Di inovâi musicâi in chest an 2021 o ‘nt vin cetancj, cun protagonistis diviersis personalitâts de storie de musiche furlane tra compositôrs, musiciscj, diretôrs di côr, fatôrs di orghins e altris struments musicâi, animadôrs culturâi. Une liste lungje di bielis personis, furlanis o che a àn operât in Friûl e che a àn dât dut ae musiche, pandìnle inte nestre tiere e tal forest. Int di significât, no une liste frede di nons e cognons di personis che a son muartis e vonde. A son ladis sì, ma soredut a restin, inte nestre storie, tant che esemplis di talent, volontât altruistiche di fâ, creâ, coinvolzi e slargjâ la musiche e dut ce che la musiche e cjape dentri, sot variis declinazions.
◆ Dal Cinccent al Nûfcent o ai contât trentevot di chestis personalitâts, duncje chescj si ju festeze, daûr di une cifre di sens, sot de tabeline dal cinc o dal dîs, par aniversaris di nassite e di muart.
◆ Cence stâ a ricuardâju ducj, o varìn mût dilunc dal an di aprofondî la esperience artistiche di diviersis di chestis figuris. Il prin in ordin di date al è Vittore Raimondi, un om di glesie, mestri di capele e compositôr di origjins trevisanis che tal 1577 al rive a Udin par cuvierzi il rûl di mestri di capele de Catedrâl di S. M. Anunziade, un incaric che, a part une piçule polse, al tignarà fin ae muart. A Udin al à ancje publicât il so prin, e si pense unic, libri di Messis. Par lui chest an a son i 425 agns de muart. 420 invezit par Girolamo Dalla Casa, udinês mestri tal sunâ struments a flât, autôr dal metodi “Il vero modo di diminuir, con tutte le sorti di stromenti” e di variis composizions, tra motets, madrigâi e tante musiche strumentâl, clamât ancje ae Cort di Munic e a Vignesie, indulà che al murarà tal 1601.
◆ Par so fradi invezit, sunadôr di trombon, a son i 480 da nassite. Par sierâ cul Cinccent, il plui impuartant e cognossût al è dal sigûr Alessandro Orologio, orloiâr par tradizion familiâr, responsabil ancje dal funzionament dal orloi di Place Libertât di Udin, ma soredut compositôr stimât, autôr di madrigâi, cjançonetis a trê vôs, jentradis, musiche sacre. Un che al è stât ancje inte Cort dal imperadôr Ridolf II a Praghe, presint inte liste dai musiciscj di cort, fin che al è deventât vice mestri. Par lui si contin i 470 de nassite.
◆ Jentrìn tal Sîscent par cjatâ Lazzaro Girolamo Valvasense, a 360 agns de muart. Al à vivût a Voleson, lavorant ancje a Glemone, Sacîl, Maran, Tumieç, Tresesin e Cjaurlis. Organist ricercjât e mestri di capele, si pense che al vedi scrit tante musiche, come che si intuìs leìnt lis cronichis, ma no dut nus è rivât e ce che al reste al è preziôs, tra libris di concierts eclesiastics, litaniis, messis, sinfoniis e cjançons, musiche di fature rafinade.
◆ Mantoan che al à operât tant che organist a Tumieç, tra il 1604 e il 1609, e daspò fin al 1623 cirche inte glesie di Sant Andree a Puart, al è Giovanni Bisighino, predi, organist e mestri di côr nassût tal 1631, duncje par lui a son 390 agns de muart.
◆ Il Sietcent nus presente il stimât violoncelist, contrabassist e compositôr udinês Francesco Alessio, tai 260 agns de muart. Musicist de capele dal domo e amì dal mestri Bartolomeo Cordans, al à lavorât ancje a Parme li dal princip Carlo Borbone Farnese che lu tignive in grande considerazion. Dal venezian Girolamo Pera a colin i 250 agns de muart: predi, organist virtuôs a Udin, Concuardie e Puart, indulà che al è stât, tra l’altri, chel che al à sburtât di plui par convinci a comprâ un orghin gnûf, il Callido che al è inte glesie di San Andree.
◆ A son 235 agns de muart di Angelo Morassi, l’organâr di Çurçuvint che al à lavorât tant in Cjargne, comedant, tornant a fâ, restaurant, realizant struments tal paîs di nassince, a Pesariis, Trep, Feagne, Voleson, Triest, Mortean. 245 de muart pal coleghe, e predi, Giacomo Selenati, che al à pandude la sô bravure di artesan a Sudri, Paluce, Zui.
◆ Compositôr famôs di Palme al è Alessandro Pietro Pavona, muart 235 agns fa. Arlêf cun buine probabilitât dal Cordans, al à scrit tante musiche sacre e operât a Udin, Cividât, Padue, Grau, Tumieç.
◆ Lant tal Votcent, si contin 270 agns de nassite di Francesco Antonio Dacci, organâr venezian che al à lavorât ancje in societât cul coleghe furlan Francesco Comelli. Dacci al à lassât diviersis catedrâls sunantis di cualitât mirabile intes glesiis furlanis, come a Codroip, Felet, Durlasse, Mortean. Di Davaste al è l’organâr Pietro Antonio De Corte, ai 155 da muart, e tocjant il Nûfcent a saltin fûr doi nons famôs, ai 90 agns de muart: il mestri e compositôr Domenico Montico, diretôr de bande e de scuele comunâl di musiche di Udin, autôr cognossût soredut pal teatri, e l’organist e compositôr cecilian di Mueç Vittorio Franz. 140 de nassite e 65 de muart par Carlo Conti, miedi e musicist, e par sierâ no si pues no nomenâ il compositôr e diretôr nassût a Pula in Cravuazie e muart a Buenos Aires in Argjentine, Rodolfo Kubik, un dai massims rapresentants da coralitât furlane, ai 120 agns de nassite. ❚
Apontament / Presentazion dal libri “Patriarcjis tal cûr de Europe” e dal mensîl “La Patrie dal Friûl”
Redazion
Presentazion dal libri “Patriarcjis tal cûr de Europe” di Diego Navarria e dal mensîl “La Patrie dal Friûl”, l’unic dut in lenghe furlane dal 1946. Ai 26 di Zenâr aes sîs sot sere (18.00) te Biblioteche comunâl di Reane dal Roiâl, vie Battaglione Julio 7 – Remugnan. A saran presints: Anna Zossi, Assessore ae Culture […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +
Int di Cjargne / “La gallinella saggia” che a Cjavaç e insegne a produsi e a mangjâ ben
Marta Vezzi
La aziende agricule biologjiche La Gallinella Saggia e je nassude 7-8 agns indaûr: “La idee e je stade di mê mari – e conte Caterina Pillinini – che e à simpri fat orts e cjamps, e duncje e je une vite che si dediche ae coltivazions di tancj prodots; vint il ristorant Borgo Poscolle e […] lei di plui +
Sport… che ti trai! / Pietro Corredig e Sonia Borghese: une vite di pignatis a scufiots
servizis di Francesco Tonizzo
La cubie dai cjanalots, un di San Pieri e une di Miers, e à vinçût il campionât talian di machinis storichis e il titul european, simpri cun Sanremo intal destin Inzen, passion, amôr, dedizion, voie di zirâ il mont, spirt competitîf, leam cun il teritori des Vals dal Nadison, e risultâts une vore preseâts. Il […] lei di plui +
L’EDITORIÂL / La identitât e ven dai zovins
Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +