O fevelìn de jentrade de Cravuazie in UE cun Paolo Petiziol, consul onorari de Republiche Ceche. Grant espert dai paîs de Europe di Soreli Jevât, al à ricevût di resint il premi “Jan Masaryk Gratias Agit”, destinât a chei che a àn puartât lustri al non de Republiche Ceche tal mont. Fra chei che lu àn ricevût, a son Madeleine Albright, l’industriâl Tomáš Baťa, il regjist Miloš Forman.
I fâs une domande sul premi che i àn dât di resint: ce emozion ise stade?
Cun dute la ativitât che o ai fat in chescj agns, dut câs no mi spietavi propit chest ricognossiment. Al à di pensâ che lis candidaturis a vegnin tiradis sù di dutis lis ambassadis dai Paîs dal mont, segnalant personis che si son distintis par promovi la imagjin de Republiche Ceche e par miorâ la amicizie dai popui, int che no à par fuarce di vê la citadinance ceche. Duncje si capìs trops profîi che la comission dal Ministeri dai Afârs Forescj e à di viodi. Il fat di jessi stât chest an fra i 13 che a àn ricevût il premi mi à jemplât di braùre.
Al di là dai fûcs di artifici a Zagabrie pe jentrade de Cravuazie te Union Europeane, tancj a àn fevelât di cheste adesion come “une fieste cence entusiasim”. Chest par vie dai problemis dal paîs: 20% di disocupazion (chê dai zovins 50%), un pil sot de medie UE di uns 39%, devant dome a Romanie e Bulgarie, deficit masse alt cun za in vuaite la UE pe procedure di infrazion… Ma ancje pai problemis de UE, in recession ancje jê e cun tensions internis penzis. Ce convenience ise duncje pe Cravuazie tal jentrâ in Europe, e pe UE tal fâle jentrâ?
A mi mi plâs fevelâ fûr dai dincj e i dîs subite che o jeri a Flum domenie: sì, a jerin bandieris picjadis pardut, de Europe, de Cravuazie, di Flum… Biel, ma te int no ai viodude nissune partecipazion.
Pe convenience. La rispueste no je bielone, ma e je dome une: no vin alternativis. Ancje parcè che la Gjermanie aromai e sta tornant a cjapâ il so rûl storic di vuide de Europe. Un rûl simpri vût: e à sbaliât a vê fat lis vueris e massime a pierdilis. Duncje, se no volìn un “Cuart Reich” direzût diretementri di Berlin, o vin di fâ la Europe dai popui e diluî la sô influence zontant gnûfs paîs. Ancje pe Cravuazie, nocate il scjars entusiasim e i sacrificis che e à scugnût fâ, la rispueste e je compagne: no jerin gruessis alternativis.
Il referendum cravuat pe jentrade al à vût il 66% di sì, ma al à votât dome il 44% di chei che a podevin fâlu. Cemût mai? Ise une fredece par chest vôt o ise la stesse fredece pal vôt che e je ator pe Europe, come se e fos une crisi dal sisteme democratic?
Purtrop jo le viôt propit tant che une crisi gjenerâl de democrazie. No si rive plui a fâ saltâ fûr lis ecelencis. La maiorance aromai e je la rapresentazion de mediocritât. Come intune curve di Gauss: il miôr e il piês – che a son la minorance – a son cjâf e code; tal mieç li che je la maiorance, al è il mezan, il grîs, il mediocri.
La Cravuazie no je ancjemò ni tal euro ni tal acuardi di Shengen pe libare circolazion des personis: cuant chescj passaçs?
Si fevele di doi agns par Schengen, duncje tal 2015. Pal euro, jo o pensi che cun chei clârs di lune che a son, il procès al sarà plui prudent.
Intant il stât talian si prepare ben al slargjament al Est: nuie bêçs pe A4, e invezit 90 milions di euros pal impuartant as internazionâl de A19 Agrigento-Caltanissetta… Pal rest, cemût si staial compuartant?
Il probleme dal stât talian al è che nol à plui bêçs e al tapone cualchi buse ca, cualchidune là, massime al Sud, li che la situazion de ocupazion e je plui grivie. Ma la A4 e je un problemon, e jo lu ai dit ae Serracchiani che mi somee che lu vedi ben presint, sperìn… La A4 e je un probleme de Europe! Savêso a Budapest, Viene, Praghe, in trops che mi disin che cumò par dute la Europe dal Est a son fatis lis autostradis, e dopo si rive ca e si cjatisi devant di un cuel di butilie. Aromai o ai pôre a lâ a ciertis cunvignis par vie di vê di rispuindi a domandis che al è miôr che o stedi cidin… Al covente risolvi il probleme, e nol è nancje pussibil che jo o vedi di paiâ un pedaç penç e injust par finanziâ une robe che e covente a dute la Europe.
Ce cjartis puedial zuiâsi il Friûl?
Jo o dîs simpri che il Friûl al è une des plateformis logjistichis naturâls de Europe, e che al bisugne dome colegâlu a chês altris par fâi vê chel rûl che i spiete par vocazion. Visìnsi che i periodis di plui bon stâ ju vin vûts cuant che no vin vût confins. Jo o soi preocupât di une robe: mi risulte che la Serracchiani e sedi lade a Zagabrie pes celebrazions, invidade di Napolitano, no dal guvier cravuat. Chest al è cetant grâf: purtrop il Friûl nol rive a vê credibilitât internazionâl parcè che no vin i oms par fâlu. Nissun i crôt o al à voie: la politiche dal forest no puarte vôts. Chest al è grâf parcè che il Friûl si podarès salvâ propit cun chê, invezit! O jeri cualchi dì fa a une cunvigne economiche li che si diseve che in Friûl a stan lant ben dome lis impresis che a espuartin: duncje viodial?
Paul Stubbs, dal Institute of Economics di Zagabrie al dîs che in Europe al è un nucli fuart e une perifarie une vore debile. Isal pardabon cussì? Cemût ise la salût de istituzion Unitât Europeane?
Eh, magari cussì no, al è ancje masse clâr che al è cussì… Il pont al è che o vin pierdût i ideâi di fonde de unitât, chei di Adenauer, tant par fâ un non di un dai grancj paris di cheste idee. Za tal 1919, al fevelave di unitât dai popui e no di nazions, di minorancis, di dirits de int. Il probleme al è che – unic câs te storie dal mont – prime si è fate la unitât de monede e o stin spietant ancjemò une plene unitât politiche. Duncje e comande la economie, che no à sintiments – e nancje risintiments, par dîle dute – e no pense ae coesion sociâl, ai dirits dai plui debii, parcè che no ju à tes sôs cuardis. A chestis robis i à di pensâi la politiche. Cui varessial dit, tal Març dal 1957, li che a jerin 33 stâts europeans (metude dentri ancje la Gjermanie Est), che 50 agns dopo a ‘nd saressin stâts 45 come cumò? Par me al è clâr, e o batarai simpri chest claut, che la strade e je chê de Europe dai popui, no de Europe de economie, de misure des bananis, de circonference dai ûfs, come che e je cumò. Si puartìn daûr chest probleme, che bisugnarà meti man.
La Cravuazie e à grues problemis di coruzion, metât dal guvier di prime al è indagât. Si dîs che al sedi un probleme comun tai paîs dal ex bloc sovietic: cemût mai, e ise une soluzion?
Nol è probleme di ex bloc, dut il mont al è paîs, baste viodi in cjase nestre. Anzit, o ai di dî che in gjenerâl tal Est, e ancje i amîs cravuats, a àn coraç di indagâ par coruzion un ex president cence tancj fastidis.
Si fevele di altris Paîs dal Est che a podaressin jentrâ te UE, tant che la Ucraine o altris de aree balcaniche. Isal il câs di lâ indevant cul procès o nol saressial miôr fermâ un moment par consolidâlu?
Come che si diseve prime, al è un procès inevitabil che al sarès plui biel inmò se al ves presint i vêrs valôrs de sô fonde. Al covente lâ indevant, cence acelerazions, ma ancje cence mai frenâ: al à di jessi un percors naturâl.
La Cechie, cemût? E ce pensino de Union Europeane cumò che son dentri di cuasi 10 agns (2004)?
Il popul cec al à la profonditât culturâl par capî, al di là de crisi, che la Europe e je une robe impuartante, ma te stesse maniere par vê ben presint che e à chei problemis che si diseve parsore. ❚
✒ Dree Venier
(L)Int Autonomiste / Al esam di maturitât cu lis dispensis sul nestri sît
Dree Valcic
✽✽ E je une grande buse intal percors che planc a planc al è daûr a fâ l’insegnament de lenghe furlane inte scuele. Plui che une buse o podaressin definîlu un gorc che al va a pericul di gloti ducj chei si movin in chest setôr fondamentâl de nestre culture identitarie.✽✽ Si cjatìn di fat […] lei di plui +
L'Editoriâl / Risierve di valôr
Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +
Salon Internazionâl dal Libri di Turin 2023
Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +
COROT. Nus à lassâts Sergio Salvi
Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +
Vuê al è il 3 di Avrîl, si fâs la Fieste de Patrie. Fûr la bandiere dal Friûl! Mandi a ducj i furlans! Buine Fieste de Patrie!
............
Chest an si davuelç ai 16 dal mês la celebrazion che e memoree l’inovâl dai 946 agns de nassite dal Stât Patriarcjâl 3 di Avrîl dal 1077: une date fondamentâl pe origjin de nestre identitât di popul furlan, dal moment che propit cheste zornade e je considerade in maniere uficiâl tant che chê de nassite […] lei di plui +
Glesie Furlane / Grop amîs di pre Toni. Program dai events pal 2023
1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +