Sfuei Mensîl Furlan Indipendent
Archivi de Patrie

ATUALITÂT – Friûl, passe 60 agns di ilusions e delusions

............

width="300"
Tiziano Tessitori al fâs un discors pe autonomie, Udin 1963 (foto par concession de fie Luisa).

Mi vegnin i sgrisui, ma il gno prin articul sul dirit dai furlans di aministrâsi «di bessôi» par chel che ju rivuarde, al è comparît tal cuotidian di Udin ai 2 di Dicembar dal 1945. Juste 65 agns indaûr! L’articul al à plasût a Tizian Tessitori, tant che o vin preât pre Bepo Marchet di voltâlu par furlan par publicâlu ancje chel. Ma scomencìn dal principi.
PRIMIS AZIONS DI TESSITORI_ Il prin intervent a pro de autonomie furlane lu veve fat ai 20 di Jugn propit Tessitori, te sede de Filologjiche, in place Venerio a Udin. Pôc dopo, al è passât ai fats. Ai 29 di Lui, li de «Buine vît» in borc di Trep, al fondà la Associazion pe Autonomie Furlane, in presince di 52 aderents. Tessitori (che al jere stât elet deputât dal Partît Popolâr di don Luigi Sturzo tal 1921, par altri cence jessi confermât, par vie de etât masse zovine, vâl a dî 26 agns), al scomençà un lavôr di propagande une vore inteligjente, cuntune atenzion speciâl pai esponents plui in viste de «inteligjence» locâl, culturâl, politiche e aministrative. Ma soredut, dopo che al jere deventât deputât de Democrazie Cristiane ae Assemblee Costituente (Jugn dal 1946), al fasè pression sul partît e sui siei coleghis, parcè che, jessint daûr a nassi la riforme regjonâl in Italie, il Friûl al fos ricognossût tant che une des regjons storichis. Intant, pre Bepo al veve mandât fûr, tal Fevrâr di chel istès an, la «Patrie dal Friûl»: un periodic autonomistic integrâl, scrit dut in marilenghe e cuasi dut de sô man. Tessitori al veve ancje publicât un opuscul, »Perché il Friuli è Regione», fat cognossi cun largjece tai ambients che a contavin, massime a Rome. Mi dismenteavi di ricuardâ che ducj i partîts udinês, fale chel democristian e chel republican (i liberâi a jerin dividûts), a mostrarin subit la lôr contrarietât in mert ae autonomie. Centraliscj par nature, a metevin dut il lôr impegn par meti in dificoltât il partît catolic, che si presentave come il plui fuart di ducj (la gjelosie si mostrà cussì rabiose, di meti intun cjanton dal cuotidian udinês, in ritart e in dôs riis, la notizie de costituzion de Associazion pe Autonomie).
I ZOVINS A SBURTIN_ Anìn indevant. La D.C. e organizà un grant incuintri ai 17 di Otubar, par confermâ la sô vocazion regjonalistiche, vint cure di cuietâ i nazionaliscj di ogni fate che la unitât de Italie no jere in discussion. La idee di un Friûl furlan e interessà une vore di zovins (si ere ducj zovins, in chê volte). A un ciert moment, nus pareve che la robe e les indevant masse adasi, e che a coventassin iniziativis plui fuartis: insume, dâ vite a une propagande energjiche sul teritori, e fâsi sintî di plui. Tra l’altri, a Rome e veve scomençât i siei lavôrs la Comission pe riforme autonomistiche: pa la cuâl, bisugnave bati il tambûr in dutis lis manieris, sedi a cjase nestre che te citât eterne. Come cu sedi, e cu la intenzion di dâ un sburt ancje ae Associazion, o vin dade vite ai 19 di Zenâr dal 1947 al Moviment Popolâr Furlan pe Autonomie Regjonâl, cuntun grant comizi al «Puccini» di Udin. Tra i prins che mi vevin dite di sì a jerin Chino Ermacora, Pier Paolo Pasolini e Luigi Ciceri. Si podè lei sul «Gazetin» tal doman: «Îr a Udin si è concretizade, pe prime volte dopo la Liberazion, une unitât complete di animis al di fûr dai partîts, tal non de Piçule Patrie».

MOVIMENT POPOLÂR FURLAN_
Cussì o scomençarin (ma subit a scomençarin ancje lis polemichis) la nestre bataie ideâl, rivant pardut là che al jere pussibil. O lerin a tignî comizis in vincj paîs dal Friûl (ancje a Puart, a Malborghet, a Gurize); o puartarin la nestre vôs a Vignesie in dôs cunvignis organizadis de Union des Provinciis Venetis, Union contrarie al Friûl (a fevelarin Tessitori, Mario Livi president de Provincie di Udin, Gaetano Pietra president de Cjamare di Cumierç, Agostino Candolini e jo, cuntune relazion stampade subit dopo tai ats). Cincuantetrê sezions dal Moviment a nasserin in dut il Friûl, di Aquilee a Cormons, di Pordenon a Pontebe, di Manià a Gurize, di Sapade a Cividât. Altris sezions a nasserin vie pal mont. O tignirin ancje conversazions culturâls a Udin, cun Pasolini, Lelo Cjanton, Giuseppe Francescato, Valentino Miniscalco, Etelredo Pascolo e altris. Cu lis financis si jere simpri a sut: si salvarin cul jutori di cualchi brâf amì e sgarfant tes nestris sachetis.

ADESIONS E ISTANCIS DAL MPF_
O publicarin un opuscul, «La Regione Friulana». O lerin a Rome par fevelâ cun parlamentârs e soredut cun Sturzo. O fondarin la Federazion des Ints Alpinis cun trentins, sudtirolês, valdostans, a Desenzan. O lerin a Aoste par un grant incuintri dai autonomiscj de Alte Italie. O derin vite a un Comitât di onôr dal M.P.F., cu la adesion di personalitâts tant che il za nomenât Pietra, Luciano Fantoni, Pier Silverio Leicht, Biagio Marin, Ivan Trinko, Michele Gortani, Giacomo Centazzo.
Dopo vê scombatût cu la RAI in pro di une Radio Friûl, restade purtrop tai nestri siums, o rivarin adore a sistemâ, sul Cjistiel di Udin prime, e in vie Pradaman dopo, une stazion, leade cu la rêt nazionâl. Il concors pai mestris di scuele, la oportunitât di vierzi une Sezion de Cort di Apel a Udin, la necessitât di une universitât dal Friûl, la organizazion dal nestri sport (sotan mo di Vignesie, mo di Triest), la plaie de disocupazion e chê de emigrazion cu la zonte des servitûts militârs, a forin altris problemis che nus vioderin ocupâts i primissims agns. In ocasion des elezions politichis dal Avrîl dal 1948, o domandarin ai partîts i nons dai candidâts pardabon regjonaliscj, e cussì o invidarin la int – cun comunicâts tai gjornâi e cun manifescj bilengâi – a dâ a chei la preference. Stant che la stampe locâl e jere in man a agraris e industriâi forojulians, conservadôrs dai lôr interès e contraris ai nestris, o cjatarin largje ospitalitât te «Patrie», dulà che a un ciert moment o publicarin in ogni numar un insert dal Moviment.

ELEZIONS DAL 1948_
Ce si domandavial a Rome? «La plui largje autonomie aministrative te unitât taliane», come che si diseve tal prin manifest dal Zenâr dal 1947. E po dopo, cuant che a scomençavin a cjapâ pît i nostalgjics (parfin tai partîts che si disevin regjonaliscj), o baterin i pugns disint che al Friûl bisugnave ricognossi la autonomie, ancje se chês altris regjons a varessin vût di restâ a bocje sute. E cuant che ai 30 di Jugn di chel an la Costituent e votà la riforme, stabilint cinc regjons speciâls dongje chês altri normâls, il M.P.F. al cjantà vitorie. Ilusion. Il Friûl al veve sì un so ricognossiment, ma insieme cu la Vignesie Julie (che no esisteve plui), anzit cun Triest, che par altri al jere ancjemò sot aministrazion dal Guvier Militâr Aleât. Tirant sù lis maniis, o spessearin a meti dongje un progjet di «Statût furlan», stampât tal Novembar: autôrs Marchet, Pascolo e D’Aronco, cui conseis di Leicht. Ma un statût speciâl al jere destinât a fâ un grum di anticjamare fûr de Cjamare, jessint che tal Otubar la Costituente e stabilì, sot la pression dai reazionaris, che «pal moment» la nestre Regjon speciâl e varès vût un tratament normâl, insieme cun dutis chês altris regjons. Potence di Rome! «Campa cavallo», o pûr «la storie di siôr Intento»: chês altris regjons a saressin nassudis a pene tal 1970, e la nestre, ma a sun di vitis, tal 1964.

LA NASSITE DE REGJON_
Delusion tremende de bande dai autonomiscj. Par dîle sclete, noaltris si veve acetât la convivence cun Triest, persuadûts che la nestre regjon e veve di nassi tal Zenâr dal 1948 insieme cun chês altris speciâls (Trentin-Sudtirôl, Val di Aoste, Sardegne, Sicilie): intant cence Triest, capitâl Udin, e po dopo si varès viodût. Un nestri ricors ae Costituent, par che un statût speciâl al fos aprovât insieme cun chei altris cuatri, fale metilu in vore a pene pussibil, al restà cence rispueste.
Ma nol jere dut pierdût. Cuant che finalmentri e nassè la nestre regjon, vâl a dî tal 1964, i dirits dal Friûl a varessin podût salvâju. Il M.P.F. si jere sfantât za di timp, e i politics nostrans si lassarin scjafoiâ di Triest e di Rome. Si podeve stabilî cul statût che la capitâl e fos in alternance doi agns a Udin e doi a Triest (viôt Trent e Bolzan), o che il Consei al ves sede intune des dôs citâts e la Zonte in chê altre, o che a nassessin dôs «sotregjons». Nuie di nuie: dut al fo concentrât te citât italianissime, logade te estreme perifarie, su la puarte de Balcanie. E la plui part de regjon, vâl a dî il Friûl, tratât come «contee»: par misericordie nus àn dâts doi assessorâts che a Triest no ur interessavin. In Senât Tessitori, che al voleve fin tal ultin dâ une sistemazion particolâr a Triest pûr tal ambit de regjon, no podint votâ cuintri dal statût prefabricât di chei che a savevin mignestrâ, si astignì.

UN CONSEI PE LETURE_
Cui che al vûl cognossi la storie con ducj i particolârs minûts e i documents, nol à che di vierzi i libri «Friuli regione mai nata», che mi à publicât tal 1983 Marc De Agostini dal Moviment Friûl. Dacuardi: la cession de nestre primogjeniture «par un plat di lints» e je robe dal passât. In chê volte, cirint di cuietânus, nus diserin che tant a Triest, tal Consei Regjonâl, i furlans a saressin stâts in maiorance, e che i triestins a varessin vût dut l’interès a contentânus. Argoment par basoâi. Si à viodût tai agns dopo, e ancje in dì di vuê, che in gjenarâl masse furlans, passât il Timâf, a deventin triestins. Doi esemplis di ridi o di vaî: il vin furlan nol pues clamâsi Furlan, e il miluçs de nestre tiere si clamin Julia. Riverît siôr paron!
Gianfranco D’Aronco

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +