ART TAL TAC. Un viaç e une sperance par ducj i fruts e pes gjenerazions di doman

Silvia Michelotti e publiche “Per il mondo che verrà”
“Per il mondo che verrà” al è il titul dal prin disc dal dut par talian de artiste Silvia Michelotti. La cjantautore di Pagnà e à realizât un diari di viaç, une sorprese, un libri di vierzi, tocjâ, cjalâ, lei, tornâ a lei e cjantâ cun jê.
◆ Chest lavôr musicâl al nas dal desideri di fa un regâl speciâl ai siei fîs, parcè che tai moments plui dificii de vite di Silvia, i siei fîs i àn dade la cjarie e il coraç par lâ di là di ogni dificoltât. Le àn judade a cjatâ la sperance e a lâ indenant cjalant bande il doman. Ogni cjançon e je une sfumadure de vite e dai moments passâts insiemi, une declinazion melodiche di amôr.
◆ “La tua casa ti aspetta alla fine del mondo, come ti aspetto io alla fine del giorno…”: Silvia e dediche il disc ai siei fruts e aes gjenerazions dal doman. «Dut te vite al passe e al pues disfâsi, ma dome une robe e reste par simpri: l’amôr. L’amôr al è il bagai spirituâl che o podìn dâ ai nestris fîs, sperant che lu puartin simpri daûr cun se.»
◆ La artiste e met dongje l’album costruint un percors sonôr e poetic, in dîs tocs un diviers di chel altri: Aurora, Casa mia, Ninna nanna, Immenso, Ave Maria, Pulcini, Angelo, Il pifferaio magico, Non andartene mai e – in fin – Per il mondo che verrà.
◆ In plui de sô vôs graciose e de sô ghitare, par realizâ l’album le àn judade Lucia Zazzaro ae viole, Francesco Marzona ae ghitare, Filippo Orefice al clarinet, Max Ravanello al trombon, Marco D’Orlando ae batarie e Carlo Feruglio al piano.
◆ “No volevi che lis peraulis si pierdessin tal nuie, tal spazi infinît de rêt.
O ai cirût une cjase par lôr…”, e par chest il so album di poesie e musiche al è contignût intune custodie speciâl, che la grafiche e je stade realizade di Carin Marzaro.
◆ Chest an Silvia no à pierdût timp e e à ancje publicât su Spotify l’album “Il Princip content e altris contis”, ultime opare in marilenghe, che e met in musiche lis flabis di Oscar Wilde. I cinc tocs (Il gjigant egoist, Hans, Il raç reâl e Il rusignûl e la rose) si puedin scoltâ, comprâ ancje in rêt e fa scoltâ ai plui piçui.
◆ “Per il mondo che verrà” al è stât presentât al public ai 18 di Jugn te rassegne di teatri, musiche e danzis “Palchi nei parchi”, tal Parc Rizzani di Pagnà, e no viodìn la ore di scoltâ la vôs e la musiche di Silvia in tantis altris ocasions.
◆ Par savê dulà cjatâle e dulà comprâ l’album, stait daûr su la sô pagjine Facebook: @SilviaMichelotti
I videos dai singui “Ninna nanna” e “Pulcini”, ma ancje il live de presentazion dal album complet si puedin viodi su la pagjine Youtube de artiste. ❚