ATUALITÂT – Tornà a cjapâ in man il cuet

Si dîs che nuie al nas par câs e fin che tra personis che si cjatin insieme a saltin fûr buinis ideis par mantignî vive cheste tiere di Cjargne, dut al va benon e al è un segnâl impuartant!
Solidea Bellizzi, zovin architet di Sudri, e je di un pôc di timp che e organize, in ocasion de manifestazion “Magia del legno”, une mostre intal oratori dal so paîs, une maniere par puartâ “in place” lis oparis dai artiscj locâi, il plui des voltis platâts daûr dai mûrs des lôr cjasis.
LA FAMEE DAI CITÂRS_ E propit di achì e je nassude la idee di meti in pîts une scuele par imparâ a doprâ la arzile. No par nuie il progjet al è stât clamât “Citârs”, riclamant ae memorie la famee dai Citârs di Çurçuvint di Sore che, za tor il 1750 e fintremai il1890 cirche, e lavorave la arzile cjolte tai boscs di Gjai e e faseve pignatis, scudielis, planelis, pilis, curnîs di cuadris e vie indevant.
Chest al è il pont di partence dal progjet a pene inviât cuntun prin cors di base di ceramiche. A saran trê mês indulà che e vignarà sperimentade la manualitât dai corsiscj sostignûts des artesanis Nadia Cragnolini e Martina Berton.
Il secont an al vignarà zontât un cors di dissen e tal tierç a cjaparan vite laboratoris di musiche e di teatri, in mût di dâ ai corsiscj ducj i mieçs par svilupâ la lôr vene artistiche.
Intal ultin an no mancjaran cors di design e di marketing par dâ une cerce dal mont de imprenditorie.
LA ORGANIZAZION DAI CORS_ Ogni cors al durarà trê mês; lis lezions a saran une volte par setemane intune stanze dal asîl di Çurçuvint metude a disposizion dal Comun, e a duraran cuatri  oris par volte. Il cors, par un massim di 15 personis, al è viert a ducj: artiscj, artesans, lavoradôrs, disocupâts, vecjos e zovins.
Solidea e dîs che il percors al è lungjut ma al covente par dâ ai ‘students’ la pussibilitât di fâsi gnovis esperiencis e par meti in lûs la lôr vene artistiche.
LA ASSOCIAZION_ Cu la crisi economiche dal dì di vuê, chest cors al pues jessi une ocasion par scomençâ a disvilupâ une gnove capacitât – ancje se tant gnove no je, viodudis lis vecjis lidriis – e parcè no, a vierzi gnovis stradis intal artesanât cjargnel.
Daûr di chest progjet e je la associazion “Maritiere”, e par ogni richieste di informazions si pues scrivi ae direzion mail tieremari@gmail.com
Marta Vezzi