Sfuei Mensîl Furlan Indipendent
Archivi de Patrie

ATUALITÂT – Sostignibilitât ambientâl ancje pe nestre mont

............

Simpri plui dispès montanis e ploiadis a ruvinin paîs intîrs, e ce che al fâs plui rabie al è che dome in chestis ocasions si fevele di vê plui cure pal teritori e pal ambient.
O vin sintût il dotôr Carlo De Colle par capî cemût che e je la situazion cjargnele. De Colle al è un libar professionist dal 1992, daspò la lauree in Siencis Forestâls te Universitât di Padue. La sô formazion professionâl e cjape dentri diviers setôrs: selviculture e assestament, botaniche, gjestion e planificazion forestâl, inzegnerie naturalistiche, sistemazions idraulichis forestâls, ricualificazions ambientâls, studis di impat ambientâl e valutazions di incidence, stimis forestâls e fondiariis, e v.i. Al lavore insieme cun altris figuris professionâls (gjeolics, inzegnîrs…) par cjatâ lis soluzions tecnichis miôr, eficientis e di lungje durade.
Cuâi sono i ponts critics in Cjargne dulà che al tocjarès intervignî par evitâ disgraciis come chê di Gjenue?
Secont lis mês esperiencis, in Cjargne o crôt che al seti necessari ristabilî il concet di ‘sostignibilitât dal teritori’, rivalutant il leam tra lis risorsis ambientâls e il lavôr uman, tra popolazion e ambient. In chest contest, a cjapin impuartance primarie lis ativitâts di planificazion, di programazion e di atuazion dai intervents di recupar naturalistic, la sistemazion dai cors di aghe, il consolidament dai versants e des areis instabilis, la difese dal patrimoni boschîf, cun aplicazion prevalente de inzegnerie naturalistiche dulà che plantis, tiere, len e claps a deventin i materiâi principâi de costruzion. O zontarès ancje la necessitât di gjestî in maniere corete lis areis verdis ator dai paisuts di mont. Un recupar indispensabil che al va riviodût tant di bande dai privâts che dai Ents Locâi (cul jutori di finanziaments disponibii, tant che la L.R. 10/2010 art. 11), par risanâ e par recuperâ i terens pustots intai teritoris montans, cussì come che al proviôt il Decret dal President da Regjon (n. 259-27.10.11). E je la pussibilitât di aderî a progjets di plui grande scjale, finanziâts dai struments comunitaris in vore. Dut chest intal rispiet des areis plui sensibilis, catalogadis cun grât elevât di pericolositât par vie de pussibilitât di fûcs boschîfs, o sometudis a vincul idrogjeologjic.
A vuê, la atenzion e la cure dal teritori cjargnel sono suficientis/eficientis?
Seontri me, in Cjargne, ma ancje di altris bandis tal teritori montan, al è stât fat un grum di bande de Regjon, in particolâr midiant dai plans regjonâi di emergjence de Protezion Civîl. In pratiche, chescj plans a cjapin sù lis informazions ripuartadis intai plans comunâi di emergjence, planificant lis azions di prevenzion di atuâ ai diviers nivei, cuntune juste disponibilitât finanziarie. Dut chest al pues no jessi suficient, massime se si pense ae vastitât dai teritoris comunâi. Intun periodi caraterizât di risorsis scjarsis, al è impuartant – par supuartâ il lavôr des Stazions Forestâls e dai Ispetorâts compentents par teritori – il contribût che a podin dâ i Ents Locâi, lis associazions, i imprenditôrs, i sengui citadins, sburtâts di un sens civic e di une grande sensibilitât ambientâl. Il proprietari di fonts al à di vierzisi aes gnovis propuestis gjestionâls inovativis, al scuen condividi e informâsi, nol pues continuâ a pensâ al propri bosc tant che un soremobil di meti in maniere statiche su pe scrivanie, gjavant ogni tant il pulvin che si poie parsore. Al scuen, invezit, pensâ al so bosc tant che al zardin di cjase, di curâ, indulà che al interven in maniere periodiche, tignint cont sedi de capacitât di autoperpetuazion sedi dal valôr estetic e ricreatîf, di no cjapâ sot gjambe, soredut intai comuns montans indulà che si vîf di turisim.
Marta Vezzi

Int di Cjargne / Magjie a Cjarsovalas

Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +

L’Editoriâl / Cuant vignaraie la “adunade” dai furlans?

Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +

Festival di Poesie Alpine / Autôrs di Ladinie, Grisons e Friûl a confront

Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +