ATUALITÂT – Il pont sul «Diari»

Mauro Tosoni al è un che no si è mai tirât indaûr cuant che si è tratât di vierzi un gjornâl. Al è forsit il diretôr furlan che inte sô cariere al à fondât plui gjornâi, di chel «In uaite» che ducj si visin jessi stât une sentinele critiche su dut il periodi daspò dal taramot, par rivâ a «Il Friuli» e a «Il Nuovo Friuli» po deventât «Il Nuovo Fvg». Nol è di maraveâsi duncje se propit lui tal 2006 al à cjapade su une disfide di chês fintremai dificilis, ven a stâi inmaneâ un periodic di cronache dut par furlan che al deventàs un pont di riferiment pal public. E il sium si è realizât cul «Diari», un imprest di comunicazion sclet e svelt che al è nassût dal Autun 2006 daûr di un progjet de ARLeF ereditât dal Olf.
L’INIZI DAL DIARI_ Mauro Tosoni al è stât subit coinvolt e cussì l’esperiment al è podût partî tant che publicazion mensîl in gracie di un jutori regjonâl. Viodût il bon acet dal public, dal 2008 la publicazion e je  deventade cuindisinâl. A chel pont, «cun 12 mîl copiis tiradis e une distribuzion che e rivave in dutis e trê lis provinciis dal Friûl, e jere deventade concrete ancje la pussibilitât di scomençâ a jessi dutis lis setemanis», al conte Tosoni. Il progjet di un gjornâl che si tignive sù cun abonaments, edicule e publicitât atirade de distribuzion «free press» al jere sostenibil.
LA CRISI_ «Tal 2010 la convenzion cu la Regjon par rignuvî la publicazion e à previodût fonts dome fint a Lui» al spieghe Tosoni: «cumò o stin spietant che la ARLeF nus pandi lis sôs intenzions definitivis, ma dut câs la redazion e sta lant indevant finanziant di bessole la publicazion preseade dai letôrs». I numars lu confermin: ancje se il gjornâl al è sore nuie, a son plui di 600 i abonâts che lu ricevin paiant dome lis spesis di spedizion. E pes stessis resons il «Diari» si cjatilu ancje in edicule dulà che par une copie si pain dome 20 centesims che a restin al gjornalâr.
E CUMÒ?_ L’avignì de testade al è peât duncje aes risorsis: «o sperìn – al declare Tosoni – che la ARLeF nus vegni incuintri e e cjati fûr i bêçs che nus judaressin a puartâ ancjemò indevant cheste esperience. Si pues sielzi ancje di cambiâ formule, tornâ al mensîl o stampâ mancul copiis. Dut câs il patrimoni che si è metût dongje cun chest gjornâl al è pardabon grant e nol va dispierdût».
Tosoni al fevele dai «fantats» che a scrivin su lis pagjinis dal «Diari»: «o vin pe prime volte un grup di zovins che a scomencin a fâ i gjornaliscj propit scrivint par furlan». E stant che propit Tosoni tal 2000 si è cjapât la cjame di coordenâ pe Universitât dal Friûl il prin cors di formazion par gjornaliscj in marilenghe, si capìs che il «Diari» al vûl continuâ: «no son resons pratichis par che la ARLeF e vedi di sierâ un progjet di cualitât». E duncje e reste la cuistion di font: ise la volontât politiche par judâ chei che a lavorin cul furlan? «Fint tal 2010 no son stâts fastidis. Cumò o savìn che la cuvierte e je curte – al siere Tosoni – ma i tais a son une robe, scancelâ dal dut realtâts che a esistin di agns une altre».
Walter Tomada