La edizion di chest an di “In File” e torne a tamesâ i grignei plui interessants de culture e de storie de nestre tiere. Ai Colonos di Vilecjasse il program de edizion numar 29 de rassegne, curade di Federico Rossi cu la consulence di Agnul Floramo, al à un titul ispirât a Pasolini, ma coret sot la forme significative di “Un paîs di maseriis e di primulis”. Protagoniste par ben doi incuintris – a vierzi e sierâ il calendari – e sarà la scritore todescje Esther Kinsky che cul so romanç “Rombo” e a atirade la atenzion de narative taliane sul teme dal taramot furlan dai 6 di Mai dal 1976. La version “live book” dal libri e sarà proponude in maniere fuarte e inmagante di Martina Delpiccolo e Fabiano Fantini, come scree di “In File”, domenie ai 8 di Fevrâr aes 4 dopomisdì (orari compagn par ducj i incuintris): ai 15 di Març invezit l’ultin incuintri di chest an al sarà un dialic de Kinsky cun Floramo, intun discjant dal titul “A soreli crevât. La dì dopo dal Montafin”.
◆ Domenie ai 15 di Fevrâr protagoniscj a saran Gian Paolo Gri e pre Romano Michelot, intune riflession batiade “A flagjelo taramoto liberanus Domine”, che si incrosarà cuntune testemoneance audio di pre Toni Beline. Ai 22 di Març Ermes Ronchi, presentât di Raffaella Beano, al resonarà su la provocazion “Diu indurmidît”, che pari David Maria Turoldo al lancià l’an dopo dal taramot intune so famose riflession. Al Prin di Març Ferruccio Cainero e Vanni De Lucia a mostraran cemût che a son “Colâts da l’astronâf” intun recital semiserie ma che al fasarà pensâ almancul cetant che al fasarà ridi.
◆ Dai 8 Fevrâr ai 15 di Març (intant dai incuintris) si podarà viodi ancje la mostre dai lavors di Tonino Cragnolini (1937-2014) sui “Ribaltons furlans”. ❚
Colonos: “In File” par rifleti su “un paîs di maseriis e di primulis”
Redazion
