CJARGNE VIVE. Cressi: gnûf circul a Çurçuvint Disore

In vie de Vile, a Çurçuvint Disore, di cualchi mês al è stât screât il gnûf Circul “Cressi”. La idee e je partide doi agns indaûr a Gjinevre, citât indulà che Sonia Zanier e à vivût par cirche 10 agns. Il so pinsîr al è subit lât sul cemût dâ une man ae societât di cumò, par che no peiori, par che e cjapi pît soredut la culture de salût. Sonia e à fat un grum di studis, in particolâr sul rapuart tra om e salût, e e dîs che “L’om al sta ben cuant che al à un sens intal mont li che al vîf, sul lavôr, cun chei altris”. E cussì e je nassude une mission ben precise: cirî di creâ un ambient dulà che l’om al puedi jessi se stes. E chest ambient si cjate a Çurçuvint Disore e al è pardabon un lûc prin di dut storic (si trate de vecje cjase Pitt dal 1600) e tipichementri cjargnel: lis stanzis dal plantiere a son a volts, iluminadis di une luminarie lizere ma colorade che e rint pardabon calorôs il barut e lis salis dongje. Simpri in chest plan, si cjate ancje la biblioteche indulà che si pues pierdisi tal mont de leture. Tal plan parsore, invezit, e je une grande sale cun plui funzions: in chest moment si tegnin cors di tambûr, ma e vignarà utilizade ancje par mostris, teatris, e v.i..
Il Circul al è dome un pont di partence: il non “Cressi” di fat al è stât metût parcè che al à inmò di cressi il progjet. “Nô si clamin Cressi: cûr jessi, intindût jessi di cûr, jessi insieme, jessi par dâ, par contribuî… Un progjet che al vûl tirâ dongje plui int, creant spazis par fruts, par anzians e, soredut, tignî dongje i zovins che no san ce fâ e che invezit di lâ ator a podaressin crodi in chest progjet, dant une man. Cheste e je une sfide: fâ sintî a la int di vincj agns che no pues stâ cence fâ nuie, che al è un dirit judâsi, jessi atîfs. La concezion e je chê di rivâ a jessi tu a direzi il to cjaval e no jessi tu il cjaval. Dopo, se no si rive nol impuarte, ma intant si prove, cence considerâsi falîts.”
Tantis a son lis seradis di musiche che a son za stadis fatis e che a àn vût un bon esit e a son stadis preseadis no dome de int dal puest ma soredut de int che e ven di fûr. Il Circul al è viert a ducj, baste dome tesserâsi. ■
Marta Vezzi