“La glesie furlane, saltade fûr come fie primarole dal grim de glesie mari di Aquilee, mari di santitât, culture e tolerance, e salude di cûr la glesie di Bressanon-Bolzan cu lis sôs componentis di lenghe todescje, taliane e soredut ladine, che e spartìs cun nô no dome la stesse fede, ma ancje la stesse çocje culturâl e linguistiche e, salacor, ancje lis nestris dificoltâts par podê sentâsi te grande taulade dai popui a paritât di dovês e di dirits”.
Cun chest salût iniziâl come grup di Glesie Furlane o vin presentât un nestri intervent cul teme “Laudâ Diu par furlan. Storie dal furlan come lenghe liturgjiche”, a une cunvigne inmaneade a Bressanon tal 1998. Par chest leam cui fradis ladins dolomitans e te vergognose dificoltât a viodi aprovât il Messâl par furlan o presentìn une part di une riflession che pre Antoni al veve fat su la Patrie dal Friûl, in seguit a la cunvign.
UNE CUNVIGNE SERIE SUNTUNE CUISTION SERIE
La comission liturgjiche de diocesi di Bressanon-Bolzan e à clamât dongje i predis par rivâ a une regolamentazion des celebrazions liturgjichis in presince di cristians di culturis e lenghis diferentis. La vore e je stade fate in maniere serie, come che si conven a une glesie serie e a une materie cussì delicade. Dopo agns di discussions a ducj i nivei, ai 7 di Mai si veve di rivâ a lis conclusions, di presentâlis al vescul Wilhelm Egger par la promulgazion.
L’incuintri al è stât fat te academie Cusan e al veve par titul: “Laudâ Diu in plui lenghis”. Lis proposizions a son stadis presentadis tes trê lenghis uficiâls de diocesi: talian, todesc e ladin. I todesc e i ladins a capissin ancje il talian, come simpri, e, come simpri, i talians a capissin dome il talian. Si à proviodût cu la traduzion simultanie te scufe.
Stant al titul, si podarès sierâ la cuistion ancjemò prime di tacâle, parcè che nô no vin une lenghe liturgjiche nestre. No pal fat che nus mancje, ma pal fat che nus e improibissin. E no par resons di teologjichis o liturgjichis, che si podarès capîlis, ma par resons politichis, che no si pues e no si à di capîlis. Al è vêr che la mancjance di rignossiment de lenghe furlane e ven di un stât brigant e bausâr, ma al è ancje vêr che la glesie no à palesât ni plui cussience ni plui veretât e libertât dal stât e duncje e à plui colpe, dal moment che si justifiche e si legjitime in non dal vanzeli.
CJANT, E PREIERE E DUTRINE
In realtât il popul furlan, erêt dal patriarcjât di Aquilee, al à un patrimoni che pocjis glesiis a puedin stâ a pâr. Patrimoni che il passâ dai secui e la tristerie dai oms al à sassinât toc par toc. Nus son restadis, là che si à vût sintiment, lis melodiis patriacjinis, che la nestre int si passeve a cjantâlis insieme cul cjant religjôs popolâr. Prime des ghitaris e des banalitâts di cumò. Cussì o vevin une ricje tradizion di prejeris di famee e di devozion, ingjenuis e poetichis, che i predis lis bandivin de glesie ma che il Signôr lis scoltave tal cjamp, tal prât e te pâs de prejere serâl.
O vevin ancje une grande tradizion catechistiche, fate, come che si custumave in chê volte, a domande e a rispueste. Dongje de dutrine tradizionâl, i catechisims dal ‘Siet e ‘Votcent a ripuartavin lis preieris di ogni dì e i formularis che un bon cristian al veve di cognossi e di praticâ. No podìn dismenteâ la tradizons dai predis furlans di fâ ogni domenie il catechisim par furlan ai grancj e la predicazion ordenarie e ocasionâl te lenghe de int. Usance dismetude dal 1915, cuant che il vescul Rossi al à dit che il dirit dai soldâts talians al vignive prime dal dirit natîf dai furlans e dai slovens. Dopo dal vescul nazionalist, al è vignût il vescul fassist e dopo chel democristian, che a sunavin la stesse musiche sot la stesse bachete politiche.
