Ce scoltâ e ce viodi intai gnûfs programs Rai

L’an a pene passât al à puartât finalmentri a une convenzion di significât pe valorizazion de lenghe furlane inte ufierte radiotelevisive de Rai. Tant che dal prin di Otubar dal 2020 e fin al mês di Avrîl di chest an, a son stadis aumentadis lis programazions, cun trente oris di trasmissions tv su Rai3 bis, e rinfuarçade la produzion radio che e passe di 90 a 120 oris. Si spere che la convenzion si puedi rinovâ e ampliâ ben plui di ce che si sta fasint. Pal moment, alc al è miôr di nuie, e si spere di podê assisti, in plui che ae trasmission di cartons animâts dopleâts in furlan (dal sigûr utile pe promozion de lenghe ai fruts), ancje a programs di altri gjenar: atualitât, formazion, politiche, culture. Culture soredut, e in chest sens si spere e si invide a considerâ la utilitât che e pues vê la realizazion di trasmissions dedicadis ae musiche, teme centrâl di cheste rubriche.
◆ Musiche di tradizion, folclôr, moderne, contemporanie, spaziant tra ducj i gjenars, par une sorte di storie de musiche furlane a pontadis, cun ospits artiscj di varie estrazion, e documents audio e video di archivi, par presentazion di discs, videos, progjets, dibatits tra apassionâts e esperts, operadôrs culturâi in ambit musicâl, diretôrs artistics di festivai, rassegnis, sagjiscj, musicolics, musiciscj, diretôrs, intune largje viodude di propuestis.
◆ Un mût par dâ concretece aes nestris specialitâts e pandilis par fâlis ben cognossi a ducj i furlans e di là dai nestris confins, in Italie e tal forest. Une ocasion utile ancje par vierzi gnûfs ambits di ricercje e par sburtâ il lavôr di rivalutazion des nestris specialitâts musicâls storichis, come la vilote e il bal la furlane che in tai ultins timps a stan vivint une sorte di rinassite, tra passât e presint, cun riproposizions des formis tradizionâls e propuestis inovativis tal ambit des gnovis musichis e sperimentazions tra gjenars diferents.
◆ O savìn ben che la musiche e ten dentri une varietât di altris dissiplinis, tant che la leterature, la poesie, e tal ambit dal visuâl e fâs part dal cine, dai documentaris, dai videos musicâi, e duncje e tire dentri la imagjin, lis secuencis, la art performative. Come che al diseve Isidoro di Siviglia: «cence la musiche, nissune dissipline e pues considerâsi perfete. Nol esist di fat nuie cence di jê». E alore, se o metìn la musiche tra lis prioritâts de comunicazion radiotelevisive a pro de nestre lenghe e de nestre culture, a confont cun chês altris, sedi minoritariis che maioritariis, alore o rivìn a coinvolzi tantis formis espressivis, e a favorî il dialic metint insiemi lis gjenerazions, cence lassâ fûr nissun, e favorint la trasversalitât. ❚
A.S.