CULTURE – Basse pression cui Luna e un Quarto

Baretis fracadis sul cjâf – une copule, un panama o un cjapiel etiope – maiutis coloradis e musis sveltis. I Luna e un Quarto, i siet zovins di Muçane vincidôrs dal Premi Friûl 2010, a vivin il palc come che a vivin la musiche: cun gust. Ancje cumò che a son deventâts “grancj” cul prin disc publicât cu la etichete Musiche Furlane Fuarte. “Basse pression” al partìs apont de Basse “che  o respirìn ducj i dîs” par finî in Afriche e in viaçs lontans “cuntun voli sul mont”, parcè che la Basse “nus caraterize ma tal stes timp nus strenç”, a contin. Simpri cuntun voli concret viers la vite di vuê, a cjantin ancje par esempli di smeti di cori e di polsâ intune simboliche “amache” o di no fâsi imbambinî de television. Impegnâts fûr de sene te comunitât locâl: un di lôr in particolâr, il mitic “Balute”, al è conseîr comunâl a Muçane par une liste civiche – etât medie 23 agns – e stait sigûrs che ancje li si fasin sintî. La gjenuinitât di cheste formazion cence masse regulis ni struture, e je la sô fuarce: sù e jù pal Friûl ju clamin a sunâ dal vîf dulà che a fasin “il disastri” e dulà che ju spietin jù dal palc pal “tierç timp”. Timp fa, ju vevin invidâts a un concors di chei un pôc impicotîts, di chei dulà che tai camarins si fevele a basse vôs; si son cjalâts ator, a àn spietât cualchi minût e po dopo si son metûts a sunâ daûr des cuintis intune jam session improvisade, come par dî: sù mo fantats, relax!
Natascia Gargano