O publichìn il test che il president de Clape di Culture Patrie dal Friûl al à scrit pal libri “Il Friuli Modello 1976 – 2016” publicât dal Istitut Ladin Furlan “pre Checo Placerean”.
La tiere e scjasse, a colin cjasis e monuments, ma a clopâ ai 6 di Mai al è ancje il concet stes di Stât e des sôs istituzions.
Intal 1976 il Friûl al è un pont nevralgjic de strategjie militâr de NATO, anzit al è “il Pont”. Di chi a varessin vût di passâ i cjararmâts dal Pat di Varsavie in câs di invasion. No dome: chi, a Davian, a son, ma ducj alore a disevin che no jere vere, lis testadis nucleârs, propit là che i bombardîrs americans a àn la lôr base.
✽✽ I Stâts Unîts no puedin permeti une “situazion di instabilitât fuarte” su chest teritori. Il comunisim al reste il nemì principâl, la URSS di Brežnev une menace reâl, i plans militârs de NATO a previodin ancjemò chel “soiâr di Gurize”, la striche che dilunc di jê l’esercit talian al varès di resisti adiriture par cinc minûts, dant cussì il timp ai avions di bombardâ l’invasôr, ma ancje dut chel che i sta ator.
✽✽ Tra la riunion dal guvier de matine dai 7 di Mai, la prime nomine di Zamberletti e la sucessive, cul intervent diret di Moro e la sô decision di rimeti la ricostruzion ae Regjon, a passin pôcs dîs e no si pues pensâ che nol sedi stât un contat diret cui comants NATO e il guvier american par concuardâ une linie di azion che e tignìs cont dal confin orientâl.
✽✽ No je stade la classe dirigjente furlane, in particolâr la DC locâl, a otignî cheste responsabilitât, che invezit e je stade decidude, ma disarès ordenade, dal stes Moro.
Il president Comelli al à acetât cheste cjame no cence pôre e esitancis: al bastarès visâsi la espression de sô muse par television o la tonalitât basse de sô vôs intai dîs subit dopo dal sisme. Intant che intai paîs dulà che si sgjavave tra lis rudinis, a tacavin za a viodisi lis primis scritis “Nol sarà un altri Belice” par segnâ une volontât clare di reazion, dai palaçs de Regjon a partivin dome apei flevars ae solidarietât nazionâl.
No savìn se a forin analiscj de CIA a detâ lis regulis, o se invezit e fos stade propit la intellighenzia politiche dal statist democristian a imponi une strategjie di decentrament di podês e risorsis, che in graciis di chês si sarès provât a no ripeti il Belice, evitant cussì une potenziâl situazion esplosive.
✽✽ No savìn nancje cuâi “dossier” che a rivarin su la taule di Moro des zonis taramotadis: dal sigûr i rapuarts dal SID a vevin segnalât i prins sintoms de malfidence de popolazion colpide bande lis promessis romanis, a vevin notât il rivâ di volontaris e zovins di dute la Italie, cu lis jerarchiis che a saltavin tra i soldâts e i uficiâi impegnâts tra lis maseriis, lis primis riunions tra i cjâfs di famee che a configuravin il tornâ a nassi di chês formis spontaniis di organizazion e vigjilance autonome, cun picons e sclopis di cjace. E nancje dal Vatican a rivavin buinis gnovis in cont dai predis furlans, di timp cognossûts e bolâts tant che clericât cjaviestri e facil a impiâsi ai fûcs autonomiscj.
Moro, duncje, al à sielt la strade plui juste par lui: chê di dismolâ il clime, prime che si discjadenàs il temporâl.
✽✽ Chel che o podìn definî un colp di man, al veve bisugn però de aprovazion americane che no je mancjade cu la rivade in Friûl dal vicepresident Rockefeller ai 13 di Mai, e cul anunzi dal stanziament di vincjeun miliarts a pro de ricostruzion de bande dal Congrès USA.
✽✽ La deleghe ae Regjon e fo aprovade, intune cui proviodiments urgjents, inte leç 336 dai 29 di Mai.
Trê dîs prime a Glemone si jere tignude la prime assemblee dal coordenament des tendopolis, une riunion improibide de Prefeture, intant che si moltiplicavin i ausvais pai volontaris e lis provis di militarizâ la vite intes tendopolis: ducj ats parâts indaûr cun fuarce de popolazion.
✽✽ Il procès di responsabilitât coletive duncje al jere scomençât e si son dimostrâts dibant i ats seguitîfs par blocâ il so disvilup che, gracie ancje a chê leç volude di Moro, al cjape dentri ancje sindics e aministradôrs intune ricostruzion gjestide e controlade dal bas.
✽✽ Ma par rivâ a chel risultât si ve di ribaltâ il concet stes de politiche e lis fuarcis in cjamp si son misurarin propit inte capacitât di adatâ metodis e strategjiis ae gnove situazion.
✽✽ Se, cemût che o vin viodût, il denominadôr comun dai doi partîts plui grancj, DC e PCI, al è chel di evitâ il ripeti dal câs Belice par resons diferentis, dut câs univoche e je la volontât di presentâ une imagjin dal Stât bon di rispuindi ae emergjence, e i prins intervents no si son movûts sigûr in chê direzion.
A prevalê intal aparât statâl, tal esercit prin di ducj, dopo lis primis fasis di disorganizazion totâl segnâts de iniziative dai singui comandants di repart, dispès dai sotuficiâi, che a puartarin ae jessude di oms e mieçs des casermis, e fo la tindince a viodi i intervents stes tant che operazions “militârs”, cence nissune considerazion pe esperience, cognossince dai lûcs e dai materiâi de popolazion locâl. Significative la decision di instalâ lis primis tendopolis cuntune logjiche di chest gjenar, che no corispuindeve ai bisugns dai sorevivûts o su terens no juscj: dome la determinazion dai abitants e à fat cambiâ idee a colonei e gjenerâls.
✽✽ Ma chescj a son dome doi esemplis di chê discrasie che, a pôcs dîs de scjassade dai 6 di Mai, si steve za creant tra popolazion e autoritâts.
“Une situazion esplosive che e podeve degjenerâ intun scuintri viert” a jerin lis tesis supuartadis, nancje in maniere masse velade, dai articui da “L’Unità”, cul suspiet de infiltrazion di teroriscj tra lis filis dai volontaris o de presince dai “estremiscj” intai comitâts.
✽✽ Chest nol capità prin di dut pe responsabilitât dai stes comitâts, e po ancje pe impostazion dai grups extraparlamentârs, Lotta Continua e Democrazia Proletaria, tignude tal frontâ l’Orcolat e il teme de ricostruzion, restant presints in tantis zonis taramotadis e sfrutant il mani politic fuart che a vevin ancjemò tra i zovins students furlans.
✽✽ No meterin parsore nissun “cjapiel ideologjic” ae lôr ativitât intes tendopolis, dulà che dispès i lôr zovins, students e operaris, si dimostravin no dome chei plui atîfs intal fâ e inte organizazion de vite cuotidiane, ma si metevin dispès al servizi di cui che, cuntune selezion cuasi naturâl di competencis e savietât, al provave a tornâ ae normalitât e, soredut al vuardiave l’avignî de lôr int.
✽✽ “In Friûl no si faseve la rivoluzion, ma si lavorave dûr par judâ i taramotâts. No si fasevin proclamis, ma si steve in bande di chei che ogni dì a afermavin il dirit di viodi ricostruîts i lôr paîs dulà che a jerin e cemût che a jerin, stant adun cun chei che a vevin blocât lis pacaris za impegnadis intune opare di abatiment salvadi di mûrs e che a ipotizavin citâts satelit anonimis dilunc de Pontebane, jù fin ae basse planure. Cun cheste cussience a son stâts rimandâts a cjase chei de autonomie romane, chei di Via dei Volsci par intindisi, che rivâts ae stazion di Udin par prime robe a domandarin “Dulà che a jerin i fassiscj”.
✽✽ Cun chest spirt si capìs parcè che lis Brigadis Rossis a son rivadis a formâ lis lôr colonis avilidis, sì tirant dongje cualchi afiliât inte zone taramotade o creant covis tant che chê di Tarcint là che al à cjatât la muart l’inzegnîr Taliercio, ma no rivarin mai a lâ dentri cun azions o propagande intes manifestazions dai comitâts.
✽✽ Se duncje si saldave intal Coordenament dai paîs taramotâts, intai siei boletins e intes sôs manifestazions il rapuart tra i zovins, fîs des manifestazions pe Universitât prime, dal ’68 dopo, e la glesie furlane che cui siei predis e rapresentave il fîl de schene dal moviment, altris a provavin in maniere strumentâl a imponi la lôr vision e lis lôr diretivis.
✽✽ Al è il câs di “Comunione e Liberazione”, butade aromai sul plan nazionâl sedi tant che rapresentance dal mont studentesc, sedi aromai di chel eclesiâl, economic, finanziari.
