CE FÂ? Il “truc” a Cividât

Apontament cu la tradizion a Cividât a Pasche e tal lunis di Pasche, cuant che placis e borcs de citât langobarde si animaran graciis al zûc dal “truc”, che al plâs a piçui e grancj. E je une tradizion ludiche, di pratiche tant antighe, che e consist intal prontâ un cjadin di savalon che al cale a struture ovâl là che si fasin lâ jù, rispietant regulis ben precisis, ûfs colorâts cul intindiment di fâju tocjâ tra di lôr (il vocabul “truc” al è onomatopeic, al riclame il rumôr di ogjets che si tocjin, a trussin, si sburtin tra di lôr). L’ûs dal ûf al à un significât impuartant, viodût che al rapresente la rinassite e al è un simbul di Pasche par ecelence.
Il “truc” al è un zûc esclusîf di Cividât e si pratiche in maniere rigorose dome intes zornadis di Pasche e lunis di Pasche, che chest an a colin il prin e ai 2 di Avrîl, la matine, des 10 e mieze a misdì e mieç, e tal dopomisdì, des 3 fin al tramont in place Pauli Diacun, in place Forum Juli Cesar e in place Dante; des 2 dopomisdì al crepuscul ancje a Grupignan li de vecje scuelute. Ai 31 di Març, des 10 di matine, in place Forum Juli Cesar si podarà imparâ a costruî il “truc”, lis regulis dal zûc e a colorâ i ûfs. Plui informazions al numar 0432/732401.