ATUALITÂT – I zovins dai fogolârs: une risorse valorizade?

Sabide ai 31 di Lui e domenie il Prin di Avost si è tignût a Maian il setim incuintri inmaneât dal «Ente Friuli nel Mondo» che al à clamât dongje i Fogolârs furlans di ducj e cinc i continents. In ocasion de prime volte dal gnûf president Pietro Pittaro, il teme centrâl al è stât il leam jenfri i zovins e i Fogolârs tant che rapresentants dal Friûl ator pal mont. I furlans che in dì di vuê a decidin di partî cul computer in man e no plui cu la valîs di cjarton come che a àn fat i lôr nonos trop sintino il leam cu la tiere di dulà che a vegnin?
«Magari cussì no come l’an passât o vin vût dome pôcs minûts ae fin dal incuintri par podê fevelâ des ativitâts che o vin puartât indevant tal ultin an e par fevelâ des nestris necessitâts» al marche un dai zovins intervignûts ae cunvigne, Giacomo Trevisan dal Fogolâr di Shanghai. «I zovins a son e si stan dant da fâ: a Shanghai o vin inmaneât une vore di incuintris e di apontaments culturâi par fânus cognossi, come i concierts che e à tignût te ambassade taliane la flautiste furlane di nomee internazionâl Luisa Sello. In plui,» al zonte Trevisan «une nestre precise volontât, dut un cul gnûf president Mirko Bordiga e cul president onorari Marco Casula, e je stade chê di inmaneâ ativitâts cu lis sociis dai Julians tal mont par presentâ i nestris prodots tipics e lis nestris aziendis pandint une sorte di unitât regjonâl di lâ dai cjampanilisims: i cinês no podaressin capî une division interne tune regjon tant piçule come la nestre».
Giacomo al crôt te impuartance dai Fogolârs. «Si trate di vetrinis che a podin jessi une vore impuartantis par fâ cognossi il Friûl cu lis sos bielecis e i siei prodots. Al è clâr che e je une grande diference jenfri i Fogolârs plui vecjos e chei nassûts tai ultins agns: la etât medie dai socis dai Fogolârs come il nestri e je une vore plui basse di chei storics come chei de Argjentine e dal Canada. O resti dut câs otimist» al marche Giacomo «par vie che il neopresident Pittaro mi pâr une vore atent aes nestris esigjencis: o fasarìn un belanç tal prossin incuintri di ca a un an».
(Alessio Potocco)