Sfuei Mensîl Furlan Indipendent
Archivi de Patrie

ZÂL PAR FURLAN. 6. Delit in vie del Lavoro

............

La realtât e je che cuant che o soi lât vie de CAMIN (o, miôr, cuant che mi àn parât vie), mi jeri imprometût di no savê plui nuie dai Renturins o de lôr dite. E pûr, il lavôr mi plaseve.

Mi plaseve lâ ator pai capanons des grandis industriis de zone, cjacarâ cui responsabii mecanics, capî i problemis e cirî di risolviju. Mighe robonis: une pedane par lavorâ miôr, une rampe di meti in sigurece, une bandinele che e tremave e e faseve rumôr, cambiâ lis cenglis di trasmission di un machinari grant come chei dulà che al finive dentri Chaplin. Jo o rivavi cul gno carelut cun dentri i imprescj ben ordenâts ognidun tal so casselin, l’invidadôr, il tasseladôr, la flex grande e chê piçule, e dut ce che al coventave. Se al jere un lavôr facil, o jeri di bessôl, se no o passavi i imprescj a Meni, il coleghe che al gjestive ducj i lavôrs di manutenzion che la CAMIN e veve in apalt. A jerin setemanis che o lavoravi dome fûr, e altris che o vevi di stâ tal capanon di vie “del Lavoro” par fâ cualchi toc. Alì, midiant de lauree, disìn cussì, o jeri autorizât a doprâ mulet e grue su carel, e varis machinaris par pleâ e par taiâ il fier. E, clâr, la saldadore a fîl che o vevi imparât a doprâ di bessôl, juste cun dôs dretis che mi veve dât Kosim.

Une volte, il capanon al jere il ream di Saverio, il pari-paron di dut e di ducj. Lui al jere tornât da Svuizare dopo dal taramot e al veve vierte la “Fratelli Renturini”, che daspò e jere deventade “Renturini e figlio”, che daspò e jere deventade la CAMIN. Saverio al jere partît pe Svuizare cul diplomi de scuele di inviament e voie di fâ, e il paron di là lu veve cjapât in simpatie, mandantlu la sere a studiâ di perît industriâl. Daspò, al jere tornât culì nasant il bum de ricostruzion. Al faseve machinaris pe gruesse industrie, robe piçule che e risolveve grancj problemis. No cuissà ce, ma che e funzionave cence rompisi. Dal rest, lis fabricutis furlanis a jerin vincj agns indaûr in confront di chês svuizaris dulà che Saverio al veve imparât il mistîr, e lui, che al jere un om plui pratic che creatîf, al podeve insegnâ a di ducj. Par vincj agns al veve lavorât tant che une bestie, slargjant il capanon e cjolint machinaris. Lui al veve tacât a tirâ dentri i prins slâfs, di tant lavôr che al jere. Saverio al diseve simpri che Vedran al jere rivât che al taiave il fîl di fier batint cul martiel, parcè che nol jere bon di doprâ nancje lis tanaiis. Vedran, cuant che al sintive la storie al riduçave, ma nol diseve nuie parcè che, a lui, divuardi tocjâi Saverio!

Prin che al finìs il secul, dôs disgraciis i jerin capitadis al puar Saverio: e jere finide la ricostruzion, e a vevin tacât a zirâ i maledets ordenadôrs. A cincuantevot agns, Saverio al veve tacât a jessi vecjo. Il capanon lu mandave indenant simpri lui, ma so fi Pieri, lassant a mieç un cors universitari in inzegnarie che al veve volût plui so pari che no lui, al veve tacât a cumbinâ un apalt culì, une comesse culà, daûr logjichis che lui al stentave a capî. Saverio, par dînt une, nol capive parcè che lis grandis ditis a stavin tacant a parâ fûr dute la manutenzion. Mecanics formâts par agns, che a cognossevin ogni bulon dal stabiliment, mandâts in pension o demansionâts, par daspò apaltâ dut fûr. E Pieri, su chei apalts si butave tant che un falchet, e tal zîr di une desene di agns al jere cambiât dut.

Cheste e jere la CAMIN cuant che mi àn cjolt a vore. E cumò, daspò agns, e jere rivade la ore di tornâ a dâ un cuc là vie. Magari pensant a chês bielis frasis che a zirin su Facebook sul passât che al torne.

(6, al va indevant)

Igor Londero

Int di Cjargne / Magjie a Cjarsovalas

Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +

L’Editoriâl / Cuant vignaraie la “adunade” dai furlans?

Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +

Festival di Poesie Alpine / Autôrs di Ladinie, Grisons e Friûl a confront

Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +