ATUALITÂT – Sapade si sint furlane

Sapade/Plodn e à viert lis puartis e fraie de vierte dulà che la Societât Filologjiche Furlane si è sintude pardabon a cjase. La fieste e à vût un bon esit, ma nissun (uficialmentri) al à tocjât il cantin che di cualchi an al ten vive la comunitât, ven a stâi la gole di Friûl.
Cjacarant cui Sapadins e sucêt une robe particolâr: ducj ti pandin vulintîr la lôr idee, ma cuant che tu impiis il regjistradôr pôcs a àn gust di rindile publiche. Ti mandin dai “referendaris”: a son lôr i delegâts aes rispuestis.
Cualchi pinsîr però lu vin cjapât sù e al è in pratiche ce che e pense, dome cun cualchi sfumadure divierse, buine part de int che o vin vût mût di baratâ peraule.
I COMENTS DE INT_ La Gjeme par esempli e partìs di lontan e nus dîs che «La cuistion e je nassude inmò tal 1975 cuant che al è stât fat il prin referendum, za alore lis ativitâts, a part chês burocratichis a jerin viers il Friûl. Al è clâr che i sapadins a àn simpri tignût al Friûl, ducj le metin sul fatôr economic, alc al incidarà ancje chel; nô o sin achì isolâts tra dôs regjons a statût speciâl (Friûl e Trentin), la Austrie e à tancj privileçs plui di nô, ma la cuistion di fonde e je che ducj i rapuarts a son simpri stâts viers il Friûl: storie e culture. I leams cul dialet di Tamau, o vevin fintramai il stes predi che al vignive a funzionâ. Cumò ducj a àn dit di sì, e mancje la regjon dal Venit, dal Friûl lis rispuestis a son stadis positivis e i referendaris a pochin viers il sindic parcè che al varès di puartâ la cuestion in regjon par lâ indavant in parlament. La int no à molât: e ten simpri dûr».
Pe zovine Nicole, cun none di Tamau e basavons dal For e Davoatri, «Par chel che al ten aes resons storichis par sigûr Plodn e je peade a strent cul Friûl e cu la Cjargne, par chel che al rivuarde un passaç di regjon viodût tant che soluzion di ducj i problemis al è secont me un resonament un tichinin fat in presse, no pensi che e podarès jessi la soluzion imediade di dut. Chê che je la posizion di vuê di Sapade tal Venit e mudarès dal sigûr se e fos in Friûl: lis localitâts montanis in Friûl no son tantis come tal Venit e duncje plui pussibilitât di vê finanziaments. Vuê però dut al zire viers la Cjargne fintremai la nestre scuadre di balon; ancje nô zovins o vin diviers contats cui cjargnei».
LA POSIZION DAL SINDIC_ Il Sindic Alberto Graz al à lis ideis claris: «Al è palês che il Venit nol intint pierdi une localitât, ma al è ancje vêr che il so parê nol è determinant. Tai paîs passâts za in cheste situazion il vôt de regjon nol à mai vût un pês decisîf: viodarìn ce che al sucêt, ma o pensi che a coventin inmò un pâr di agns. Par chel che rivuarde la mê posizion disìn che il grop dai referendaris tun prin moment al à capît che il sindic al à di vê un rapuart istituzionâl, cumò invezit al poche, ancje justamentri, par vê rispuestis. Duncje mi ativarai viers la regjon parcè che chest al è il minim che i podìn domandâ come istituzion. Il sindic nol à podê te cuestion tal sens che se il referendum al valès mancul dal sindic nol coventave fâ il referendum. Tocje jessi clârs: secont il gno parê se il sindic al ves di dî dome une peraule sbaliade parcè imponude des istituzions al corarès il riscjo di ruvinâ il lavôr di tancj e alore bisugne che ognidun al mantegni la sô funzion. Al è sucedût ancje in altris localitâts (p.e. Cortine) cun chestis cuistions dulà che il sindic nol à mai cjapade posizion, al è lât indavant pe sô strade. No vin di dismenteâ che il sindic al è a timp…»
I REFERENDARIS NO MOLIN_ Fabrizio Piller Roner, dal comitât referendari, al spiete il parê dal Venit che cun ogni probabilitât al rivarà passât l’Istât «Pal moment o vin za il procediment di leç incancarât al Senât, a pene che la prime comission afârs costituzionâi e varà chest parê, e vierzarà la discussion de propueste di leç cence passâ in aule, duncje cuntune procedure plui svelte. Nô, tant che comitât, o vin esaurît il nestri compit, o vin fat dut ce che o podevin: cumò dut al è tes mans di Rome. O mantignìn il nestri spirit combatîf e nus à fat tant plasê di vê vude ospit la Societât Filologjiche Furlane: al è un segnâl di interès di bande dal Friûl, interès che il Venit nol à. Nô si sintin furlans aromai al è clâr a ducj».
Celestino Vezzi