E rive la Vierte, e cul bon timp e ven voie di lâ a fâ une cjaminade tai cjamps, magari a cjapâ sù tale, sclopit o urtiçons, par chei fortunâts che a àn vût cui che ur à insegnât.
Lis jerbis salvadiis, di cualchi an in ca, a son tornadis “di mode” in cusine, in omaç ae tradizion e ae riscuvierte de naturalitât.
Tancj, però, a pensin a lis jerbis dome tant che a “alc di vert”, dismenteant che une volte – cuant che si scugnive rangjâsi cun ce che si cjatave – nol jere masse strani meti tal plat ancje lis rosis.
In dì di vuê, dut câs, “mangjâ rosis” al pues semeâ une ricercjatece di “nouvelle cousine”, une origjinalitât strane e esotiche. Ma a cjalâ ben, la cusine tradizionâl (ancje furlane) e à simpri considerât lis rosis tant che une opzion valide in assolût.
Al baste pensâ aes fritulis di flôrs di saût pastelâts (ancjemò popolârs in Cjargne, presentadis ancje tes fiestis di paîs). O i butui de tale, cjapâts sù prime di deventâ rosis zalis, metûts tai vasuts sot vueli. O ancje lis violis di cjamp o la aghe di rose, dopradis pai dolçs, par guarnizion o par dâ arome.
Insome, cuissà mai che la Vierte no puedi dânus une vintade di colôr e di profum ancje tal plat: un tic di fantasie e di ligrie par saludâ il bon timp, e ancje par tornâ a scuvierzi ce tant di biel (e di bon) che nus regale la nature.
________________________________________
Rosis: cualis, cemût, dulà…
Pestelac (zâl), Malve (colôr lile), Purcite o Madalene (colôr narant): buinis par “piturâ” un plat, zuiant magari sui colôrs cui classics ingredients dal Lunis di Pasche (tale o cicorie, lidric, ûfs, salam, fertaie…)
Violis di cjamp: come i pestelacs, ma ancje di passâ (un pêl umidis, o bagnadis cul blanc dal ûf) tal zucar a vêl, par dâur l’efiet “glace” e vê une guarnizion pai dolç profumade, colorade e di sigûr gjenuine.
Margaritutis di cjamp: a mertin provadis te fertaie, o ancje intune viludade: une cevole blancje piçule di fa flapî intun got di vueli, po dopo un pâr di cartufulis a fetutis di lassâ disfâ te padiele. Dopo un moment, si bute un biel pugn di margaritutis, si zonte aghe “q.b” (“tant che e baste”), si regole di sâl e di pevar blanc e si lasse lâ il timp di fâ “strenzi”. Prime di servî, si passe dut tal mixer e si guarnìs con cualchi altre margaritute interie.
Agace e Saût: la ricete plui classiche e dîs di passâ i raps intune pastele fate cun lat, ûf, farine, pôc levan e un tic di sâl (no masse licuide). Dopo si frît tal vueli lizêr o – pai tradizionaliscj – tal saìn; une volte sgotadis ben ben, passâ lis fritulis tal zucar.
Racomandazions:
• Une vore impuartant: mai inventâsi botanics! No dutis lis rosis si mangjin, e – come par dutis lis jerbis salvadiis – tal dubi, miôr lassâlis li che a son. Lilie (mughet), anemul, ciclamin (tant par nomenâ lis plui cognossudis) a son velenosis, tocje simpri stâ un grum atents.
• Lis rosis a son delicadis: cjapâlis sù lontan di stradis incuinadis, tratâlis cun grande delicatece, resentâlis te aghe frede e suiâlis cence strucâ.
• Regule fondamentâl par “lâ a jerbis”: va ben tirâ dongje la cene, ma simpri tal rispiet dal ambient. Par cerçâ cualchi savôr gnûf, nol covente devastâ un prât…
________________________________________________________
Giusy Foschia: “Un gnûf ingredient? I coriandui di nature…”
Une tradizion un pêl dismenteade e l’amôr pe nature che a deventin gnûf snait par une idee imprenditoriâl inovative: cussì si podarès contâ in curt la aventure di Giusy Foschia, une frute entusiaste che a Sedilis (Tarcint) e à pensât di inventâsi un Zardin Comestibil. Un ort botanic (che in cheste stagjon si inaugure propit ai prossims 21 di Març) dulà coltivâ e secjâ i odôrs e lis jerbucis par fâ tisanis, ma cun ancje la particolaritât di rosis, frescjis o secjadis, di podê doprâ tal plat. Par esempli, flôrs di purcite (calendula) o di malve di zontâ te salate, par dâi colôr e savôr. Ma ancje altris ideis fantasiosis. Une su dutis: vasuts di pics colorâts secjâts, di doprâ come che a fossin coriandui, par colorâ lis pitancis. E cuissà mai che il plui banâl plat di cicorie e ûfs dûrs a nol puedi presentâsi tant che une specialitât “di gourmet”…
Info: www.ilgiardinocommestibile.com
Margherita Timeus
Sindic jo mame / “La nestre int no à mai molât. Covente fâ, no lamentâsi, par saltâ fûr dal pantan”
Walter Tomada
Alessandro Marangoni: la Aclif e deventarà istituzion di riferiment pai furlans “La Assemblee dai sindics furlans e je une realtât necessarie. E cul timp e deventarà ancjemò di plui un pont di riferiment pe identitât de nestre int”. Al è sigûr di chest Alessandro Marangoni, prin citadin di Dartigne, che al crôt tant inte Aclif […] lei di plui +
(L)Int Autonomiste / Autodeterminazion e dirits pai popui, uniche strade di pâs
Dree Valcic
✽✽ No podìn sigûr fâ fente che la vuere in Ucraine no dedi une serie di problemis intrigôs ancje aes fuarcis che si riclamin ae autodeterminazion dai popui e al ricognossiment dai dirits des minorancis etnichis. Prin di dut, ce che al è daûr a sucedi al è la ultime dimostrazion che chei problemis no […] lei di plui +
L'editoriâl / Macroregjons, une oportunitât di racuei
Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +
Ricorence / Pier Pauli Pasolini om contraditori e segnâl di contradizion
Pre Toni Beline
Tal centenari de muart di Pier Pauli Pasolini o ripuartìn a tocs la tierce part dal libri scrit di Antoni Beline tal 1993 ‘Trilogjie tormentade’, che e rivuarde propit il poete di Cjasarse I. RISPIETÂ IL MISTERI DAL OMLa sience plui dificile e je la cognossince di se stes. E se al è grivi cognossi […] lei di plui +
Int di Cjargne / La sporte de spese a km zero a ‘La Polse’ di Chiara e Matteo
Marta Vezzi
Di cualchi dì al è stât screât un gnûf servizi intal spaç e ristorant di Chiara e Matteo “La Polse di Cougnes” a Zui, indulà che si pues cumò cjatâ e comprâ prodots locâi. “La idee e je nassude pal fat che za nô intal ristorant o doprìn avonde materiis primis dal teritori – e […] lei di plui +
Il numar in edicule / Jugn 2022
Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +