Pordenon: bêçs e sflocjis

Ai 7 di Lui il Consei comunâl di Pordenon al à fate buine a maiorance une delibare là che al domande di jessi gjavât fûr dal teritori che si varà di meti in vore la gnove leç regjonâl su la lenghe furlane (29/2007). Un dai argoments saltâts fûr intant de discussion de delibare al è trop che al costarès meti in vore la leç sul furlan. Ta chê ocasion si à dite che al Comun i costarès “no mancul di un milion di euros”! Ise pardabon cussì?
IL RAPUART COSCJ-BENEFICIS_ Tachìn cuntun resonament plui a larc: al sarès simpri di tignî cont dal rapuart coscj-beneficis. Trop valial garantî i dirits linguistics dai furlans? Su chest nissun al à dite nuie. Forsit parcè che al è simpri dificil cuantificâ i beneficis che i dirits a puartin: pensìn al dirit ae salût, al lavôr, ae istruzion, e v.i. A son pôcs chei che a olsin di jentrâ ta chest cjamp. No però se si fevele di dirits linguistics, massime se a son chei dai furlans. Alì si calcolin dome lis spesis e, ancje chês, avonde mâl.
Cirìn, dut câs, di là plui sul pratic. Intant al somee che a Pordenon si vedin dismenteât che i fonts che a son daûr de leç a son chei che la Regjon e decidarà di investî ta chest cjamp, cu la zonte di chei di divignince statâl de 482/99 (dal moment che la leç regjonâl e varès di jessi l’imprest par meti in vore i principis de leç statâl al câs furlan).
OBIETÎFS ANUÂI_ In ogni câs, la leç 29/2007 e previôt che lis aministrazions locâls a metin jù ogni cinc agns dai plans di politiche linguistiche cui obietîfs di rivâi ogni an. Si trate di struments che a varessin di nassi de interazion tra Regjon, aministrazions locâls e ARLeF par meti in vore in maniere progressive ce che e domande la leç. No si trate, duncje, di un model unic par ducj, ma di une sisteme a “gjeometrie variabile” ancje tai timps, là che – cuntun fregul di bon sens – ancje lis particolaritâts di Pordenon a varessin cjatât la soluzion juste. Cun consecuencis claris ancje sui investiments di fâ. Cence dismenteâ po che i plans a àn di tignî cont ancje dal belanç a disposizion, come a dî: se i bêçs a son pôcs i intervents a saran pôcs.
I SERVIZIS_ Par finî a son dute une schirie di servizis che a puedin jessi gjestîts o prontâts di plui Comuns intune – par esempli i sportei linguistics, la modulistiche, i cors di formazion, e v.i. – cuntune riduzion des spesis.
Bastave informâsi un tic di plui e si sarès evitât di contâ sflocjis. O forsit la idee e jere propite chê?