ATUALITÂT – La storie?… Un spetacul!

Il progjet “Balade pal 1511” metût in sene dal Istitût Tecnic di Glemone
La storie dal Friûl metude in musiche, cjantade e balade si impare miôr. E je cheste la disfide di Angelo Floramo e Alberto Vidon, doi professôrs di letaris dal Istitût Tecnic pal Cumierç e pai Gjeometris di Glemone che al cjape il non di un dai plui grancj inteletuâi furlans dal Nûfcent, pre Bepo Marchet: un che la storie le à no dome studiade ma ancje scrite e ben meditade. Al è capitât ancje ai fortunâts arlêfs di chescj doi docents che a àn fat “vivi” la storie ai students metint in sene “Balade pal 1511”, un spetacul che ducj i spetatôrs dai “Colonos” di Vilecjaze a àn podût viodi inte suaze dai incuintris di “In file”. La trame e va a gjambar, de storie resinte fin ae Ete di Mieç: si partìs di un scjas, di un ton che al creve la tiere, l’Orcolat: il taramot dal 1976. Ce che al fâs jentrâ il public tal vîf dal spetacul al è dut câs un convoi di Cosacs che a rivin in Cjargne tal 1944: i fantats a impersonin la vuere jenfri dôs disperazions, chê dai Cosacs che a cirin une gnove Patrie e che dai furlans che a cirin di difindi la lôr.
Si passe po a un altri moment dulà che la storie e je jentrade tes cjasis dai nestris avons, la rote di Cjaurêt: cui che al scjampe e cui che al reste a son lassâts al stes dolôr. Un destin che la int dal Friûl e à plui voltis patît inte sô storie: sot Napoleon, sot la Incuisizion, e in dutis lis invasion di Atile incà. Doi siei moments a valin tant che redenzion: la nassite de Patrie dal Friûl tal 1077 e la Joibe Grasse dal 1511, moments contâts cu la colaborazion di Zorç Ius e Luigino Peressini.
Walter Tomada