Sfuei Mensîl Furlan Indipendent
Archivi de Patrie

ATUALITÂT – A Sant Denêl si son cjatâts i museus etnografics ladins e furlans

............

Te suaze de cuinte edizion de Fieste Ladine (a San Denêl dai 28 ai 30 di Avost) e je stade proponude une cunvigne une vore interessante e magari cussì no, forsit pe scjarse promozion, cun masse pocje int a sintî contâ lis esperiencis a rivuart de «Culture popolâr e ricercje antropologjiche in Friûl e intes Comunitâts ladinis». A àn puartat il lôr contribûts Stefan Planker diretôr dal Museum Ladin Ćiastel de Tor di San Martin di Badie, Fabio Chiocchetti diretôr Museo Ladin de Fascia, Monica Tallone pal cda dal Museu Cjargnel des arts popolârs Michele Gortani di Tumieç, Carmen Metus che e je une des curadoris de sezion didatiche dal museu «Cjase Cocèl di Feagne, l’avocat Formentini curadôr dal Museu de Civiltât contadine tal Friûl imperiâl e Carlo Venuti diretôr dal Museu dal Teritori di San Denêl (il Museu Cjase Clautane nol à podût jessi presint).
GNOVIS NORMIS_ Il moderatôr Stefano Morandini, responsabil pe Universitât di Udin de Ricercje tal Museu de vite contadine «Cjase Cocèl», al à viert i lavôrs ricuardant che dome dal 2001 i bens Demoetnoantropologjicsmateriâi (DEA) a son stâts metûts tant che «bens culturâi» sot des competencis des Sorintendencis. Al à fevelât des normis che a diviers nivel a tutelin il patrimoni imateriâl, la prime di chest gjenar in Italie e je stade aprovade de regjon Lombardie tal 2008 e la regjon Friûl-Vignesie Julie cu la leç n. 10 dal 2008 e à fat buine la nassite dal Istitût Regjonâl pal Patrimoni culturâl che al cjaparà il puest dal Centri di Catalogazion e Restaur di Passarian. Cheste iniziative regjonâl e je viodude cun sperance dai adets ai lavôrs par vê cussì un Ent di riferiment cun personâl, struturis e competencis specifichis che dispès tes Sorintendencis a vegnin cuviertis di storics dal art e archeolics. Juste par taponâ chestis mancjancis te Universitât di Perugje e je nassude chest an la prime scuele di Specializazion in Bens DEA.
LIS DIFARENCIS CUI LADINS_ Ce che al è vignût fûr vie pe cunvigne e che al marche la diference jenfri la realtât ladine e chê furlane al è che te prime si lavore une vore su la lenghe e la identitât e fintremai a vegnin proponûts pacuts turistics cun cors di lenghe ladine che a àn vût un bon sucès. Une vore fuart il leam cul teritori e la identificazion che la popolazion stesse e à cun chescj spaziis espositîfs; sì che duncje il museu fat pe comunitât e no dome su la comunitât, li che si conte la vivarositât dal patrimoni linguistic peât cun di plui a contis e liendis che al permet di disvilupâ leams cun artiscj, pitôrs e poetis (doi nons jenfri i tancj: il disegnadôr Steno e la cjantante Ruggiero).
I museus furlans presentâts a àn mostrât la lôr ricjece a nivel di bens e ancje la varietât des ufiertis (par esempli Cjase Cocèl plui prontade su la didatiche cun laboratori par fruts, il Museu Gortani plui dedicât a cunvignis e il Museu dal Teritori di San Denêl cun iniziativis sul persut). Une robe però e je vignude fûr: la masse pocje atenzion al patrimoni linguistic dentri ta lis nestris struturis museâls, di fat Morandini al à marcât che «nol è un spazi di finanziament dedicât a chescj aspiets nancje te leç regjonâl 29/2007; a coventaressin invezit fonts par creâ progjets di ricercje par dâ une forme linguistiche museâl dinamiche dentri di un spazi di plurilinguisim reâl in une regjon al centri de Europe come la nestre».
Elena Zanussi

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +