ATUALITÂT – Un auditorium plui «gurizan» e mancul «furlan»?

Un vôt ae unanimitât che al à pardabon metût ducj dacuardi, maiorance di centridrete e oposizion di centriçampe: al è capitât in ocasion de sentade dal Consei comunâl di Gurize dal prin di Setembar stât, cuant che e je stade presentade la mozion che e à mot lis aghis cul titul di «Zonte dal non di Celso Macor ae intestazion dal Auditorium de culture furlane di vie Rome», prin firmatari il conseîr de oposizion (Lista Forum) Andrea Bellavite. Tacant des diviersis propuestis di maiorance e minorance, e je saltade fûr in ultin la decision di votâ il cambi dal non de struture stesse: di «Auditorium de culture FURLANE» a «Auditorium de culture GURIZANE». Dut câs, jessint di propietât de Regjon, la ultime peraule i tocjarà ae zonte Tondo. Ma cemût si isal rivât a pontâ al cambi dal non che, di cuant che l’Auditorium al è stât tirât sù, al à il riferiment ae «culture furlane»? Lu vin domandât sei al assessôr ae Culture Antonio Devetag che al conseîr Bellavite.
ANTONIO DEVETAG
Parcè, come Zonte comunâl, vêso sintût la esigjence di proponi di cambiâ il non dal Auditorium?
E jere une decision che o vevin tal cjâf di un pieç. O vin cjapât il rimpin di une mozion de minorance li che si domandave di mudâ il non de struture intitulantle a un impuartant inteletuâl de Gurize furlane tant che Celso Macor. O vin po cjatât un acuardi cu la oposizion par dedicâ il nestri Auditorium ae «culture gurizane», mintri che il non di Macor al vignarà dât ae sale plui grande dal edifici.
Si puedial fevelâ di une sielte che e va cuintri de furlanetât di Gurize?
Lafè no! No vin chê di dâi cuintri ae furlanetât de nestre citât, jo stes o soi nevôt e fi di furlans. Lis lidrîs di Gurize a son e a restin furlanis: no volìn scancelâ une part cetant considerevule de nestre storie.
Alore parcè cambiâ non passant de «culture furlane» a chê «gurizane»?
Nol sarà il mudament di un non a gjavâi alc ae furlanetât di Gurize: cheste e je dome une rivendicazion juste di bande di une citât che no je mai rivade a fâ valê lis sôs carateristichis. De culture gurizane a fasin part la culture furlane, chê slovene e chê todescje, tignint cont ancje di une component ebraiche.
Ce sucedaraial cumò?
Stant che l’Auditorium al è di propietât de Regjon, cumò la bale i tocje ae zonte Tondo: il cambi di non al podarès rivâ in curt. Dut câs, di sigûr no sierarìn lis puartis ae lenghe e ae culture furlanis.
ANDREA BELLAVITE
Conseîr Bellavite, al è de sô mozion che si è rivâts al vôt dal Consei comunâl par cambiâ non al Auditorium.
Come membri dal grup Forum, o vevi proponût di intitulâ la struture a Celso Macor: si trate di une mozion che o vevi prontât za l’an passât a dîs agns de muart dal scritôr. Dilunc dal dibatit, però, la maiorance e à poiât la idee di rimplaçâ l’adietîf «furlane» cun «gurizane».
In chê ocasion o vês votât ae unanimitât: cemût sêso rivâts a cjatâ un acuardi?
O vin decidût di no intitulâ l’Auditorium a un singul personaç, ma ben di dâi il non di Macor ae sale grande de struture. Ae maiorance i interessave il cambi dal non in «gurizane», noaltris o sin stâts dacuardi par vie che ancje nô o sin convints de specificitât de culture de nestre citât.
Ise stade une sielte che e va cuintri de furlanetât di Gurize?
Nô o vin chê di tornâ a meti adun un complès di culturis tant che chê furlane, chê slovene, chê taliane. La idee di «gurizanitât» e je inclusive di lenghis e ideis diviersis: il fat di fevelâ di «culture gurizane» e je une valorizazion de culture furlane che a ’ndi fâs part, come chê slovene.
Cumò, secont lui ce restial a pandi la furlanetât di Gurize?
La plui part de int de nestre citât e sint vive la culture, la lenghe e lis tradizions furlanis. Ai timps de Austrie-Ongjarie a doprâ il furlan a jerin i nobii di chenti; in dì di vuê a son cetancj grups e associazions che a puartin indevant la marilenghe.
Alessio Potocco
_________________________________________
Struture screade tal 1976
Screât tal Istât dal 1976, l’Auditorium di vie Rome al è stât sierât tal 1990 par jessi metût a puest; al à tornât a vierzi dome tal Zenâr dal 1998. La struture e je di propietât de Regjon, dut câs e ven gjestide di bande dal comun di Gurize.
L’Auditorium al à une sale cun 372 puescj (plui doi par disabii): al è furnît di ducj i imprescj tecnologjics par inmaneâ concierts, congrès, conferencis, manifestazions culturâls e rapresentazions teatrâls. Tal interni de struture si cjatin ancje altris dôs salis dopradis par mostris e altris events.