Sfuei Mensîl Furlan Indipendent
Archivi de Patrie

ATUALITÂT. Elezions in Venit, su la schede cualchidun al scrîf Friûl

............

Duncje di là de Livence si preparin a lis elezions, anzit a son plui che pronts. Un confront interessant pal Friûl no dome parcè che a puedin cambiâ i rapuarts tra lis regjons, Tondo si sintive dispès cun Galan, ma lu faseve ancje Illy, no dome parcè che une vore di infrastruturis a son in comun, viôt Autostrade, forsit l’aeropuart e i puarts, e vie indenant, ma soredut par viodi l’ategjament dai partîts su la cuistion referendarie tai comuns che a àn decidût di passâ in Friûl. E ce aiar che al tire lu vin domandât a chei che cheste bataie le puartin indenant.
«O AI FIDUCIE IN LUI»_ Il confin tra Venit e Friûl lu scjavace ogni dì. Di cheste bande e lavore, e à un ufici di gjeometre, là e vîf. Marica Fantuz, 30 agns, presidente dal Comitât Pro Friûl e cumò ancje sindic di Midune di Livence, e à ben presintis lis difarencis tra lis dôs regjons. “Plui agjevolazions e servizis di cualitât”, e sotlinie riferintsi a la nestre. Za doi agns indaûr e je stade la promotore dal referendum par passâ da la provincie di Trevîs a chê di Pordenon. Il dut al è finît intun “nuie di fat”, come che si dîs in chescj câs. Par 216 vôts no si è rivâts al quorum che al coventave par rindi valit il referendum (al è lât a votâ il 42% dal popul). Ma Marica, che a Jugn dal 2009 e je stade elete sindic di Midune e che e fâs part da la Leghe Nord, e ten dûr: “Se il Venit nol devente une regjon autonome o se nol met in vore il federalisim fiscâl tal 2013 o torni a proponi il referendum”. Lis prossimis elezions regjonâls no le spaurissin, par jê il favorît numar un al è Luca Zaia (Leghe), so cognossint. “Ai let che al lotarà par tignî adun il teritori ma chestis a son robis che si disin dilunc da la campagne eletorâl e che si scrivin sui gjornâi – e spieghe – . Jo, in realtât, o ai plene fiducie in lui. Di chei altris candidâts no ai sintût nuie a proposit ma no pensi che a saran elets”.
E LA AUTODETERMINAZION DAI POPUI?_ Francesco Frattolin president dal Moviment Provincie Pordenon-Puart (che al coordene ancje i comitâts pal passaç in Friûl dai paîs dal mandament di Puart) invezit, al pant dute la sô delusion pes declarazions di Zaia: «Cumò o podìn ancje, tes stradis e tes placis dai nestris paîs, lei il so sproc, sielt pai manifescj eletorâi, “Prima il Veneto”. Jo, che o soi furlan, pensant a mi e al gno teritori che al è une part di chel Friûl concuistât de Serenissime e mai plui tornât in maniere definitive, ce i aio di rispuindi alore? “Benon, tegniti il to Venit e lassinus tornâ in Friûl, no?” E la autodeterminazion, tant berghelade de Lega Nord? E va a trai! O miôr, e je la solite naine: fin tant che le domandi par me, e va ben, ma cuant che le domandin chei altris, no! La storie e je vecje, come che a fossin inmò fruts…»
IL MARUM A SAPADE_ Alessandro Mauro dal comitât “Ritorno di Sappada in Friuli” nus dîs che “Lis posizions des fuarcis politichis in Venit si stan sclarint e soredut lis declarazions resintis dal candidât pe presidence Luca Zaia no somein jessi in sintonie cul moviment referendari sapadin”.
“Si impegnarìn” al à dit, di fat, Luca Zaia “par che il federalisim fiscâl al puedi dâ ai paîs che a àn voie di lâ vie lis rispuestis che a mertin, puartant cussì la int di chescj paîs a restâ in Venit”. Pai sapadins chest al sune come une oposizion dal Venit al tornâ di Sapade in Friûl. Di un pont di viste procedurâl al va rilevât che il guvier e te fatispecie il ministri dal interni Roberto Maroni a son inadempients rispiet a la leç che e imponarès la presentazion al Parlament dal progjet di leç pal passaç di regjon. Cu la leç presentade dal Senadôr Ferruccio Saro al Senât si sta duncje tentant la vie parlamentâr.
Par chel che al rivuarde lis resons economichis che a àn contribuît al risultât dal referendum Danilo Quinz, puartevôs dal comitât, al dîs “Il fat di no partignî a nivel aministratîf a la aree che il paîs al ricognòs, sedi dal pont di viste storic e culturâl ma ancje economic, al fâs in maniere che il paîs al sedi in continuazion mutilât tes sôs pussibilitâts”. Ve parcè che il mantra dal federalisim fiscâl nol cjape i sapadins. Cualchidun al ponte duncje suntune proteste vie pes elezions “No je la nestre regjon, no votìn e o scrivìn Friûl su la schede”. Al somee che il comitât al vedi intenzion di valutâ une strategjie eletorâl comun par Sapade.
Valentina Pagani, Dree Valcic, Dree Venier

L’EDITORIÂL / La multiculturalitât e valorize il grant e il piçul

Zuan Marc Sartôr
Belle époque. Un student di Gurize al viaze cul tren dilunc la Südbahn (la Ferade Meridionâl, di Viene a Triest). Al torne a cjase dopo agns di studi inte universitât de capitâl imperiâl. Al à frecuentât la preseade facoltât di fisiche, là che si davuelzin lis prestigjosis lezions dal professôr Jožef Štefan, il famôs fisic […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +