Sfuei Mensîl Furlan Indipendent
Archivi de Patrie

ATUALITÂT – INCHIESTE Ator pai Museus dal Friûl / 3 – «Ma no si pues colâ dome tal ricuart»

............

Professôr Gri o vin cjatât, te nestre inchieste, tancj esemplis di caratar etnografic, plui o mancul disvilupâts e curâts. Cuale ise la sô impression in mert, cuâi sono i ponts debui e chei di fuarce?
«A son tantis realtâts, fin masse, ma e je une vivarositât che e nas dal bas e che e je produsint  (singui colezioniscj, associazions), e chest al è il pont di fuarce plui impuartant. Ma par definîsi «museu» bisugne che cheste vivarositât e rivi a vê cualchi standard, e à di lâ daûr criteris che a àn di jessi tignûts in considerazion te disposizion dai bens, te lôr conservazion. La mancjance tal meti in vore chescj criteris al è il pont debul.
Trê a son i aspiets li che bisugne pontâ e lavorâ par puartâ indenant chestis realtâts:
– conservazion: ven a stâi, inventaris, catalics, soluzions che a àn di jessi pensadis no dome par ûs interni, ma intune prospetive di timp lungje;
– ripropueste: progjets, programs, adesion a rêts, azions che a pontin a tornâ indaûr a la int il so patrimoni;
– ricercje: un museu al à di jessi centri di ricercje, al à di lâ indenant a disvilupâ e a fotografâ la realtât.
Un altri aspiet debul al inten la mancjance in chestis struturis di personâl formât e preparât di pueste che al direzi e al lavori. Al mancje un ricognossiment de specificitât e si tint invezit a meti sul stes plan ducj i museus, ma a ‘nd esistin di diviers gjenar e ognidun al à di jessi puartât indenant di personâl specializât par setôr. E, nancje a dîlu, chei etnografics a son la Cinisintule de situazion».
La Universitât dal Friûl e je nassude tant che imprest di svilup pal teritori tal rispiet ancje de realtât locâl; cuâl isal il rûl che cheste istituzion e à in chest setôr museâl specific?
«O sin daûr a fâ tant tal cjamp de formazion e dal inzornament. O vin contats cun plui di une realtât in regjon che nus domande colaborazion e nô o cirìn di metilis dentri te rêt etnografiche nazionâl. Magari cussì no, a son pôcs i Ents e lis Associazions gjestoris che nus domandin, e tai piçui museus si va ancjemò indenant cu la idee di favorî cognossincis personâls, cuant che invezit par fâ vivi chescj puescj a coventin figuris che a vedin studiât di pueste, che a proponin events e ativitâts, se no il risi al è che dut al mueri.»
La lenghe furlane e je pôc presinte tai nestris museus. Te realtât ladine o vin invezit viodût che e je presentade tant che element fondamentâl. Cemût sino chenti?
«O sin mâl su chest aspiet. La lenghe e je cjapade pôc in considerazion. E esist dute une pussibilitât di riconvertî la ricercje linguistiche (par esempli chê dai Atlants Linguistics) e fâle jentrâ tai museus; si varès di pensâ a progjets di ricostruzion dal aparât didascalic, di presentazion de storie de lenghe te vite di un popul. Il probleme al è ancje di caratar finanziari e la diference cu lis struturis de Val Badie e de Val di Fasse e je che li invezit si invistìs tant in cheste direzion e no si puedin nancje fâ confronts.»
In plui de lenghe, ce i mancjial ai nestris museus?
«Al è fondamentâl che chescj museus a vedin un pît te ricercje parcè che no si pues colâ dome tal ricuart dal «cemût che o jerin», ma si à di cjalâ ancje a cemût che lis societâts a son e a si trasformin, su cemût che si viodaran ca di 30-50 agns. I museus etnografics a àn di vê atenzion a la contemporaneitât e a àn di fâ un sfuarç a metisi in rêt par proponi e tornâ a proponisi cun simpri alc di gnûf e cun continuitât tal timp. Lis piçulis realtâts cence une volontât politiche serie tal rinfuarçâlis a laran a murî.»
E pal futûr?
«A Palaç Giacomelli a Udin al vignarà viert in maniere definitive, in curt, il Museu Etnografic che al è stât trasmudât di vie Viola e che si clamarà Museo Etnografico del Friuli, cu lis colezions «Gaetano Perusini – Lea D’Orlandi» e «Luigi e Andreina Ciceri». Mi auguri che clamantsi «dal Friûl», cheste denominazion e cjapi forme, parcè che nol baste dome il non par jessi spieli de situazion furlane globâl, ma o speri che e deventi une realtât gnove e centrâl, che e fâsi un pôc di coordenament rispiet a dutis chês sparniçadis tal teritori».
Elena Zanussi

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +