ATUALITÂT – Lenghe furlane, lenghe tecnologjiche

La Sale civiche dal Palaç comunâl di Cormons e à ospitât il 10n Congrès anuâl de Societât Sientifiche e Tecnologjiche Furlane, tignût ai 5 di Novembar stât.
Il simposi al è stât screât di bande dal president Marzi di Strassolt (foto 1), che al à volût ricuardâ in struc la storie e i obietîfs de Societât, ven a stai pandi l’ûs de lenghe furlane tes siencis e contribuî a la formazion dal lessic sientific furlan. Il professor al à ancje volût esprimi l’auspiç di cambiâ l’adietîf “furlane” tal non de societât metint un “di lenghe furlane”.
Il lustri che e gjolt la marilenghe traviers il sô implei tal setôr de ricjerce al è impuartant tant che la sô utilizazion te leterature, ma la necessitât di voltâ o inventâ gnûfs tiermins e à di jessi fate dome di chei che a cognossin la materie. La culture, la sensibilitât e la fonetiche furlane a son elements di tignî dongje in chest procès. Strassolt al à fât l’esempli de “Teorie dai grums”: non proponût di bande dal matematic (e sindic udinês) Furio Honsell, in lûc di “Teorie dai insiemits”; il concet di “grum” al rive plui svelt tal cjâf di un furlanofon che no chel di “insiemit”, che impen al sune di talianisim.
Ancje tal intervent seguitîf de diretore de riviste bilengâl (furlan/inglês) de Societât e dal C.I.R.F. prof. Piera Rizzolati (foto 2) si à volût marcâ la dificoltât che si cjate tal “passâ al scrit”, e che la associazion e cîr di favorî i autôrs che sielzin di scrivi par furlan.
Il prof. Attilio Celant (foto 3), docent di Gjeografie economiche e Preside de Facoltât di Economie, Universitât “La Sapienza” di Rome, al à tignût une lectio magistralis sul teme “Globalizazion, rêts e coesion teritoriâl. Il contribût de portualitât tal fâ sù un sisteme teritoriâl complès”. Une analisi su i cambiaments economics e i rapuarts di fuarce tal mont e su lis strategjiis pussibilis ancje te nestre aree.
I altris intervents de zornade a son stâts:
• Fulvio Stel, Dario Giaiotti (Arpa F-VJ, foto 4-5) – “Sino pronts par previodi ce aiar che o respirarin doman in Friûl?”;
• Francesco Marangon, Stefania Troiano (Universitât dal Friûl, foto 6) – “Payments for ecosystem services” a pro dal paisaç e dal ambient”;
• Valentina Cabbai (foto 7), Daniele Goi (Univ. Friûl) “Digjestion anaerobiche cumbinade dal pantan dal depuratôr cui refudons: pre-trataments par miorâ il procès”;
• Marianna Stella (Univ.Friûl, foto 8) – “La percezion dal fenomen imigratori intun studi demoscopic socio-teritoriâl. Il câs di Puçui”;
• Alessio Fornasin (Univ. Friûl, foto 9) – “La emigrazion interne in Friûl a fin Votcent”;
• Lorenzo Marcolini (ITI “A. Malignani”, Udin, foto 10) – “La esperience di CLIL in lenghe furlane intes scuelis superiôrs de provincie di Udin”.
Presint e content di vê la SSTeF in cjase Il sindic di Comons Luciano Patat (foto 11), al à volût ricuardâ tal so salût «Culì o sin simpri stâts furlans e in Friûl. La nestre e je une storie particolâr che e va difindude.» Daspò a àn partât i saluts de aministrazions regjonâl di bande dal assessôr a la istruzion Roberto Molinaro e dai conseis provinciâls gurizan e udinês di bande dal consilîr Luca Bigot e dal assessôr Enio Decorte; presint ancje il diretôr de Societât Filologjiche Furlane Feliciano Medeot.
Michele Calligaris