ATUALITÂT – La cjaminade fûr pes plêfs cjargnelis

Tra pôc ancje la Cjargne e podarà svantâsi di vê un percors simil ae famose “Cjaminade di Sant Jacum di Galizie”. Un percors, chel de “Cjaminade des Plêfs”, di spiritualitât, di valôrs di fede, di culture, di patrimoni storic e archeologjic che al valorizarà lis undis plêfs cjargnelis.
La idee, nassude inte Arciconfraternite dal Spirtussant “Pieres Vives” di Sant Pieri in Cjargne, e fâs cont sul jutori de Arcidiocesi di Udin, des Parochiis e dai Comuns indulà che a son lis Plêfs, de Provincie di Udin, de Fondazion CRUP, de Bancje di Cividât, da C.C.I.A.A., de Comunitât Montane de Cjargne e di altris ents e associazions.
Il percors, di cirche 250 km, al è stât studiât e metût adun tra il 2009 e il 2010 de Arciconfraternite, cu la colaborazion dal CAI, dal Cuarp Forestâl, dai Scouts, de Protezion Civîl, dal Socors Alpin, des Pro loco e de Universitât di Udin. Il zîr al scomence li de Cjase Emmaus a Dimponç e, tocjant lis 18 tapis tra salidis e dissesis jenfri boscs e trois, al finirà li de Glesie Mari di Sant Pieri di Zui. Il percors nol è par nuie pericolôs e soredut al è a puartade di ducj.
LIS TAPIS A SARAN:
1. Sant Florean – Dieç
2. Sante Marie oltri Bût – Tumieç
3. Sant Stiefin – Cesclans – Cjavaç
4. Sant Martin – Vile di Verzegnis
5. Sante Marie Madalene – Divilin di Vile Santine
6. Sants Ilari e Tazian – Enemonç
7. Sante Marie Anunziade – Castoie di Soclêf
8. Sante Marie dal Rosari – Fors Disot
9. Colegament tra Fors Disot e Fors Disore
10. Santuari di Sant Svualt – Sauris Disot
11. Colegament Sauris Disot – ripâr ‘Ten. Fabbro’
12. Ripâr ‘Ten. Fabbro’ – Cime Sapade – Percors “Cjaminade des Dolomitis”
13. Colegament Cime Sapade – Prât di Cjargne
14. Plêf di Sante Marie di Guart – Davâr
15. Colegament Davâr – Ravasclêt
16. Colegament Ravasclêt – Sudri
17. Tape finâl Plêf di Sant Pieri – Zui
18. Trasferiment di Sant Pieri al parcament de “Cjase Emmaus” di Dimponç.
LA VUIDE_ Il comitât al sta lavorant ae jessude dal libri vuide che al vignarà dât fûr a ducj i pelegrins che a fasaran cheste esperience. Te publicazion par ogni tape a saran segnaladis: 1) part tecniche (indicazions des dificoltâts, dal timp che al covente pal percors, conseis pai vistîts di metisi, une cjartine topografiche cu la altimetrie, informazions su flore e faune dal lûc di riferiment e informazions di interès gjeologjic, storic e archeologjic); 2) part religjose (informazions storichis de Plêf di riferiment, oraris des celebrazions liturgjichis); 3) part logjistiche (informazions turistichis su servizis publics, museus, gastronomie e curiositâts).
Insieme ae vuide e vignarà dade fûr la cjartine topografiche complete di dut il percors e di ducj i trois.
Tal pont di partence, Cjase Emmaus di Dimpoç, si cjatarà l’ufici di acet indulà che il pelegrin, une volte parcade la machine, si fermarà par cjoli la vuide, par ricevi dutis lis informazions e soredut la cjarte dal pelegrin indulà che, dilunc dal percors, a vignaran metûts i timbris che a certificaran lis visitis aes Plêfs. Si podarà domandâ di jessi compagnâts di une vuide e, paiant, si podarà vê une polize assicurative.
Il personâl che al proviodarà a tignî nets i trois, a garantî l’acet, lis vuidis e la assistence ai pelegrins al fasarà part di une cooperative.
Il prin apontament cu la presentazion di cheste gnove iniziative al è par sabide ai 15 di Mai des 9 aes 10 sul sagrât dal Domo di Tumieç.
Il percors al sarà une buine ocasion pal pelegrin par passâ biei moments tal mieç de nature cjargnele, par respirâ e sintî i profums e i rumôrs dai boscs, par lassâ la olme dongje di chês dai vecjos che a àn sudât su chei trois, par bevi tal poç de storie par scuvierzi e capî il mont platât dentri e fûr des grandis regjinis dai zups: lis Plêfs.
Marta Vezzi