CUINTRISTORIE DAL NÛFCENT 1970-1980. Taramots sociâi e l’orcolat

Il deceni di grancj cambiaments sociâi e dal nestri “ante o post Christum natum”
Si tache cuntune concuiste grandonone, firmade par man di un Furlan, Loris Fortuna, comunist pintît dai fats di Ongjarie dal ’56 e convertît al Socialisim, che propite tal 1970 – a pene rielet ae Cjamare dai Deputâts dal Guvier Talian – al propon la leç pal divorzi e al rive adore a fâle aprovâ il prin di Dicembar di chel stes an.
LORIS FORTUNA E IL DIVORZI_ La conferme popolâr e rive cul referendum tal 1974, daspò une bataie di grant impegn civîl e morâl scombatude paîs par paîs, borc par borc e place par place. Magari devant dal domo dal paîs, là che il predi al invocave scomunichis e maledizions a chei “ateus cence Diu” che no vevin nissun rispiet pe famee cristiane! Polvaron clericâl, anatemis di Rome, chê Papaline e democristiane che e imperave ancje chi in Regjon, tai uficis dai sorestants: e je stade la prime grande scjassade di modernitât pe nestre int. Massime pes feminis che, otignude bielzà la indipendence economiche, cumò a podevin ancje jessi libaris di scjampâ fûr de vuaite di oms no simpri galantoms, ma dispès paris e parons autoritaris che si paravin daûr dal vincul matrimoniâl, fasint i lôr comuts di masclis privilegjâts.
ATENTÂT FASSIST E AUSTERITY_ E se tal 1972 a Petean o vin imparât che i fassiscj no jerin ancjemò no stâts bandîts de Storie e che la eversion si le scrîf cul sanc di une stragje des plui orendis e misteriosis dal secul passât, che e à coinvolzût ancje servizis segrets deviâts (no je une novitât, te storie taliane!), il 1973 al bat la ore di une peraule che e diventarà popolâr e tristementri atuâl: “austerity”. Cuntune grande diference dal dì di vuê: la crisi di cumò e je cussì mate che la int e va indenant a spindi, magari indebitantsi, pûr di no rinunciâ al so nivel di vite abituâl. In chê volte invezit si sparagnave. Par vie de crisi petrolifare, causade dal embargo cuintri Europe e Stâts Unîts considerâts dai araps amis di Israêl, i rubinets dai carburants a vegnin sierâts. Cussì, dal 2 di Dicembar dal ’73 fintrimai al Jugn dal ’74, la domenie lis machinis a àn di restâ fermis, vie pe setemane la RAI no trasmet plui nuie dopo lis 22.45 e i cines a sierin aes dîs sot sere. La mularie e torne a jessi parone de strade. Su la Tresemane si cor cu lis ruedis tal mieç de corsie, a Udin in viâl Vignesie si distirisi a zuiâ di soldaduts o di balon, cence pôre di jessi cjapâts sot. E la sere si pues tornâ par dut il Friûl a morosâ come tal Votcent, cence la lûs eletriche. A vevin reson i vecjos a dî che nol è mai un mâl che nol sedi ancje un ben! Si sintive tal aiar – che al tornave a profumâ di fen e no plui di gasoli – che la Storie e podeve cambiâ direzion. Che il progrès nol pues sei indefinît, cence fin. Che la energjie e pues finî. Le vessino imparade!