UN POPUL SCANCELÂT E UNE LENGHE ÇONCJADE
Di dutis lis disgraciis de nestre glesie e int, si pues dî che la pagjine plui nere e à tacât cu l’a invasion-anession da la Italie. No si met in discussion il fat, ma il mût: ignorant, prepotent, prevaricadôr, centralizant, asfissiant. Nus interesse pôc che, a distance di un secul e mieç, la barache e sedi plui clopadice di prime. Intant il mâl lu vin vût e al riscje di fânus sparî de famee dai popui. In dut chest timp, i vescui talians dal Friûl no àn mai volût cjalâ in muse la nestre realtât pluriculturâl e plurietniche e frontâ cu la fuarce dal dirit naturâl e dal vanzeli chê che e je la cuistion primarie e indilazionabil de nestre glesie, premesse e condizion a ducj i progjets e plans pastorâi. Cussì, in gracie di un stât massonic e mafiôs e di une glesie debule e conivent, in Friûl al è stât perpetrât un autentic etnocidi, che al à scancelât il nestri non de famee dai popui e çoncjade la nestre lenghe de armonie universâl.
UNE OCASION MANCJADE; LA RIFORME CONCILIÂR
Dal 1963 e je capitade inte glesie une rivoluzion copernicane, cu la introduzion des lenghis vivis tal cûr stes de vite de glesie, la liturgjie. Di fat in Catalogne i vescui a àn metût in bande il messâl latin e viert il messâl catalan. Une ocasion providenziâl ancje dal pont di viste culturâl e politic, soredut tignint cont che al imperave ancjemò Franco. In Friûl i nestris vescui talians a àn metût in bande il messâl latin, che nus faseve compagns di sventure cun ducj, e a àn viert il messâl talian, che nus scludeve par simpri di un dirit sacrosant.
Il parcè lu san ducj e lu vin za dit. Il Vatican al à improibît il furlan parcè che nol jere ricognossût dal stât talian. Che si scuen rispietâ. Si pues contestâlu dome cul divorzi, l’abort e lis scuelis catolichis. L’unic che al semearès cussient dal probleme al è il vescul Battisti, che, denant de proibizion vaticane, al à decidût di no proibî un dirit. Al è il massim che si à rivâts a vê.
pre Antoni Beline
La Patrie dal Friûl n. 6 lui 1998 (921 de Patrie)
Sindic jo mame / “La nestre int no à mai molât. Covente fâ, no lamentâsi, par saltâ fûr dal pantan”
Walter Tomada
Alessandro Marangoni: la Aclif e deventarà istituzion di riferiment pai furlans “La Assemblee dai sindics furlans e je une realtât necessarie. E cul timp e deventarà ancjemò di plui un pont di riferiment pe identitât de nestre int”. Al è sigûr di chest Alessandro Marangoni, prin citadin di Dartigne, che al crôt tant inte Aclif […] lei di plui +
(L)Int Autonomiste / Autodeterminazion e dirits pai popui, uniche strade di pâs
Dree Valcic
✽✽ No podìn sigûr fâ fente che la vuere in Ucraine no dedi une serie di problemis intrigôs ancje aes fuarcis che si riclamin ae autodeterminazion dai popui e al ricognossiment dai dirits des minorancis etnichis. Prin di dut, ce che al è daûr a sucedi al è la ultime dimostrazion che chei problemis no […] lei di plui +
L'editoriâl / Macroregjons, une oportunitât di racuei
Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +
Ricorence / Pier Pauli Pasolini om contraditori e segnâl di contradizion
Pre Toni Beline
Tal centenari de muart di Pier Pauli Pasolini o ripuartìn a tocs la tierce part dal libri scrit di Antoni Beline tal 1993 ‘Trilogjie tormentade’, che e rivuarde propit il poete di Cjasarse I. RISPIETÂ IL MISTERI DAL OMLa sience plui dificile e je la cognossince di se stes. E se al è grivi cognossi […] lei di plui +
Int di Cjargne / La sporte de spese a km zero a ‘La Polse’ di Chiara e Matteo
Marta Vezzi
Di cualchi dì al è stât screât un gnûf servizi intal spaç e ristorant di Chiara e Matteo “La Polse di Cougnes” a Zui, indulà che si pues cumò cjatâ e comprâ prodots locâi. “La idee e je nassude pal fat che za nô intal ristorant o doprìn avonde materiis primis dal teritori – e […] lei di plui +
Il numar in edicule / Jugn 2022
Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +