ATUALITÂT – Pre Checo on line

Al è di plante fûr in version trilengâl (furlan, talian, inglês) il gnûf sît internet dal Istitût ladin furlan «Pre Checo Placerean» (www.istitutladinfurlan.it), presentât ai 6 di Mai stâts li de sede de Provincie di Udin. Si da spazi sei ae ativitât de socie nassude plui di vincj agns indaûr, sei soredut a une des figuris di ponte dal autonomisim di chenti, pre Checo Placerean, nassût a Montenârs tal 1920 e vignût a mancjâ tal 1986. Tal sît si cjatin la sô biografie e cetant materiâl scrit di bande sô o ancje ce che altris a àn scrit su di lui. L’obietîf cumò al è chel di insiorâ inmò di plui l’archivi informatic su dut ce che al rivuarde pre Checo, cjapant dentri ancje fotos e materiâl audio e video: in chest sens la colaborazion e je vierte a ducj. O vin fat un pâr di domandis al dean dal Isitût William Cisilin, a proposit de novitât e di pre Placerean.
Ce rûl aial il sît internet pe clape (vetrine, scambi…) e ce isal in plui rispiet al vecjo sît?
Al covente par fâsi cognossi e massime par pandi il plui pussibil ce che o fasìn. A chest pro o vin decidût di fâ in maniere che si puedi discjamâ, in curt, ancje une part des nestris publicazions. Rispiet a prime o vin rindût il sît plui facil di navigâ, plui moderni e cun tancj contignûts in plui.
O vês l’obietîf ancje di tirâ dongje materiâl su dut ce che al rivuarde pre Checo, domandant il contribût di ducj. La memorie dai grancj furlaniscj, magari cussì no, e je simpri afidade nome ae gjenerositât dai volontaris. Ce podaressino fâ istituzion come par esempli la Universitât dal Friûl?
Mi displâs dîlu, ma l’Universitât e à fat pôc e nuie di rilevant e, massime, di sistematic su chest cantin, cundut che e vedi ancje studiôs une vore valits. Noaltris o saressin za contents se si ocupàs di plui de storie furlane contemporanie, par esempli, par podê vê a disposizion plui imprescj pe ricercje. O crôt dut câs che il probleme al sedi plui gjenerâl, ven a stâi: la Universitât volude dai furlans, trop aie tignût fede al impegn di puartâ indevant la ricercje su la storie, su la tradizion e su la lenghe dal Friûl?
Redazion