Sfuei Mensîl Furlan Indipendent
Archivi de Patrie

BASTIANCONTRARIE. STORIE FURLANE AL FEMININ. Giulia da Ponte, “La Bella” di Tiziano te gloriose Academie di Spilimberc

............

Figure straordenarie de nestre Patrie, Giulia da Ponte e fo amade dai plui grancj mestris, pitôrs e poetis dal so timp. Tiziano in persone al à volut rindile eterne intun cuadri – cognossût tant che “La Bella” – che si pues ancjemò viodilu inte galarie di art di Palaç Pitti, a Firenze. De suaze preziose che lu conserve, tant che un lamp di lûs, e ven fûr dute le magnificence dai colôrs, une muse nobile e tal stes timp delicade, si disarès cuasi une principesse ancjemò fantaçute, ma une vore sensuâl e cjapade jenfri i nûi di un sium, cun doi voi slusints che nus cjalin, a distance di secui, cun chê stesse intensitât che cheste bielece frescje e spontanie e regalave ae imagjinazion dal grant pitôr, inmagantlu e cjapantlu dentri in chê maravee. I siei vistîts a son insiorâts di golainis e di rosis, i cjavei racuelts intune ande che e met in evidence la forme perfete di une muse delicade, il cuel lunc e di ciere clare, lis mans delicadis. I vistîts a contin la sioretât dal puartament e la impuartance de sô cundizion sociâl.

Ancje il famôs om di culture Pietro Bembo – che al fo il prin grant teoric de “volgar lingua”, ricognossût tant che un dai plui grancj autôrs dal Cinccent – ai 25 di Jugn dal 1538 i mandave une letare là che al esprimeve, intun stîl cetant rafinât e poetic, dute la fuarce di un Amôr che lu veve impresonât, fevelant su la sô “così bella e così leggiadra giovanezza”. Amì di famee, al podeve permetisi cualchi sbelançament, come cuant che al ringracie cun dut il cûr la biele Giulia par vêi mandât un caratel di vin di Spilimberc, scherçant sul fat che il regâl al podeve jessi ancje un tic plui gjenerôs, viodude la bontât dal so contignût.

Tal 1556, Bona Sforza, la regjine de Polonie che e fo ospitade intal cjistiel di Spilimberc intant che e jere in viaç par Rome, e volè premiâ la biele Giulia cul titul di “Cavalîr”, un fat unic e straordenari, dal moment che une onorificence dal gjenar e jere dade dome ai mascjos, i protagoniscj assolûts di chê societât patriarcjâl e cetant misogjine che e assegnave aes feminis, ancje a di chês di un ciert nivel, une posizion di sigûr platade e secondarie. Si viôt che la nestre Giulia e veve une vore ce dî e ce dimostrâ, par vuadagnâsi tante buinegracie.

No savìn cun precision la date che e je nassude, ma salacor si pues colocâle intai agns vincj dal secul XVI. La sô e jere une famee une vore siore di marcjadants di Vignesie, i Cavazza Barbarigo. Il pari, Gian Paolo, al sperave di podê fâ cariere leterarie: apassionât di libris, al podeve svantâ une biblioteche di cjase cetant siore par chei agns, pe plui part oparis di poesie e di prose. Intes stanziis plui scuindudis de sô cjase fuartece, al conservave ancje une biele racuelte di cuadris, ducj di buine fature e firmâts dai plui grancj mestris dal so timp. In chest ambient, tant plen di emozions e di solecitazions, Giulia e podè formâsi, afinant la sô anime e la sô sensibilitât intun spieli di bielece e di rafinatece. Cussì, si sgarzave simpri di plui inte art, inte leterature, ma ancje inte musiche, dal moment che e jere buine di sunâ il liût cjareçant lis sôs cuardis cun sensualitât e armonie.

E jere ancjemò tant zovine, pôc plui di une frutine, cuant che Adrian di Spilimberc le maridave, puartantle cun se in Friûl par viodi plui di dongje dai siei interès peâts ae produzion agricule. E propit intal cjistiel di Spilimberc, Giulia e deventave mari di Irene, destinade a jessi une des poetessis plui grandis e ricognossudis dal Rinassiment european. E di sigûr, cence une mari come la sô, Irene no varès cjatade chê inclinazion straordenarie che dome intune suaze cussì e podeve vê il miôr mût di pandisi. Si à di dî che il cont Adrian al fo inmagât par dute la sô vite di cheste nuvice che al veve puartât sul altâr tant zovine e biele, rivant a lei jenfri lis pleis de sô anime chê gracie e chê rafinatece che no si cjatavin cussì facilmentri ator pal mont. Cussì, par stimolâ lis sôs inclinazions leterariis, al fasè di Spilimberc une cort là che si cjatave la miôr inteligjence dal moment. Sostignintle cun grande convinzion, al domandave adiriture a Bernardino Partenio di fâle jentrâ inte sô gloriose e preseade Academie, là che al jere une vore dificil jessi ametûts. Restade vedue tal 1541, cun trê fiis di protezi e di mantignî, Giulia si maridave cul fradi di Adrian. Di jê, nus reste une piçule racuelte epistolâr, che e baste par disvelâ un cûr zentîl e sclet, une anime buine di vê traviersade la sô vite cun discrezion e premure. ❚

Agnul Floramo

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +