La setime cunvigne di «Ente Friuli nel Mondo» intitulade «Zovins e furlanetât tal 2010» e je stade caraterizade di une discussion pluitost fuarte di bande propit dai zovins che a àn cjapade la peraule a la fin dai lavôrs.
Une des cuistions plui sintudis e je stade, come che al à dit il vicepresident dal Fogolâr furlan di Shanghai Giacomo Trevisan, la necessitât di «plui concretece e mancul proclamis» par chel che al inten lis iniziativis a pro des gnovis gjenerazions di dissendents furlans pal mont. Di fat, di plui bandis al è stât domandât di podê vê plui oportunitâts par podê inviâ cussì ancje un ricambi gjenerazionâl dentri di cheste associazion: Silvano Malano, za president dal Fogolâr Furlan di Munich al à marcât come che «al è 20 agns che o sint che si à voie di dâ spazi ai zovins ma o viôt simpri chês musis».
A son stadis ancje metudis in discussion lis modalitâts di davuelziment dai lavôrs de cunvigne che «e je stade masse lungje te part dai salûts istituzionâi e des relazions», gjavant cussì spazi a lis esperiencis diretis e ai intervents dai partecipants: «Lassait fevelâ i zovins» al à dit Marco Macorigh di Londre.
Une di chestis esposizions in program e je stade la presentazion dai risultâts dal scandai fat su Facebook di bande dal prof. Bruno Tellia: «I giovani e la Friulanità negli anni 2000». Des rispuestis cjapadis sù al risultave clâr che, par chei che a vevin rispuindût, l’element identitari plui fuart al jere il sintîsi plui furlan che no talian. Ma te interpretazion dal sociolic de Universitât dal Friûl (puars mai nô…), chescj dâts a son stâts lets e presentâts simpri come un element di tignî te sfere privade, cence però palesâlu masse, fasint intindi che al vedi «une scjarse impuartance e pocje convenience a nivel sociâl-economic» come che al à dit, magari sacrificantlu a pro di «une «macroidentitât» taliane».
Une leture nivelant e talianizant che si è palesade ancje cuntune grande mancjance, che plui di cualchidun al à viodût: scuasit ducj i intervents a son stâts par talian (fale chel di Christian Romanini che si è fermât propit su chest cantin, ndr), ancje se dopo, vie pal dibatiment, di plui bandis tal public e je stade marcade la necessitât di cognossi miôr il Friûl, mantignî e insegnâ la lenghe furlane, che lis gnovis gjenerazions di dissentents no àn rivât a imparâ in famee.
Une cunvigne duncje che e à fat fâ intindi clare la necessitât di un gambiament di rote, par evitâ che chescj moments di confront si esaurissin dome intune buinore di discussion, par dopo jessi dismenteâts fint al prossim an. Ma chest colp no je lade cussì: la proteste dai zovins e je vignude fûr cun fuarce. La bale e torne a la dirigjence di EFnM che cumò i tocje di dâ un segnâl concret.
REDAZION
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +