ATUALITÂT. Internet a gratis cul Wi-Fi

Conession a internet “a gratis” par puartâ a zero il divari che al è tra chei che a àn un acès efetîf ae societât de informazion e chei che, dismenteadis lis tantis bielis peraulis di ciertis istituzions, a son ancjemò lontans di un usufrut a pene suficient de rêt.
La cuvierture dal teritori cun acès a internet a velocitât sore 1 megabit/secont e reste ben plui sot de medie europeane, ancje se a son atualmentri in cors di opare diviersis campagnis, di caratar privât e public, par ridusi e par superâ il digital divide.
PRIVÂT_  La realizazion dal progjet regjonâl pe ativazion di un servizi di bande largje (ADSL) tal teritori de pedemontane e de mont pordenonese al va ben planc, tant che la Graphistudio (dite che si ocupe di albums matrimoniâi a nivel internazionâl) e à domandât un aprofondiment tecnic par realizâ un puint radio che di Arbe (li che e à la sede) al mandi un segnâl fin te zone di Pielunc, li che la dite e à di resint comprât il cjistiel Ceconi (sielt tant che sede di rapresentance par events di caratar internazionâl) e li che il colegament Wi-Fi al puartarâ la bande largje. Cuant che il colegament al vignarà tacât, par iniziative de proprietât, i abitants di Pielunc, di Sant Francesc e di Vît a varan la pussibilitât di vê l’acès  a internet par dibant.
PUBLIC_ Daspò vê passade la fase di test, il comun di Manià, prin in Friûl, al à dât il vie al progjet par furnî l’acès a internet par dibant (midiant hot-spot Wi-Fi) a ducj i citadins residents, e cuntune piçule spese (3 euros ad an) par chei che a vegnin di fûr. A spiegânus alc in mert al è Marco Tramontina (espert di informatiche e assessôr in cjarie) che al à volût a fuart il progjet.
Ancje se cun cualchi slungjadure leade a leçs nazionâi che no nus permetin di podê vê un acès istantani ma che nus oblein a une autenticazion prime di podê usufruî dal servizi, o sin rivâts a fâ ce che si podeve, daûr des nestris pussibilitâts.
Il colegament al ven garantît di une rêt Wi-Fi (clamade Guglielmo, in onôr di Marconi), realizade in colaborazion cun Telecom. A vuê, a son a disposizion un numar di zonis (place, comun, teatri e biblioteche) destinadis a cressi, ancje par vie di un grant interès dimostrât dai comerciants, che a àn dade la disponibilitât a ospitâ implants che a fasaressin di puint radio, slargjant di conseguence lis zonis li che si pues vê il servizi di conession. Par vê il colegament, come che nus spieghe Tramontina, tocje regjistrâsi. Lis tesseris di autenticazion a son disponibilis tai uficis dal turisim (Museu Co.ri.ca.ma) e in biblioteche. Lis cards a àn la durade di un an solâr e a dan la pussibilitât di “navigâ” e di discjamâ pueste cence fastidis.
ALEX OLIVETTO