TARAMOT_ Ma il nestri “ante o post Christum natum”, la date che e divît il timp, i ricuarts, la storie universâl, chi di nô e passe pai 6 di Mai dal 1976. Une sdrondenade che e ferme l’orloi aes 21.06: 57 seconts par gloti te gose dal Orcolat 989 personis, cambiant pardabon la storie, la muse, il destin de nestre Tiere. In chê gnot di sirenis e fumarice di patùs e di polvar e di berlâ e di vaî e di cirî cence sperance, tant dal Friûl che si cognosseve al è stât scancelât vie par simpri di chê furie bestiâl. Borcs antîcs sdrumâts par tiere. E cun lôr la memorie, la identitât di un popul fate sù clap su clap, une gjenerazion daûr chê altre, par plui di mil agns. Cjalant il sassinament che tancj architets di ideis une vore origjinâls a àn fat de nestre ereditât urbanistiche, violentant i paîs plui che no il taramot stes, il pericul al è stât pardabon grant e destinât a conseguencis ireparabilis. Par fortune e à vinçût la voie di resisti, di no pierdi la anime insieme cui rudinaçs di puartâ vie. Int come pre Checo Placerean che devant des tendis al predicjave la fuarce de Storie condividude di ducj par salvâ un Popul de tribulazion; i volontaris, i alpins, i scouts, la Crôs rosse, tantis mans vignudis ancje di lontan a àn judât a tirâ sù i mûrs. E a àn puartât aghe, medisinis, brandinis, vivandis, vistîts. Fintrimai il nemì dal Ocident, la Jugoslavie di Tito, e à mandât sù i Bosgnacs, operaris de Krivaja, fabriche di len: int buine, cidine, che e lavorave cence domandâ nuie. A butavin vie il salam. Dopo o vin capît che a jerin musulmans. I “sclâfs comuniscj mangje fruts”, predicjâts di cierte politiche ancje nostrane! Ma il mot di chei dîs, il “fasin bessôi” pronunciât cun braure, nus à salvade la dignitât. Parcè che li o podevin meti man dome che nô. I predis di Glesie furlane che a àn tignude dongje i paîs domandant par prins “fasìn prime lis fabrichis, po lis cjasis e in fin lis glesiis”, i comitâts tes tendopolis, la organizazion risolude de int, la perfete gjestion de emergjence a àn creât il tant sbandierât “Modello Friuli”. E je li che e nas la Protezion Civîl. Chê vere però, espression di une fuarte e coragjose volontât popolâr. Esempli pôc seguît in tragjediis similârs vie pe Italie in dì di vuê!
Clâr che a son stâts ancje chi i siacai che a robavin ai muarts. E cualchi sindic pôc onest, che par vê mangjât plui di ce che i spietave al à ancje paiât. Vuê a son in tancj a mangjâ, ma par solit a àn il privileç che no ur àn mai presentât il cont. Une stagjon che cumò e somee epiche, lontane, cuasi mitiche.
BRIGADIS ROSSIS_ Al pareve che cheste fuarce no varès mai vût di fermâsi. La Storie invezit e je tornade a sveânus propit ae fin di chei agns: Cesare Di Lenardo, Gianni Francescutti, lis celulis furlanis des Brigadis Rossis. Atentâts, dimostrazions, bliz parfin dal cuintrispionaç american, coordenât de base di Davian. Il rapiment di Taliercio, president de Petrolchimiche di Marghere, lu àn preparât propit ca di nô. Secuestrât e tignût scuindût fin ae sô esecuzion tai boscs dal Friûl. Ma intant il timp al sbrissave vie svelt viers la dissese anonime e cence anime dai agns ’80.
Angelo Floramo
______________________________________________

IL FRIÛL SCJASSÂT
Il deceni al è dut lesionât di sclaps che lu spachin fin a falu colâ in rudinaçs e polvar. Agns di taramots, cidins o devastants. Orcolats che a crevin e a sbreghin fûr par fûr la societât, la politiche, la culture. Al somee che il mont, chel vecjo, al seti destinât a vignì ju cuntun grant bot, tant che un mûr di clap, par no tornâ plui sù come che al jere stât fat prime. Pierdint alc e alc vuadagnant, come che simpri al sucêt daspò lis trasformazions che a fasin la Storie de umanitât. Il Scjas de tiere sal visìn ducj, il plui evident, chel che al reste inclaudât te cjar di ogni furlan, impastât di sanc, e lagrimis, e pôre. Ma il Taramot al è stât dome le manifestazion fisiche di un marum e di un torment interiôr, che di volte in volte si è esprimût in chest agns tal dibatit politic, al à cjapât forme di concuiste social e culturâl, di proteste, di confront furiôs, di animazion e di partecipazion popolâr come che mai prime si jere viodude. Altris voltis nus à invelegnât di une ideologjie malade di muart, che ancje te nestre Patrie e à berlât cun vôs di rabie: chê dal terorisim e de lote armade, nere o rosse che e sedi stade. Propite tal mieç di chescj agns, come il fier di une meridiane plantât tal cûr dal soreli, inte gnot jenfri il 1 e il 2 di Novembar dal 1975, al murive in maniere tragjiche Pier Paolo Pasolini, massacrât a colps di baston e daspò fruçât sot des ruedis de sô machine su la degradade riviere dal Idroscâl di Ostie: plui di tancj altris al veve savût lei e interpretâ lis contradizions dal nestri popul, imbastint libris, cines o poesiis. Lui al è stât l’ultin a podê cjantâ ancjemò chel “paîs di temporâi e primulis”, prime che al disparissi par simpri te zulugnade de Storie che, grise e frede, si stave poiant pardut.  (A.F.)