Architeturis di tiere in Friûl Tipologjiis, tecnologjiis e materiâi: 20 agns di ricercjis

Ae fin di Avrîl al è stât presentât intal Palaç de Provincie di Udin il libri Architetture In Terra Del Friuli – Tipologie tecnologiche materiali: 20 anni di ricerche. Stampât par cont de Mimesis di Milan, al è stât realizât midiant dal finanziament dal President de Provincie di Udin e al met dongje lis ricercjis dai ultins agns su cjasis costruidis cu la tiere crude, te provincie di Udin e Pordenon, de planure ae mont.
«Ancje in Friûl – al scrîf il president de Provincie Pieri Fontanin inte presentazion dal libri – tiere di grancj costrutôrs che a àn espuartât la lôr art intal mont diferenziantsi par competence e risultâts, e je stade sperimentade la tecniche di costruzion de tiere crude che si fevele in chest volum cuntun servizi complet. Un studi (…) che al mostre un aspiet de storie de edilizie furlane forsit inmò pôc cognossût di bande de opinion publiche (…)  E, cun sorprese, no cate lis sdrumariis dal taramot dal 1976, a ‘nd è inmò diviersis, origjinâls e colegadis al contest par chel che al inten forme e composizion, come che a disin i esperts. (…) Une peculiaritât des costruzions in tiere crude e je che a son dal dut “locâls” stant che la materie prime e ven di dongje cjase. Une abitazion di cheste fate e je, duncje, espression assolude dal teritori dulintor, lu rapresente tal profont, tai contignûts oltri che te architeture.»
Pôcs a san che ancje ca di nô si costruive e si costruìs in tiere crude, ven a stâi no cuete inte fornâs, fin inmò de preistorie, sedi in campagne che in citât, come che si pues viodi intes cjasis di Udin e di Cividât.
La tiere impastade dome cu la aghe, normalmentri si clame “pantan”, al è il materiâl di costruzion plui vieri e plui doprât; no lu doprin dome i umign ma ancje tancj nemâi. E je doprade in ogni part dal mont e in dutis lis regjons talianis; e je semplice, economiche e e rapresente une vere “decressite” ante litteram.
«Al è dal rapuart tra tiere e cjase, duncje, che e nas e che si svilupe la ricercje che i doi curadôrs nus proponin, une ricercje che e va a scandaiâ, di prospetivis diviersis, lis tecnichis costrutivis che a doprin propit cheste materie, cussì comun e naturâl, par rivâ al tesaur plui impuartant, ideâl ma no dome, de nestre int.» Cussì al scrîf Federico Vicario, president de Societât Filologjiche Furlane, inte presentazion dal libri.
A dispiet dal taramot dal 1976, chest patrimoni si è mantignût e no dome in planure e al mâr. Purtrop, tancj plui dams e à fat la frenesie di ristruturâ la cjase par fâle plui moderne, cence rindisi cont però dal sô vêr valôr storic.
Il libri al è stât curât di Zorç Ganis (Architet) e di Zuan Carli Fiappo (Ispetôr Onorari de  Sorintendence Archeologjiche) e si divît in dôs parts. La prime, cun articui che a descrivin lis problematichis de “tiere crude” tal Friûl (te sô preistorie e storie) e tal mont; la seconde e racuei plui di cuarante schedis des cjasis analizadis, dividudis in trê grups: Edificis Video (5 schedis) studiâts a fonts e spiegâts ancje intal DVD; Altris Edificis (24 schedis) studiâts plui in curt e lis Testemoneancis (17 schedis) cu la sole testemoneance orâl (regjistradis di Z. C. Fiappo), viodude la mancjance di cualsisedi  document.
Cul libri al è dongje un DVD di une ore cun intervistis, intai lengaçs locâi, ai protagoniscj des cinc localitâts nomenadis intal libri: Tiezzo (PN), Lumignà (UD), Savorgnan de Tor (UD), Topolò (UD) e Val Resie (UD). ❚
✒ Redazion/Giorgio Ganis/Enzo Fabello