ATUALITÂT – Voie di tornâ

La storie di Plodn/Sapade fintremai al 1852 e je peade a strent cul Friûl e propit in virtût di chest leam i Sapadins no àn mai acetât dal dut il passaç al Venit. Un prin tentatîf, lât a clâr, di tornâ cul Friûl al puarte la date dal 1966: il referendum fat tes fameis al contave il 98% a pro di cheste propueste. La politiche e reste sorde ancje a une gnove bataie inviade tai agns Setante.
Lis resons di cheste sielte dai Sapadins a son no dome storichis, ma ancje culturâls e afetivis: la variant dialetâl sapadine e je un grum dongje al Tamavuês e al Sauran (Tamau e Sauris: isulis linguistichis di riunde todescje dal Friûl), inmò vuê Sapade e fâs part de Arcidiocesi di Udin, lis societâts sportivis sapadinis a son dutis iscritis tai comitâts furlans, plui part dai contats de int a cjalin viers la valade dal Dean e al Friûl pluitost che al Venit.
Il timp al passe e la voie di Friûl e cres, al nas un comitât che al met in vore la idee di inviâ un referendum costituzionâl seont i detâts dal ex articul 132 de Costituzion; il prin pas, tal 2007, la racuelte di firmis par inviâ il referendum che in doi dîs a ‘nt tire dongje ben 460 (60 in plui di chês proviodudis par un paîs di 1200 di lôr).
In gracie di chest tal 2008 i sapadins a son clamâts, cul Referendum, a meti neri su blanc la proprie posizion. La partecipazion straordinarie, tra i 1199 cun dirit di vôt, e rive al 75,3%. La cronache e segne 860 pal Sì, 41 pal No, 1 schede nule e 1 blancje (SI 95% – NO 4,9%).
Tal 2009 il consei provinciâl di Udin al fâs bon un ordin dal dì dulà che si impegne a judâ dutis lis iniziativis che a tindin a fâ tornâ Sapade al Friûl.
A doi agns dal referendum ancje la provincie di Belun cuntun document e da mandât al President di fâ dut ce che al covente par podê meti in pratiche la volontât dai sapadins.
Al passe cualchi mês e i tocje al consei regjonâl dal Friûl-V. J. fâ buine une mozion a pro dal passaç di Sapade al Friûl.
Dongje di chescj ats, che di sigûr i dan un poc, al tocje di movi la politiche dai batons, chê che e decît e il Comitât si môf e al cjate tal senadôr Saro il jutori par puartâ il dissen di leç n. 1126 inte Prime Comission Afârs Costituzionâi dal Senât Talian. E je stade fate la prime discussion e po cumò dut al è fermât par vie che a son in spiete dal parê des regjons e une verifiche de coretece de sielte de procedure di leç ordenarie.
Celestino Vezzi