MEDITANTLIS TAL SO CÛR. Sabide sante pal gno popul

La zornade si slungje, il soreli al sclipìs, si svicine la vierte dute lûs e colôrs e inte vierte la primevere de glesie: la solenitât de Pasche cul so misteri di muart e di resurezion.
Chest an il sacri tridui di Pasche e la fieste de Patrie a van a bracet; di fat ai 3 di Avrîl al cole di sabide sante. Al è vêr che lis celebrazions pal Friûl a vignaran metudis te setemane daspò, ma al reste ancje vêr che inte sabide sante di chest an il nestri pinsîr al larà a la tiere dai paris; parcè che, cemût no peâ l’aniversari de Patrie a la sabide sante e la liturgjie a la passion dal gno popul?
Sabide sante: zornade dal grant cidin, li che lis cjampanis a vegnivin peadis, li che lis glesiis no àn ni tovais, ni cjandelis, ni rosis e nancje liturgjie, li che no si tocje tiere, li che dut tâs e dut polse! Di fat, te sepulture di Crist ancje il soreli al pierdè la sô lûs e il popul si cjatà cence pastôr. Come il Friûl. A disin che la nestre int e començà a blestemâ di plui inte vuere dal 15-18. I Furlans si domandavin: Nus aial bandonâts nestri Signôr?
No je stade ni la prime ni la ultime des sabidis santis de mê tiere.
Al è propit destin che cheste zornade nus compagni. Ancje la mari glesie di Aquilee cul grant mosaic di Gjone glotût e tornât a butâ fûr dal pes, nus ricuarde la sabide sante di secul in secul, di gjenerazion in gjenerazion. In Gjone glotût dal pes al è Crist glotût de muart e in Crist glotût a son ducj i nocents, dutis lis minorancis dal mont fruçadis tra i dincj de barbarie umane.
No esist dome la Shoah, a esistin ancje il San Salvadôr, il Guatemala, la Afriche, il Tibet e tancj altris popui perseguitâts, sfinîts e sterminâts. Tra chei, se o studiìn i fats, o sin ancje nô.
E conte une storie dai Chassidim che un rabin i disè a un ebreu: “Mi vuelistu ben?”. E chel i rispuindè: “Sì, jo ti vûl ben”. Il rabin i domandà di gnûf: “Sâstu cuâl che al è il gno dolôr?”. “E cemût fasio a savê cual che al è il to dolôr”, al rispuindè chel altri.
“Alore, – al concludè il rabin – nol è vêr che tu mi vuelis ben.
No tu puedis volêmi ben se no tu cognossis il gno dolôr”.
E il dolôr dal Friûl al è te sô anime che e ven sassinade.
Benedete sabide sante, metude tra il lâ amont dal vinars sant e lis primis lûs dal crichedì di Pasche! Tu tu nus palesis la angunie interiôr dal nestri popul ma ancje la sperance de resurezion; intal mît, intal segnâl di Gjone, tra lis tribulazions, tu nus compagnis.
Cumò, ai 24 di Març a son trente agns che bons. Oscar Romero al è stât copât. Lui, simbul e martar dai popui tibiâts de Americhe centrâl, al scriveve: “La mê vite no mi parten; e je de mê int”. E al zontave: “Ancje se mi copais, o resurissarai tal gno popul”.
Buine Pasche e buine fieste de Patrie te resurezion dal Signôr, tal avignî dal Friûl.
pre Tonin Cjapielâr