Sfuei Mensîl Furlan Indipendent
Archivi de Patrie

AI 32 DI MAI. La leç di gravitazion des machinis grandis

............

Se Newton al fos stât furlan (e se al fos nassût cualchi an plui tart), la leç di gravitazion universâl a sarès stade un tic plui complicade.
No dîs che in Friûl i miluçs a colin intune maniere difarente che tal rest dal mont, ma o ai notât che al sucêt un altri stran fenomen: e à di sei une leç fisiche che e fâs cressi il valôr des machinis a man a man che si va dongje dal mâr.
Cumò us displei dut. Vêso mai fat câs al panorame des machinis in Cjargne? Chê che à vût plui sucès e je stade la Ape. A dimostrazion che i SUV no coventin pardabon a lâ sù pes rivis: i cjargnei di fat no doprin machinons, ma une machinute cun trê ruedis.
La difusion de Ape in Cjargne e je cirche come chê dal telefonut in Italie: ogni cjargnel a ‘nd à almancul dôs. In gjenar ancje dal stes colôr, parcè che un cjargnel nol sta tant a bacilâ daûr di robis che no sedin di sostance (par altri, no ai mai rivât a capî cemût che a fasin, ma ducj i cjargnei a san ricognossi intun moment cuale che e je la lôr Ape ancje dongje di altris dîs compagnis, e cence savê il numar di targhe, a san ancje dîti di cui che a son chês altris nûf). Cuant che propite e covente une 4×4, il cjargnel al compre une Panda. Il faturât de Fiat al à di jessisi dopleât cuant che in Cjargne a àn scuvierzût la Panda 4×4: in dut il rest di Italie no tu rivis a viodint tantis cussì. Altri che Extreme, Climbing o Dynamic: a Torin a varessin vût di fâ un model di non Panda Cjarson.
Cuant che tu rivis in planure invezit, tu scomencis a viodi machinis di ducj i gjenars, de utilitarie ae berline, ma lis Ape e lis Panda a calin une vore. Tu cjatis nome i fruts cu lis Ape Cross, ma chei no contin, parcè che lis doprin tal puest dai motorins e no des machinis, e – a pene che a cressin – si comprin almancul une City Car.
Ma lant plui in jù, plui a sud, la leç naturâl dai motôrs furlans e devente clare come il cîl di Avost cuant che tu âs di stâ sierât in cjase. Come che tu rivis a Lignan, veju li i machinons, e plui che tu vadis dongje dal mâr, plui grancj a deventin: i Porsche e i Ferrari tu ju cjatis soredut a gravitâ fûr dal Tenda, in gjenar cuntune biele fantate dentri, ma chel al è un altri discors.
O forsit nancje tant: ae fin des fins, ancje chê des bielis fantatis e des bielis machinis e je une leç di atrazion universâl, no?
BETE DI SPERE

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +