CULTURE. [ART-Â] Art che e nas de nature e e torne ae nature

Pieris coloradis che a zuin cu la aghe, animâi di fantasie tiessûts cun ramaçs e fîi di jerbe, gjeometriis di stecs che si incrosin disegnant figuris astratis. E je art in nature chê che lis “Feminis dal bosc” a presentin a For Disore e a Aplis dilunc dal flum Degan, spostantsi dal percors de vecje ferovie, simpri in comun di Davâr, dulà che a lavorin, cun periodicitât, dal 2003. Lis creazions di chestis artistis si puedin viodi ancje a Ruvigne, in val Pesarine, a Colorêt di Sofumberc… Par vê une idee dai tancj lûcs dulà che a àn lassât i lôr segns, baste dâ un cuc al sît: www.donnedelbosco.it
Al è nassût di une idee di Maria Luigia Valtingojer, artiste, insegnante e scritore furlane muarte l’an passât, il progjet di feminis, furlanis o leadis al Friûl, che a lavorin tal viert, cirint une integrazion cu la nature, vierzint il cûr ae relazion cun cheste e a un leam plui profont cul se. Midiant de art, zûc e sium insiemit, a cirin di tornâ a cjatâ i leams pierdûts cu la mari tiere. Si lassin striâ dal paisaç, che al instrade la lôr creativitât. Cence sfuarçaduris. La nature ur fevele, lôr a scoltin e i lavorin parsore. A doprin materiâi, pe plui part, naturâi, dispès cjatâts sul puest. A rispietin l’ambient e a àn a ments la storie e lis tradizions culturâls dal lûc, flabis e leiendis, cuntun voli atent ae vite de int, ai imprescj dal so lavôr, a chel che al reste di alc che no si dopre plui, ma che al à une bielece antighe. Al è ancje par mieç dal studi de mitologjie e de simbologjie arcaiche, dal sium, dai propis percors interiôrs, che e ven esprimude la «aspirazion a cjatâ chê pierdude unitât tra om e nature che la civiltât e à distrut, ma che e je restade tant che nostalgjie de nestre psiche», a sclarissin sul sît.
Lis voris che a nassin a son destinadis a disfâsi cul timp. Lidrîs, fueis, stran, jerbis a tornin ae tiere intune sorte di ecuilibri cosmic: un mût par sotliniâ la sumission al cicli eterni des stagjons e de nature.
«Jo o soi leade al concet di voli – e conte Vera Paoletti, artiste nassude a Udin, dulà che e vîf –, che o ai doprât dispès dal 2003 indevant, cun cualchi variazion. Al è peât ae idee di nassite, di lûs e dal viodi, intun zûc di reciprocitât, alc che nus cjale, che al pues jessi il divin, l’infinît, il spirituâl».
Ispirâsi a un lûc, cjalâ la nature, sintisi part di un intervent creatîf cun jê. Al è il percors comun di chestis feminis, che a àn daûr une esperience professionâl leade ae art. Un grup viert al apuart di altris artistis, tant che al è za sucedût in passât, e unic tal so gjenar in regjon. Chei che a lavorin te nature no mancjin, ma la continuitât de esperience creative des “Feminis dal bosc” no à il so pâr in tiere furlane. Une tiere che e je «poç di ispirazion» – in gracie di un patrimoni siôr di tradizions, mîts e contis e di un paisaç une vore svariât – par une creativitât dute al feminîl.
BIO_SU LIS OLMIS DE “LAND ART”. Il grup si è dât dongje spontaniementri tal istât dal 2003, colegantsi al moviment “Art te nature”, che, daspò lis esperiencis de “Land art” tai Stâts Unîts tra i agns Sessante e Setante, si è svilupât a partî dai agns Otante te Europe dal nord. Lis “Feminis dal bosc” a son Luisa Cimenti, Franca Morandi, Maria Grazia Paderi, Sandra Palazzi, Vera Paoletti (te foto parsore), Laura Piovesan, Carol Wears. A lavorin te nature cu la nature, cence imponi la lôr personalitât sul ambient, ma, impen, lassantsi ispirâ des sôs risorsis e vuidâ dai siei ritmis. Lis ultimis instalazions a son stadis fatis te suaze di “Drin!” a Puart.
Erika Adami
_________________________________
CE FÂ
Ultins apontaments al Centri di art contemporanie di Vile Manin, prime de “rivoluzion” dal comissari Enzo Cainero. Sabide ai 11 di Otubar, aes 6 sore sere, scree di “Suite from the museum of guilt”, instalazion sonore in forme di suite di Teho Teardo, che e met adun i fascj passâts de residence cu lis musichis celebrativis dal Sietcent (si podarà viodi fin ai 14 di Dicembar dal martars ae domenie des 10 di matine aes 6 sore sere). E, aes 7, si podaran scoltâ i viers lets di Chiara Guidi de Socìetas Raffaello Sanzio e metûts in musiche dal musicist e compositôr furlan, gjavâts di tescj di Claudia Castellucci. Un lavôr ator di une idee di vôs doprade tant che cure. La jentrade e je libare. Informazions al numar 0432/821237.
Thomas Marcuzzi, Francesca Ragusa, Michele Panzino e Debora Vrizzi a esponin ae galarie La Loggia di Udin fin ai 22 di Otubar te suaze di “INconsuetUDINE. Art par public cence dissipline”, rassegne par cure de associazion culturâl Etrarte (vierte ogni dì des 5 e mieze aes 7 e mieze sot sere e la domenie des 11 di matine aes 6 sore sere). Informazions al numar 328.4673825.