ATUALITÂT – Furlans, sveaitsi!

No je propit compagne la storie che si impare sui libris: anzit. A sintî i zovins students atôrs de “Balade pal 1511”, scugnî frontâ i fats e i personaçs che a àn fate sù la nestre cussience di popul dantjur vôs e anime suntun palc, e je une maniere pardabon uniche di imparâ cheste materie che a tancj students no ur va propit jù. «Si capìs di plui recitant e cjantant che a studiâ cjapitui e cjapitui di libris», al spieghe Paride Tolazzi che cui siei compagns Simone di Bernardo e Karen Roncastri de Tierce A dal cors pai Gjeometris dal Marchetti di Glemone nus conte il valôr di cheste esperience. Un lavôr che a àn puartât indevant par dut l’an di scuele, une ore par setemane, e che ur à permetût di davuelzi une sorte di ricercje critiche su la storie dal popul furlan che no ducj i fantats de lôr etât a puedin svantâsi di vê fat.
IL MANIFEST_ Il lôr lavôr a è stât cuinçât parfin di un “Manifest ribalton pal popul furlan” di Angelo Floramo e Federico Rossi che al tache cun chestis peraulis che si comentin di bessolis: «Furlans di dut il mont, SVEAITSI! Al è un fantasime che al zire ator pal Friûl, un cjalcjut dal sium che ti à fat indurmidî. Ma cheste volte i grignei di chê di Peonis a son propit pericolôs: si clamin indiference, egoisim, vuarbetât di pinsîr, materialisim, oportunisim. Visaitsi che la cjoche dal pan e je dure di parâ vie». Peraulis che a fasin capî ce sorte di anatomie de storie furlane che a àn fat chescj fantats. Par esempli, Simone al à recitât il rûl di Atile, il re dai Uns, e chest i à permetût ancje di taiâ il cuel al so professôr, intun piçul svindic jenfri amîs. «La imedesimazion in chei che a àn fate la storie – nus conte – e puarte a capî lis resons di ducj, dai bogns e dai triscj, dai sorestants e dai sotans. E soredut, cemût che la storie e je pal plui indreçade dai parons». E se Simone al à fat la part di un tiran, a Karen i è tocjade chê de strie brusade de Incuisizion: cussì la zovine fantate e à podût ancje vê une cerce de “storie maladete” che ur è tocjade a tantis feminis che tai secui a son vignudis prin di jê. «Lis feminis a jerin pardabon metudis di bande – e dîs – e la lôr identitât e jere une vore sotstimade». E cumò? «Cumò al è cetant miôr ma a son coventâts secui par vê la libertât che o vin vuê».
IL RIBALTON_ Ce idee si sono fats chescj fantats dal Friûl? Ise une tiere cuntune sô identitât? O dome une part dal Venit? «I furlans – al tache Paride – a son ancje masse cuiets, ma cuant che ur vegnin sù i cinc minûts… » al ven il moment dal ribalton, un ribalton plui che mai necessari in dì di vuê par scuvierzi une sperance gnove, daûr des peraulis dal Manifest:  «Furlans di dut il mont, SVEAITSI! E je ore di ribelâsi! Fasìn ancje nô un ribalton dal numar un! No sintîso il tambûr dal riviel che al bat ancje pal Friûl? In cheste ore ribaltone o sin achì par tocjâ il vuestri cûr: par butâ vie la part malade e fâ sflorî une gnove sperance pal Friûl e pal Mont di doman!». I fantats de “Balade dal 1511” a son pronts pal lôr ribalton: cumò ur tocje dome di cunvinci chei altris …
Walter Tomada