Cjargne Laboratori di Europe: Art e musiche par costruî inclusion sociâl

Domenie al 1n di Març tal Comun di Davâr si è tignude une zornade di events vierts al public par presentâ i risultâts dal progjet ‘Cjargne Laboratori di Europe: musiche e arts par costruî inclusion e coesion sociâl’, iniziative finanziade dal program Horizon de Union Europeane dedicât ae ricercje e ae inovazion.
◆ Il progjet internazionâl al cjape dentri comunitâts in Italie, Serbie, Gjermanie e Norvegje cul obietîf di studiâ cemût che lis arts – de musiche al teatri e ae danze – a puedin favorî il disvilup culturâl des personis.
Sul teritori cjargnel lis ativitâts a son stadis promovudis de Cooperative Puntozero in colaborazion cul Centri Studis Interculturâi dal Dipartiment di Siencis Umanis de Universitât di Verone. Intai ultins mês a son stâts organizâts laboratoris e percors artistics dedicâts a personis di dutis lis etâts, cun chê di rinfuarçâ competencis tant che il scoltâ, la empatie e la colaborazion.
◆ “In Cjargne, par chest progjet, e je stade cjapade dentri ancje la cooperative “Casa Mia” – al conte Francesco Rossi che al lavore propit in cheste realtât – e la universitât nus à domandât di jessi partner cul teme ‘Trop che lis arts formativis a puedin jessi ocasion di comunitât’. La presentazion finâl e je stade fate al 1n di Març dal 2026 ma e je stade dome une tape di un progjet plui larc che al è scomençât plui di un an indaûr e che si pues sintetizâ intun grup di personis (fruts, oms, feminis) – cualchidun bon di sunâ o che nol jere bon di fâlu – che si son cjatadis e che a àn començât un percors di orchestre, une orchestre libare e spontanie ispirade de voie di stâ insiemi. Il baricentri al è stât Davâr parcè che o vevin za impins une colaborazion cul Comun che nus à metût a disposizion spazis di agregazion. I partecipants a vignivin no dome di cheste comunitât, ma ancje di Sudri, Zui e v.i. Il progjet nol proviodeve dome il stâ e sunâ insiemi, ma al jere ancje un monitorament fat di un grup di ricercjadôrs universitaris; chescj, midiant di intervistis e cjapant sù impressions, a àn podût capî trop che une esperience dal gjenar e podarès in efiets lâ a impatâ su lis competencis personâls di cui che al partecipe. E je une ricercje sperimentâl che tal nestri câs nus à dât rispuestis un grum interessantis. Lis personis si cjatavin par sunâ une volte pe setemane e in ciertis seris, dopo, si cjatavin a cjacarâ di altri, dai lôr problemis o di cemût che a stan, e alore la musiche e deventave ancje un mieç par cirî propit di confrontâsi. Forsit no saressin rivâts a chest se no vessin vût il stimul dal progjet. La esperience a nivel musicâl e je stade coordenade di Massimo Silverio e Giulio Venier.
◆ Mi plâs meti in lûs che fra i partecipants, e jere int che no saveve sunâ, ma il cjant al è un vetôr avonde imediât par ducj. Al jere cualchidun che al cjantave, altris che a imparavin a sunâ un strument. Se tu âs cualchidun che ti vuide te maniere corete, alc al ven fûr. Tal percors a son stâts ricjapâts ancje cjants antîcs de Cjargne. Il pont di partence al è simpri stât ‘cjantìn alc insiemi’, soredut intun teritori che al à cheste tradizion orâl fuarte.
◆ Domenie i vin volût creâ plui moments ancje par contâ cheste esperience a plui comunitâts cirint di incrosâ ce che nô i vin cognossût; i vin fat 2 apontaments ta buinore a Clavaiis e Muine: la ocasion a ere stâ insiemi contâ e invidâ la int tal dopo misdì al centri zovins di Davâr a viodi insiemi l’esit di chest percors.”
◆ La zornade dal 1 di Març e à rapresentât duncje un moment impuartant di condivision cun dute la comunitât, dimostrant cemût che las arts a podin deventâ un imprest concret par favorî relazions, partecipazion e inclusion sociâl. ❚