robert Jhonson, life training ancje di Bill Gates, al è necessari »distinguisi par no estinguisi»».
E nol restarâ un câs isolât «Te comunicazion al devente fondamentâl dâ une fuarte identificazion al messaç» al continue Macorigh «par chest o ai vin decidût di mostrâ cheste campagne ancje in Scozie, in Gales e in Irlande».
Cui che al volès ricevi i sms e mantignîsi cussì informât al pues mandâ il so numar di telefonin a
info@lapatriedalfriul.org.
Christian Romanini