CUSINE. Asêt in taule?

ASÊT DI VIN ROS
Intune tiere di vin tant che il Friûl, al è il plui comun, indispensabil massime cu lis verduris di savôr plui mareôs, tant che cicorie, tale, sparcs salvadis, lidric. Ma ancje te plui classiche, tradizionâl e gloriose terine di salate, cun pomidoros e cudumars.
Naturalmentri al pues jessi, tant che il vin, plui o mancul consistent o gherp, e li – naturalmentri – al jentre il gust personâl.
ASÊT BLANC
Plui gherp di chel ros, l’asêt blanc al è plui un prodot “si servizi” che un prodot di puartâ in taule. Si dopre massime par cusinâ, par esempli par zontâlu te aghe dal pes cusinât “in carpione” o cuant che si lessin i sparcs, par tignîju plui blancs. E al è chel plui doprât cuant che si vûl meti lis verduris dal ort tai vasuts, ancje parcè che – cence i tanins dal vin ros – nol influence il lôr colôr.
E po dopo, l’asêt blanc al è un vêr fenomen cuant che al jes de cusine e si lu dopre in cjase: par discrostâ il lavel, par disgrassâ il gas o il for, par distropâ il water e parfin par doprâlu te laveblancjarie, alternative pardabon ecologjiche e di grant sparagn a pet dal inmorbident industriâl.
ASÊT DI MILUÇS
A è par definizion l’asêt de cusine de Europe dal nord, e nol è un câs che ca in Friûl – tiere de Mitteleurope – al sedi plui popolâr che in altris bandis di Italie (ancje parcè che une volte i miluçs si cjatavin ancje dulà che, come in mont, il vin no si produseve).
Plui delicât tal savôr, e dal sigûr mancul gherp, al va une cane cun verduris dal savôr plui lizêr, o ancje par salatis di chês plui elaboradis (chês, par esempli, cu la salate miscliçade a tocs di miluç o a fetutis di narant).
Pal so odôr mancul fuart, ultimementri, al è daûr a sorpassâ chel di vin blanc tes abitudins di chês feminis che, daûr de lezion des nonis, a usin a fâ la ultime resentade dai cjavêi cuntune tace di asêt.
ASÊT BALSAMIC
Di cualchi an in ca al è deventât di grande mode l’asêt balsamic, che al à il so esempli plui famôs e preseât tal asêt balsamic di Modene, un vêr elisîr (ancje tal presit) di doprâ magari su lis freulis, su la cjar o fintremai sul gjelât.
Dut câs, chel di Modene nol è par sigûr l’unic, parcè che ancje ca in Friûl a son tancj i produtôrs – piçui, artesanâi, fintremai a nivel domestic – che a sielzin di lassâ in bande une part dal vin o dal  most par metîlu a madurî in caratei di len, par otignî une version personalizade di asêt balsamic, che  al cambiarà savôr daûr de cualitât de ue, dal len dal caratel, dal timp e magari di cualchi savôr zontât par aromatizâlu.
In chest contest, par esempli, al nas il svant de zone di Manzan, il nomenât “asperum”, che plui che un asêt (di most cuet) al semee une creme sauride e profumade, maraveose su lis fraulis.
Par une famee normâl, naturalmentri, nol è simpri pussibil vê ogni dì in taule une di chestis piçulis maraveis, e plui dispès – par vê un balsamic di meti su la cjar brustulide o su lis verduris te gridele – al tocje rivolzisi ai negozis, dulà che si puedin ancje cjatâ asêts balsamics decorôs, cuntun resonevul rapuart tra presit e cualitât. Tignint dut câs iniment che l’asêt balsamic, par jessi tâl, al à bisugne di tant timp in cjanive, e di conseguence il presit nol pues jessi masse bas. Di fat, buine part dai “balsamics” che a son vendûts tal supermarcjât, magari a mancul di doi euros a butiliute, no son vêr balsamic, ma asêt di vin “coret” cun caramel, par fâlu plui penç e plui dolç. Duncje, miôr comprâ cul cjâf, pierdint magari cinc minûts di plui par lei ben lis etichetis… ■
Margherita Timeus