La tragjedie dal Gjapon nus puarte a une riflession, stant che si fevele di taramot ma no dome. O vin domandât a Giorgio Cavallo cualchi considerazion in teme di energjie.
Cemût comential la afermazion “no aes reazions emotivis” sui fats dal Gjapon?
Jo o soi dacuardi, parcè che a fasin dismenteâ altris robis impuartantis cuintri il nucleâr. Ce che al è capitât in Gjapon al à fat tornâ fûr la cuestion de sigurece tes centrâls nucleârs e di dut ce che al sucêt dopo su la int, se alc dentri si romp. Ma butâ di gnûf tal plat il nucleâr in Italie al è vuê sbaliât ancje par diviers altris motîfs: parcè che al vûl dî jemplâsi di ‘scarts radioatîfs’, che noaltris in Italie no savìn dulà metiju; parcè che al coste plui bêçs di chel che si crôt e parcè che al pese masse sedi pe int sedi pal teritori.
Si fevele di pussibilis centrâls in Friûl: la “opzion Monfalcon”, ma cumò a saltin fûr ancje Spilimberc, Tisane, Lignan… Ce pensial?
Lis localizazions in Friûl a son propite chês proponudis bielzà tai ultins agns dal ’70 dal secul passât, pal fat che tecnichementri al covente un lûc une vore siôr di aghe, ancje di mâr se desalinizade. Ma za chê volte il Consei regjonâl les veve boçadis cul vôt di ducj. O crôt, dut câs, che in Friûl nol sedi pussibil fâ centrâls nucleârs par vie che ce che al è sucedût in Gjapon al fasarà escludi prime di dut i lûcs sismics, cemût che al veve decidût il Consei regjonâl tal 1979.
Ce pensial di Krsko?
Al è un probleme furlan e e je grivie disberdeâlu. Dopo Cernobyl e cui Slovens indipendents, al jere nassût un fuart moviment par sierâ la centrâl di Krsko. Ma nuie ce fâ, par vie che la ‘decomissioning’ totâl de centrâl e costave 500 miliarts di liris e nissun al veve voie di paiâ. In dì di vuê, la centrâl e sta par murî dal pont di viste tecnic e al sarès sante scugne sierâle; ma i bêçs no son, e il marcjât finanziari ju tire fûr dome par fâle il dopli. Une centrâl nucleâr e je parie une droghe, che no tu te tiris plui fûr de scjatis par vie che i ‘spaçadôrs’ ti oblein a doprâle simpri di plui.
Isal dome il probleme de sismicitât dal teritori?
No. Si à di sclarî che une centrâl nucleâr ancje moderne e je tant che un cuarp gnûf e strani cuntun pês masse fuart pal teritori. In plui, al à dibisugne di liniis eletrichis di 380 kV par puartâ fûr la energjie produsude. No si pues fâ erôrs cuant che si tire sù l’implant e dopo cuant che si lu met e si lu ten in vore: i citadins no si fidin plui di ce che no si rive a controlâ. Il nucleâr al concentre bêçs dal capital finanziari cence stâ a pensâi parsore aes dibisugnis de int di chenti; al è ancje tant che une forme di ocupazion dal teritori che e pues deventâ un pericul e un obietîf militâr e dal terorisim.
Cemût comential la cuistion de scancelazion dai finanziaments pes energjiis alternativis?
E je une robe une vore grivie e pericolose par vie che il guvier, in di plui dal nucleâr, nol à sclarît nuie in fat di energjie e des gnovis pussibilitâts economichis che lis energjiis rinovabilis a produsin. Une robe compagne e je sucedude cuant che a àn provât plui di cualchi volte a tirâ vie l’incentîf fiscâl dal 55% sul sparagn energjetic te edilizie. I incentîfs su lis ‘rinovabilis’ a àn di jessi calibrâts miôr e leâts di plui a svilupâ lis economiis dal teritori tant che la agriculture, ma a àn di jessi infuartîts su obietîfs clârs di ‘sostignibilitât ambientâl’.
Il Friûl, ce podaressial dâ su chest argoment? Solâr fotovoltaic, eolic, gjeotermic, idroeletric: sono valits pal nestri teritori?
Il sparagn energjetic e lis fonts ‘rinovabilis’ si puedin fâ a plen in dut il teritori furlan. La font idroeletriche e je, dut câs, cuasi doprade a plen e pal eolic a son dome pocjis prospetivis. No si à, dut câs, di dismenteâ lis ‘biomassis’ par produsi energjie soredut termiche. Ma se si à voie di fâle ben cheste robe, sante scugne partî dal teritori, cjapâ dentri i operadôrs locâi publics e privâts, meti adun lis diviersis fonts par doprâlis al miôr e par fâ deventâ il fâ di bessôi la energjie un cuarp puartant de comunitât. Dut câs, o sin ancjimò un grum lontans di chest obietîf.
Cuale ise la indicazion pal prossim referendum sul nucleâr? Parcè?
Si à soredut di lâ a votâ, e votâ sì. Salvâ la aghe tant che un ben di ducj e stâ lontans dal nucleâr al vûl dî difindi doi dirits dai citadins une vore impuartants in dì di vuê. Dut câs, cheste e je ancje une ocasionon di democrazie, se e vignarà doprade par lâ indentri tai argoments aes fondis dal referendum. Si sin usâts tai ultins agns a restâ a cjalâ il teatri de politiche e i siei atôrs di mateçs. Al è rivât il moment di resonâ e di fâ tant che cristians, no tant che bestiis.
Christian Romanini
(L)Int Autonomiste / Al esam di maturitât cu lis dispensis sul nestri sît
Dree Valcic
✽✽ E je une grande buse intal percors che planc a planc al è daûr a fâ l’insegnament de lenghe furlane inte scuele. Plui che une buse o podaressin definîlu un gorc che al va a pericul di gloti ducj chei si movin in chest setôr fondamentâl de nestre culture identitarie.✽✽ Si cjatìn di fat […] lei di plui +
L'Editoriâl / Risierve di valôr
Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +
Salon Internazionâl dal Libri di Turin 2023
Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +
COROT. Nus à lassâts Sergio Salvi
Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +
Vuê al è il 3 di Avrîl, si fâs la Fieste de Patrie. Fûr la bandiere dal Friûl! Mandi a ducj i furlans! Buine Fieste de Patrie!
............
Chest an si davuelç ai 16 dal mês la celebrazion che e memoree l’inovâl dai 946 agns de nassite dal Stât Patriarcjâl 3 di Avrîl dal 1077: une date fondamentâl pe origjin de nestre identitât di popul furlan, dal moment che propit cheste zornade e je considerade in maniere uficiâl tant che chê de nassite […] lei di plui +
Glesie Furlane / Grop amîs di pre Toni. Program dai events pal 2023
1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +