Cui voi di chei che a jerin li

A molâ chel document sul altâr di Sant Pieri in Zui e a lâ vie protestant parcè che no ur vevin dade la pussibilitât di celebrâ la messe par furlan, ai 28 di chel Avost dal 1974 a jerin cun pre Checo Placerean e pre Antoni Beline ancje pre Laurinç Dentesan e pre ‘Sef Cjargnel, plevans de Plêf di Guart e che di in chê volte a son inmò tra i plui atîfs dal grop di Glesie Furlane. Une testemoneance preziose che nus permet di fâ un salt indaûr di 40 agns par vivi cuasi di persone chei moments che a àn segnade la storie no dome di une associazion, ma dal Friûl plui resint.
In chest viaç nus compagne propit pre ‘Sef “O vivevin un moment particolâr dulà che e jere fuarte la esigjence di tornâ a cjapâ chê glagn popolâr te liturgjie, ancje parcè che la jerarchie de glesie e veve un fuart leam cu la politiche. E par saltâ fûr di une situazion dulà che la nestre int e paiave al stât un sotsvilup no casuâl, o vin cjatât te storie, te lenghe, in Aquilee chê forme di riscat e rivalutazion pal Friûl”.
– Cemût ise nassude la iniziative di Zui?
“No dal sigûr come un episodi estemporani: fûr di dubi, la fuarce carismatiche di pre Checo Placerean e veve za segnât il troi cu la celebrazion de messe di Aquilee, che la prime e jere za stade dal 1970. Si veve za fatis lis primis traduzions e il prin messâl furlan al jere za dal 1972 grazie al intervent di bonsignôr Pieri Cocolin, arcivescul di Gurize, che Diu lu vedi in Glorie. E di là dal aspiet liturgjic plui strent, o vin ancje di marcâ il fat che sot vie al jere un humus atent a cheste cuistion: cence discomodâ la cuistion de Mozion dal Clero dal 1967, o podìn ricuardâ lis iniziativis di pre Bepo Marchet pe lenghe furlane, la Cuintristorie dal Friûl o ancje il sempliç episodi di gno pari che al leieve Int Furlane…”
– E parcè sêso stâts clamâts a Zui chê dì?
“Bonsignôr Alfredo Battisti, arcivescul di Udin, e bonsignôr Emilio Pizzon, so ausiliâr e titolâr de diocesi di Zui, a vevin clamât i predis de Cjargne a un incuintri te glesie mari di Sant Pieri che si concludeve cuntune messe”.
– Ce isal sucedût?
“Savût di chest incuintri ur vin domandât di celebrâ la messe in lenghe furlane”.
– Parcè?
“Cemût parcè? Parcè che za dome puartâ la lenghe furlane dentri de messe e je une rivoluzion liturgjiche straordenarie. Se di une bande la jerarchie e veve pôre di une comistion politiche, di chê altre la int ti torne dongje: lu sperimenti dì par dì di passe 40 agns in ca tes mês parochiis de Cjargne dulà che jo e pre Laurinç o celebrìn dome par furlan. La glesie jerarchiche di chei agns e jere masse leade cu la Democrazie Cristiane e e viodeve te nestre azion une espression dal Moviment Friûl. Ma noaltris o vevin a cûr dome la idealitât, il principi di fonde che al è dirit naturâl di ogni popul di doprâ la sô lenghe ancje te liturgjie: parcè il furlan no varessial di vêlu?”
– Ce us àno rispuindût?
“Un no sec! Cence margjin di discussion, e denant di chest ategjament o vin preparât e firmât chest document, ur al vin lassât sul altâr e o sin lâts fûr de glesie, spacant il pulvin. Di li o vin preparât ancje altris documents, che o firmavin parafrasant chê detule che e dîs ‘Cjargnei cence Diu’: noaltris o dopravin il non ‘Cjargnei cence dius’ cul minuscul e al plurâl, ven a stâi ‘cence idui’ e duncje dome ‘cuntun Diu’, tant par rispuindi a chei che te jerarchie nus segnin tant che eretics”.
– Ce us àno dit par cheste proteste?
“Sul moment nuie di nuie. Ma a àn ben cjatade ocasion plui e plui voltis par fânuse paiâ in maniere plui o mancul direte…” ❚
Christian Romanini