ATUALITÂT – La dibisugne di une gnove educazion ambientâl

Tai ultins timps, cuant che si fevele di problemis e di emergjencis di caratar ambientâl, al è come tocjâ il gnerf discuviert di un dint. Si reste simpri un tic stranîts parcè che al pâr fin dal impussibil; ma cun dut chel che – ancje in gracie dai media – si sint e si viôt ator pal mont, no si è ancjemò implantade inte int une cussience ecologjiste e un ategjament che almancul nus permeti di no ruvinâ il teritori plui di ce che o vin bielzà fat. La colpe e cole un pôc su ducj parcè che se al è vêr che lis scrovariis lis fasin in gran part i rapresentants de politiche, al è ancje vêr che cualchidun chescj personaçs ju à metûts li che a son.
La aministrazion passade a à paiât a cjâr presit lis decisions in teme di ambient, e tantis des  cuistions daviertis a restin ancjemò in spiete di une risoluzion, ancje se alc si môf.
Cualchi mês za fa la notizie che la Regjon, par vôs dal assessôr Lenna e dal president dal consei regjonâl Ballaman, e varès rinunciât al progjet des cassis di espansion sul Tiliment a à fât un grum di scjas. La volontât de bande politiche e je chê di bandonâ il progjet des cassis e cirî, par risolvi il probleme des esondazions te basse furlane, soluzions alternativis e cuntun impat ambientâl inferiôr.
Une buine man e une biele fete di merit tal otignî chest risultât si à di ricognossile ae associazion A.C.Q.U.A (Associazion Control Cualitât Urbanistiche Ambientâl) e al so president Renzo Bortolussi, ambientalist, furlanist e convint difensôr dal teritori e de sô unicitât.
A.C.Q.U.A. e à cjatât fûr un studi fat 25 agns fa de SERTECO in colaborazion cu la Universitât di Udin (daûr comission de regjon) esaminât e convalidât di resint de DELFT HYDRAULICS. Il progjet al studie il comedon di stroçadure che al à il Tiliment a la altece di Sisarol (in comun di Sant Michêl al Tiliment) e che al impedìs il deflùs regolâr des aghis; la soluzion, une vore culumiose e scuasit elementâr, e sarès chê di fâ disviâ lis aghis in ecès suntun canâl che, taiant il comedon ae altece di Volte, par une lungjece di 350 metris, al permet di aumentâ la puartade dal flum, rindintle costant e sigure.
A rinfuarçâ la decision de zonte regjonâl, ancje une sentence di ricors, fate e vinte dai parons des tieris li che si varessin di fâ lis cassis di espansion. Chescj a àn dimostrât che la Autoritât di Bacin (…condanade) e veve declarât publics e duncje potenzialmentri dispropiabii, terens che in realtât a son di propietât di privâts. Di resint, la autoritât di bacin si è ancje metude in lustri declarant, par letare, di no vê lis risorsis par fâ un plan di manutenzion plui voltis domandât e che al puedi meti in sigurece il jet dal flum; su la fonde di chest, no si capìs duncje cemût che e pues sostignî la spese di un progjet faraonic tant che chel des cassis di espansion. Par chestis incongruencis, A.C.Q.U.A. e à domandât plui voltis la sopression dal ent, ritignintlu inutil e dispendiôs pe comunitât.

Renzo Bortolussi che nus a vuidât e judât a capî alc di plui su lis cassis, nus jude ancje a fâ il pont su altris emergjencis che a rivuardin la nestre regjon.
Cualis sono chês altris situazions critichis che o vês sot voli?
Purtrop o vin di lavorâ plui di chel che o crodevin! O stin tignint di voli la situazion de dighe di Cuel, in comun di Darbe; o stin monitorant la situazion di Vile di Flum, li che il comun – cuntun progjet boçât ancje di Bertolaso in persone –, al vûl rindi edificabilis zonis che a àn di sei metudis prime in sigurece; o stin daûr al progjet di un gnûf sbarament (come chel di Cuel) in comun di Buri; o sin daûr a esaminâ la cuestion de zone artesanâl di Curnin che e je stade implantade intune zone di esondazion potenziâl jenfri la roie e il flum Tiliment; o stin combatint une bataie a Vilegnove di Sant Denêl, li che si prospete un ilecit su la roie di Cjarpât; o vin scuasit risolvût la cuestion dal incuinament dal flum Colvare (in comun di Manià) li che lis fognis a discjamavin lis aghis sporcjis diretementri tal flum cence passâ pal depuradôr dal NIP; o stin frontant ancje il probleme des esondazions in comun di Tisane, li che o vin fat azions par meti in lustri il mancjât funzionament des struturis inte esondazion dal 2007 e li che, par vie di un plan di asset teritoriâl insuficient, son stadis tiradis sù cjasis in zonis sogjetis a inagament.
Cuâl isal l’ategjament de gnove zonte in teme ambientâl?
Par chel che o podìn dî fin cumò, o disarès atent e dal sigûr interessât. O vin vût mût di fevelâ plui voltis in maniere costrutive cul assessôr di competence e ancje cul president Tondo che nus àn scoltâts cun interès e nus àn dimostrât ricognossince par chel che o vin fat fin cumò.
Sandri Olivetto