ATUALITÂT – Estroverso al fâs 5

Prin travuart impuartant pal concors internazionâl Estroverso: e tache di fat la cuinte edizion dal Premi di traduzion di oparis leterariis pe infanzie, ineditis in Italie, des lenghis de Europe dal Est, selezionadis an par an, al talian e al furlan. Lis lenghis sieltis par cheste edizion 2011 a son: il lituan, il sloven e l’ongjarês.
Tal proponi i autôrs si ten cont di chei contemporanis che a scrivin oparis par fruts e che a podaressin jessi interessants pal marcjât editoriâl talian, soredut se a àn vût ricognossiments e premis a nivel nazionâl e internazionâl.
Il tiermin pe presentazion dai lavôrs di traduzion al è fissât ai 30 di Novembar dal 2011.
A vignaran ricognossudis meritevulis, cuntun premi economic di 1.000,00 euros par ogni lenghe, lis traduzions rivadis dentri i tiermins e judicadis di une Zurie metude adun di pueste.
Il concors ESTroverso e je une iniziative pensade e poiade de Aministrazion Comunâl di Tavagnà vuidade dal Sindic Mario Pezzetta; e à vût ancje il patrocini di ents regjonâi impuartants come la Regjon F-VJ, la Universitât dal Friûl, la Provincie di Udin, la Associazion Linguestpress, la Agjenzie Regjonâl pe Lenghe Furlane (Arlef) e la Societât Filologjiche Furlane.
Par vê plui informazions cjalait sul sît internet comunâl www.comune.tavagnacco.ud.it (sezion PROGJETS)
REDAZION