MEDITANTLIS TAL SO CÛR. Dôs stradis difarentis

Si lei inte Gjenesi che Abram, nestri pari te fede, i disè a so fradi Lot: «No vin di cavilâ jo e te e nancje i miei pastôrs cui tiei, che nô o sin fradis! No âstu devant di te dute la tiere? Dividìnsi. Se tu tu vâs a çampe, jo o larai a drete; se tu impen tu vûs lâ a drete, jo o tignarai la çampe». (Gjen. 13,8)
Mi soi impensât di chestis peraulis rifletint su lis ultimis vicendis che a àn sporcjât la glesie catoliche, soredut in chescj agns e mês de tragjedie de pedofilie.
Al è un ben che si sedin palesâts pecjât e justizie; intant però la int simpri plui e comente: «La gjerarchie e varès vût di dâ un segnâl di gambiament al interni de struture; e invezit no si è comote tun fregul di conversion».
Di fat, il Pape al domande perdon, ma nol volte pagjine; la istituzion si inciprie di celebrazions spetacolârs e di turisims religjôs, ma il vecjo stamp al reste. La tradizion catoliche e je autoreferenziâl: e preferìs pierdi la int pluitost che pierdi la inmagjine che si è fate di se. Mi diseve un predi: «La barache e fâs finte di gambiâ, ma no gambie».
Ancje par chest lis glesiis si svuedin e chel «Dividìnsi» fra Abram e Lot al devente une vore atuâl: il piçul dal Vanzeli e la gjerarchie no si incuintrin gran e a cjaminin su stradis e spirtualitâts difarentis. La fede di Abram no rive a lâ dacuardi cui interès di Lot.
La int e je stufe di un magjisteri che al cjacare saldo e si presente infalibil su dut;
no rive a capî un autoritarîsim che al vûl imponi la proprie veretât, cence pêl di rispiet pes ideis e culturis difarentis; e viôt inte glesie regulis e rîts che no i tocjin il cûr; e cjate che a son plui considerâts i discors dai teolics che la fede dai tribulâts.
Rome si presente pompose, clericâl e trionfant, impastanade cui grancj de politiche e de finance intant che milions di personis a scuegnin fâ i conts e strenzi la cinturie ogni dì.
In diocesi o sin cence un plan pastorâl ben definît; al è, pal moment, un comedâ rapeçant; i paîs a son cence Messe intant che il celibât dal predi al reste plui impuartant dal sacrament de Eucaristie.
Continuant la leture de Bibie si cjate che Lot, daspò dividût di Abram, al plombà in grancj malans ma Abram al corè a judâlu e a salvâlu.
Fra lis dôs stradis, jo o sielç chê di Abram, de fede che o olmi tal cûr de mê int.
pre Tonin Cjapielâr