ATUALITÂT – In Cjargne: un turisim di nicje

La Cjargne, in dutis lis stagjons, e je une biele tiere di discuvierzi, al conte un operadôr turistic di Darte. Il turist al ven prin di dut par gjoldi de bielece naturâl dal teritori e po dopo ancje par cognossi la storie di chest popul. A son un grum di ativitâts che si puedin fâ: cjaminadis ae discuvierte des monts e dai ripârs presints sul teritori (di Invier si mudin in cjaminadis cu lis gjaspis), canyons sul Lumiei e su la Fore de Vinadie, lâ a cjaval. Par cui che invezit al vûl lâ un pôc plui insot te storie de Cjargne, si pues visitâ i tancj museus sparniçâts sul teritori, i edificis plens di storie (par esempli lis vecjis plêfs); si puedin zontâ lis varietâts gastronomichis di cheste tiere, che no son di pôc cont (persut di Sauris, biscots di Raviei, formadis, e v.i.). Cumò che e tache la stagjon invernâl, in Cjargne si vierzin lis pistis di schi e ancje achì e je “bocje ce vûstu” (schi di font, schi alpinistic, biathlon). E cui che nol sa schiâ al pues provâ a balinâ la nêf cu lis gjaspis, magari sot la lune plene, e par finî fâsi fâ un bon massaç intes termis… Insome, di ce che a ‘nd è nol mancje propit nuie!
Marta Vezzi