Il Coiat

Il coiat Crex crex, clamât ancje cul non “re di cuaie”, al è un uciel migradôr su lungjis distancis cuntun grant areâl riprodutîf che al va de Europe ocidentâl ae Asie centrâl. La Italie, dulà che la specie si cjate massime tal setôr montan des regjons dal Nord Est, e je al so limit e il Friûl al è la regjon cul numar plui grant di coiats.
◆ In plui dai doi nons ripuartâts parsore, in Friûl si cjatin tancj altris a testemoneance sedi de ricjece de lenghe intes sôs variantis, che di cemût che al vignive dât il non di une specie in consecuence di varis aspiets, par esempli ambientâi, ecologjics, biologjics, che a tocjin lis ativitâts dal om e, ancjemò, di cemût che i nons a puedin judâ inte comprension de realtât (che si viodi La Patrie di Otubar dal 2023 e di Novembar dal 2025). Par fâ cualchi esempli: “coiot da la cultura”, “crac”, “crec-crec”, “sgrasài”. Il prin non al derive dal fat che, cuant che si seave la “cultura” (ven a stâi il prin tai), si cjatave cheste specie (che e vîf in habitats caraterizâts des jerbis) cuntune frecuence alte parcè che si è tal periodi riprodutîf. Par chest si cjatavin ancje i nîts dulà che i uciei si fermin fin al ultin moment prin di scjampâ, par chest si viodin plui a facil. Il secont e il tierç non a son onomatopeics; l’ultin invezit al è simpri riferît al cjant ma cuntune acezion divierse, che al ven dal fat che il cjant dal coiat no si pues sigûr definî “melodiôs”, anzit, si pues considerâ displasevul a pet di chel dal mierli Turdus merula o dal franzel Fringilla coelebs. A proposit dal cjant dal coiat: al è tant potent che si rive a sintî a chilometris di distance: in periodi riprodutîf, il mascjo al pues emetilu di un continui par oris. Chest, dutun cul fat che il cjant al è produsût massime vie pe gnot, al fâs definî il coiat tant che “l’uciel che ti ten sveât di gnot”: provait a domandâ a cui che ancjemò al vîf sù pes monts e che al à vût la esperience di vê un mascjo che al cjante sot il barcon de cjamare.
◆ La specie e je considerade di alte prioritât conservazionistiche in grande part dal so areâl. Inte Europe ocidentâl e je lade incuintri a un declin progressîf par vie di un insiemi di fatôrs che a àn agjît sedi a nivel locâl che globâl.
◆ Par podê fâ lis sieltis gjestionâls justis ai fins conservatîfs, al è fondamentâl un monitorament costant e sprolungjât intal timp. Pal coiat, pûr jessint documentât cualchi trend plurianuâl a nivel di arc alpin, i dâts che a cuvierzin lis stessis areis par periodis pluridecenâi a son une vore limitâts. Pal Friûl al esist un numar consistent di dâts consecuent a un monitorament pluridecenâl fat dal stes ricercjadôr (l’autôr dal articul) che al è il plui lunc in Italie e un dai plui luncs a nivel di dut l’areâl de specie.
◆ I dâts cjapâts sù in centenârs di jessudis vie pal dì e vie pe gnot a àn puartât ae publicazion di diviers contribûts sientifics e, di resint, ae publicazion di doi articui che a àn tratât inte maniere plui complete pussibile la interece de cognossince che si à chenti sul coiat, evidenziant ancje menacis e misuris di conservazion.
◆ La specie e rive in Friûl tal mês di Avrîl dopo vê passât l’Invier in Afriche, lant a ocupâ prâts e passons dulà che, daspò, si riprodûs. I ultins individuis in migrazion di Atom a son stâts viodûts a metât Novembar.
◆ Fra lis menacis che a agjissin a nivel globâl e che a son stadis segnaladis ancje in Friûl a son la variazion di une agriculture di fate tradizionâl (cun falcet e ristiel) a une mecanizade a fuart, il bandon dai prâts (pal mudament socioculturâl) cu lis dinamichis consecuentis di riconcuiste de bande di sterps e arbui, la urbanizazion (ven a stâi il consum di teren e distruzion dal habitat) e il cambiament dal clime (che al agjìs ancje su timps e mûts de gjestion agronomiche).
◆ Il fat che la specie e fasi i nîts tai prâts al è un dai fatôrs limitants plui grancj. Di fat tantis nidiadis e ancje adults a son copâts vie pes operazions agriculis che, cun di plui, a son intensificadis in gracie dal clime che al permet un anticip dal prin tai de jerbe e un aument tal numar dai tais. Par di plui, cuant che il tai al jere cul falcet o cun piçulis machinis di seâ, i contadins a vevin il timp di viodi se a jerin nîts e covadis e, tal prin câs, a lassavin di seâ un tocut o, tal secont, si fermavin fin che la covade e scjampave; cumò “a cjaval” di machinaris di dimensions une vore grandis no esistin chês pussibilitâts. Al è clâr che no si pues tornâ a seâ cul falcet (a part in lûcs e situazions particolârs) ma a esistin cautelis par diminuî la pussibilitât di copâ i animâi (ducj chei che a son tai prâts, no nome il coiat): al bastarès metilis adun, massime in presince di contribûts publics che, aromai, ducj i contadins a cjapin par seâ.
◆ La nidificazion tes campagnis dongje dai paîs e puarte cun se l’aument de mortalitât dovude ae predazion di bande di gjats e cjans, cheste ultime ancje parcè che in varis câs lis areis di adestrament e alenament dai cjans individuadis des Risiervis di cjace a son in comprensoris che a coincidin cun lis miôr areis riprodutivis dal coiat in Friûl.
◆ Un fatôr daûr a cressi di resint al è ancje il passon con grancj trops, massime di pioris, ma ancje di cjavris in zonis idoniis ae specie in periodi riprodutîf.
◆ Ducj chescj fatôrs, dutun cun altris no ripuartâts par fâle curte, a àn incidût a fuart sul coiat. I dâts cjapâts sù in dibot cuarante agns a àn mostrât une diminuzion une vore fuarte de specie, massime dal 2013 indenant, che e à puartât ae sô sparizion in diviersis areis dulà che un timp e jere comune e, intal totâl des areis dulà che un timp si contavin ancje 50 e passe mascjos, intai ultins agns a son stâts contâts ancje nome 2-3.
◆ Pûr jessint une specie tutelade su la cjarte (e je inseride te Zonte I de Diretive de Union Europeane 2009/147/CE che e tocje la conservazion dai uciei salvadis tant che speciis a prioritât di tutele), par solit lis misuris di conservazion par contrastâ i impats no son metudis in vore o a son aplicadis in mût pôc incisîf. Par cualchi categorie di impat (par es. cjans libars di lâ ator pardut e passons in periodi riprodutîf) al coventarès nome un piçul sfuarç. Par altris al bisugnarès intervignî in mût plui organic ma, cemût che al sucêt simpri, in mancjance di cognossince e di volontât ancje ce che si podarès risolvi al devente un probleme.
◆ Tes desenis di agns di studi e je stade verificade une progressive espansion urbane e infrastruturâl che intai câs des zonis industriâls di Damâr e Vile di Cjargne e je rivade ae sô espression plui grande. Chestis a son dôs fra lis areis di fonts de val miôr de Italie e des Alps pal coiat, o miôr, chê di Damâr e jere, stant che e je stade ocupade par buine part de aree che un timp e jere agricule. Ancje il câs di Tumieç al è emblematic: li al jere un habitat di grande idoneitât ma la urbanizazion intal timp lu à fiscât tant che l’ultin insediament de specie al è stât verificât tal 1992.
◆ Il mantigniment des areis rurâls in particolâr tai fonts di val al è un fatôr fondamentâl pe conservazion de biodiversitât, pes ativitâts leadis al mont agricul, pal turisim, pes ativitâts culturâls e v.i. e il consum di teren al è une des plaiis che e va combatude e fermade il prin pussibil, cemût che al è stât evidenziât plui voltis (v. par es. La Patrie di Jugn dal 2022 e di Març dal 2025). Invezit, la tindince a urbanizâ ancje cun abitazions monofamiliârs che a ocupin tant spazi, pûr in presince in mont di une fuarte diminuzion de popolazion e di tantis cjasis vueidis, e je costante.
◆ Al bisugne pensâ, però, che il coiat al è une “specie ombrene”, stant che se si protêç il so habitat, si protêç ancje l’habitat di tantis altris speciis. Par solit cun “altris speciis” si intindin uciei, anfibis e v.i., duncje al è clâr che se si rive a protezi chel pôc che al è restât, massime in ciertis zonis, di campagnis di fonts di val, si protêç ancje la pussibilitât dal om di vivi intun ambient che al pues dâ tantis pussibilitâts in plui che no intun ambient dal dut cimentificât. ❚