Il taramot dal Friûl al pâr ai siei dirigjents tant che la prime vere ocasion di dimostrâ chest primât in prospetive ancje dai afârs pussibii leâts ae ricostruzion.
✽✽ CL al rive in chei dîs cun potence di oms e mieçs, e al pâr bon, in graciis dai siei volontaris, di “imparonâsi” di ogni parochie, di detâ leç ancje su la glesie locâl e di chi inte DC.
Al sarà un faliment dovût ae sô arogance e ae sielte di leâsi propit a chei predis, dispès chei plui anzians, che a vevin decidût di no jessi part ative dal moviment e che a acetaran di bon grât di delegâ ai gnûfs rivâts la responsabilitât des problematichis ancje cuotidianis.
Un nuie devant des risorsis metudis in cjamp dai dissepui di pre Giussani.
Al è stât duncje un senari politic diferent e, in cualchi maniere, alternatîf a chel che si viveve in chei agns in Italie.
✽✽ Di chel al derivà ancje une confluence di pinsîrs e ideologjiis diviersis tra di lôr, ma che, intal confront su lis robis di fâ, inte scuvierte di une identitât di popul in pericul di estinzion, al à cjatât la modestie e la pazience dal confront inte ricercje dal ben comun.
Chest risultât straordenari al è stât sigûr il risultât de cussience di vivi un moment dramatic, ma ancje unic, dulà che il stes futûr dal popul furlan al jere in discussion e duncje vecjis divisions e contraposizions ideologjichis a varessin podût puartâ dams enormis ae compatece di un moviment che al jere daûr a nassi intes baracopolis.
✽✽ A chescj sintiments però si scuen zontâ il rûl decisîf che un grup numerôs di predis, dâts dongje ator di “Glesie Furlane”, al à davuelt in chei prins mês de tragjedie. La clamade di pre Checo Placerean, par che des rudinis si vignìs fûr “cul cjâf e no cui pîts” al sintetizave il pinsîr di chel clericât furlan che za cu la bataie pe Universitât, cu la mobilitazion cuintri di sotsvilup, miserie e servitûts militârs, si jere dimostrât une fuarce vive che e sburtave une vision autonomiste de politiche regjonâl. Nol è un câs che fra i fondadôrs dal stes Moviment Friûl a fossin za de sô nassite tancj di chei predis.
✽✽ Chel “di bessôi”, risultât de cussience che e steve intes mans dai taramotâts, e di ducj i furlans, al fo la fuarce de rispueste su cemût lâ fûr di une situazion di emergjence, metint lis fondis pal disvilup, creant la pussibilitât di un doman diferent che nol restâ formule teoriche. Si à concretât inte opare simpri ferbinte dai plevans intal tignî unidis lis comunitâts, furnint struments par capî ce che al jere daûr a sucedi a nivel di leçs e intervents governatîfs, intal valutâ lis propuestis regjonâls, intal discuti intune cu lis popolazions e dopo controlâ la lôr eficacitât e positivitât.
✽✽ La anime di dut chest al è stât pre Pauli Varutti, plevan a Vasinis e Bordan, simpri ferbint intune cun pre Giulio Ziraldo, pre Toni Cjapielâr e pre Roman Michelot, intal sostignî une vision complete des problematichis e, tal stes timp, buine di dâ rispuestis cuotidianis aes dibisugnis des tendopolis.
✽✽ I prefabricâts che a ospitavin la parochie di Dartigne a deventarin il centri di chest confront che, in graciis de presince di pre Duilio Corgnali, al rivà a influençâ lis sieltis dal vescul Battisti e la linie tignude de curie udinese cu lis autoritâts ancje dilunc de ricostruzion.
✽✽ O crôt però che si scuegni assegnâ il merit di cheste “Sante Aleance” a un laic, a chel Maur Tosoni che fin dai prins dîs dal taramot al à capît cemût che il fatôr informazion al deventàs un element vitâl pe lote dai taramotâts.
✽✽ Dai prins ciclostilâts, strument indispensabil di cognossince e racuardi tra lis variis realtâts de zone taramotade, stampâts a Glemone tant che coordenament des tendopolis, si rivà ae edizion dal gjornâl “In Uaite” direzût di Tosoni, che no dome al deve vôs ai paîs, ma si meteve tant che moment di elaborazion e discussion fra ducj chei che si movevin in bande dai comitâts.
Une vôs di sperance in non di une autonomie che e cjatave fûr il so cûr propit intal moment plui scûr. ❚
