ATUALITÂT – INCHIESTE Ator pai Museus dal Friûl – 1. In provincie di Gurize

Fasìn un zîr tai museus furlans, lant a viodi la situazion tes provinciis di Gurize, Pordenon e Udin par capî cualis che a son lis struturis museâls e di ce gjenar e dant un cuc plui insot a chês che nus samein plui particolârs, sioris e interessantis.
Chescj lûcs a tegnin cont olmis dal nestri jessi, testemoneancis etnografichis, antropologjichis ma ancje elements di caratar ambientâl, economic, archeologjic e cualchi curiositât. A son cetancj i puescj che a conservin ogjets e machinaris, li che si pues viodi, lei, scoltâ par cognossi e imparâ. I museus a son spiei li che si cjalisi lant indaûr tal timp, libris vierts, pagjinis che a contin alc par che la memorie e vegni mantignude e salvade.
A GURIZE_ In provincie di Gurize la rêt museâl (www.provincia.gorizia.it/rete-musei) e cjape dentri diviersis tipologjiis espositivis, come che al sucêt ancje in altris dôs provinciis.
Tai Museus Provinciâi a Palaç Attems-Petzenstein, sede di mostris temporaniis, a son tantis lis pituris a fresc che a insiorin l’edifici, une su dutis: la tele grandone dal 1745 che e parone il sofit dal salon di onôr, opare di Antonio Paroli (I dius dal Olimp). Dopo che a vignaran finîts i lavôrs di restaur il palaç al tornarà a sei la sede de Pinacoteche cun oparis di innomenâts artiscj e mestris dal Sietcent fin al Nûfcent.
Simpri a Gurize, i Museus di Borc Cjistiel a son satûi plens di robis di viodi, une discuvierte continue cun aprofondiments su svariâts aspiets: une sezion dedicade a la Storie e ae Art, une Colezion archeologjiche cun reperts cjatâts tes campagnis di sgjâfs fatis te zone di Gurize (e je une aree dedicade a la ete jenfri il Paleolitic e il Neolitic, une a chê de Protostorie cun riferiments ai cjastelîrs dal Cjars Gurizan; une tierce e je su la ete romane e une cuarte su chê di mieç e sul rinassiment). Ma no je finide chi, i Museus dal Cjistiel a cjapin dentri ancje: il Museu de Ete di Mieç gurizane, il Museu de Vuere Grande, il Museu de Mode e des Arts aplicadis.
FÛR DAL CJÂFLÛC_ Lant fûr dal cjâf lûc e je la Basiliche di Sant Eufemie e il Tesaur dal Domo a Grau cun mosaics bielons de ete bizantine, relicuiaris paleocristians e de ete di mieç, crôs e altris tocs di aur antîcs. Dongje a son ancje il Batisteri, la Basiliche di Sante Marie des Graciis e i rescj de Basiliche de Cort in place Marin. Ancje dentri te Cjase de Plêf antighe a Cormons al è un patrimoni siôr di art sacre cun pituris, sculturis, aurs e palis di altâr che a rivin des glesiis de citadine; adun a son ancje ogjets peâts ae devozion popolâr e documents dal archivi parochiâl.
Tune zone cjalde vie pai doi conflits mondiâi come che e je stade cheste, a meretin une visite ancje il Museu de Vuere Grande de mont San Michêl a San Martin dal Cjars, l’Ara Pacis Mundi a Gardiscje, il Museu dal Sacrari – Cjase de 3° Armade a Redipuglie.
Chest teritori al è ancje cognossût pai seis vins e te Cantine Produtôrs a Cormons, li che ogni an si fâs il Vin de Pâs, a son botis pituradis di 50 artiscj e gjigantografiis di butiliis cun etichetis pituradis di Mestis di Art di fame mondiâl.
CUSSI’ A MONFALCON_ A Monfalcon in plui dal Museu dal Teritori e dal Museu Paleontologjic de Roche, al è ancje chel dedicât al tenôr Beniamino Gigli cun discs, letaris, manoscrits, musichis, films gjornâi che a fevelin dal cjantant.
A Fare e je une colezion une vore origjinâl tal Museu Ford Gratton: prin e unic museu Ford in Europe su la produzion des machinis e dai tratôrs de innomenade cjase automobilistiche. Dentri a son ancje une trentine di tocs di anticuariât motoristic e in plui motos (ancje une Indian de Prime Vuere Mondiâl) e bicicletis (une dal 1866) e une sezion su lis telecomunicazions cu la ricostruzion de prime radio che Marconi al à doprât par comunicâ fin oltri l’Atlantic.
E vâl la pene lâ a dâ un cuc, za che si è a Fare, tal borc dal Sietcent di Colmello di Grotta: un microuniviers che al à mantignût la sô fisionomie di insediament rurâl, tant che une cort sierade, che al à il Museu di documentazion de civiltât contadine furlane cun 1000 ogjets peâts a la realtât rurâl, a lis produzions agriculis, a lis ativitâts artesanâls di chestis zonis.
Di caratar ambientâl ce che si viôt tes esposizions dal Parc di Piuma-Lusinç, de Riserve Regjonâl Fôs dal Lusinç e de Riserve Naturâl Regjonâl dai Lâts di Doberdò e Pietrarossa.
Elena Zanussi