Sfuei Mensîl Furlan Indipendent
Archivi de Patrie

Friûlpoint, la maiute par furlan dal 1999. Un prodot moderni cun lidrîs ben plantadis te tradizion

............


Maiute furlane di autôr.
Friûlpoint al à sposade la filosofie de maiute di autôr furlane intal 1999, aromai passe 15 agns fa. «O pensavin a un alc di origjinâl par pandi la marilenghe, che al fos al pas cui timps, che al plasès ai zovins e che al fos curât tal messaç. Une maiute tant che imprest di divulgazion dal furlan, in mût no invasîf», nus spieghe il titolâr, Michele Venier. «De maiute semplice cuntune scrite simpatiche, la cualitât de nestre propueste si è simpri di plui alçade, an dopo an, e la linie e je deventade plui fashion, slargjant e insiorantsi des maiutis par feminis, lis felpis, chês par fruts e i grumâi.»

Lis bustutis di sucar «Cemût sêstu vuê» a vegnin di une maiute de Friûlpoint
Lis bustutis di sucar «Cemût sêstu vuê» a vegnin di une maiute de Friûlpoint

Par esempli, la gnove linie di bavarins par fruts cun parsore un dissen e lis peraulis di nainis tipichis furlanis. Te confezion al è dentri un librut li che e je la naine complete e la sô spiegazion «No dome une robe simpatiche, ma cuntune dople leture: chê di preservâ e di promovi lis nestris tradizions des nainis» al dîs Michele «Cun chê di un prodot siôr dal pont di viste de grafiche, o volìn sburtâ la atenzion su la impuartance de marilenghe fin di piçui».
Il lavôr par rinovâ la colezion di maiutis Friûlpont al scomence prime de Vierte, tant che un atelier. Si srarìs e si zonte. Si cambie e si rinove. «A son miârs di t-shirts stampadis ogni an. E cuant che, prime de Vierte, o cjolìn in man la linie passade o vin dute une programazion di seguî e di controlâ, di mût che nissun “toc” al ledi fûr produzion e al vedi i numars juscj. Po dopo, cuant che une robe e je ben fate, si fâs publicitât di bessole», al dîs il titolâr.
La plui vendude. Podevino no domandâ cuale che e je la maiute plui sielzude e plui comprade? A ‘nd è une, jenfri lis t-shirt, che e va a butinton. Lu san ancje i corvats che Make frico not war e je la bandiere di Friûlpoint. Il toc che mai al tramontarà. Ma si difint ben ancje Cemût sêstu vuê?, po dopo finide ancje su lis bustutis dal zucar. Di resint, e à un biel sucès ancje la Tabele periodiche dai furlans, chê de chimiche che e à sostituît ducj i elements cui simbui dal mangjâ e dal bevi furlan. Bulo! e je une altre che e plâs ,fate cuntune grafiche di tindince, e pes feminis Superninine no varès di mancjâ intai “armârs a cabine” di une furlane doc! E no smenteìn la storie dal Udin di balon cun le Zico o Austria. Cincuante, invezit, a son i sogjets a catalic.
La rêt di vendite e une gnove propueste. Friûlpoint e sparnice i siei prodots in 50 negozis, in dutis e trê lis provinciis furlanis. «Un numar che o volin incressi, par jessi ancjemò plui presints sul teritori», nus dîs Venier. Ma felpis e maiutis si puedin viodi e comprâ ancje dal sît uficiâl www.friulpoint.it (culì si cjatin ancje dutis lis informazions e altris si puedin domandâ mandant une mail). Il sît al è atîf dal 2004. Come che si diseve, di pôc a Sante Marie al à viert il gnûf laboratori-vetrine (par “talian” si dîs showroom): un pont di Friûlpoint dulà che la marcjanzie si pues viodi e controlâ, un lûc che al sarà magazen e laboratori. «Sensibilitât artistiche, marilenghe e un progjet estetic su misure a saran i ingredients dal nestri secont filon di business. O podìn creâ a richieste gadgets, maiutis e felpis dedicadis, leadis a un specific event, sagris, manifestazions o par une dite. Atenzion: no stampâ dissens che nus puartin, ma – daûr de nestre esperience tal cjamp – creâ une robe fate di pueste, lavorant insiemi al client di mût di produsi une maie buine no dome di fâi publicitât, ma che un al comprarà parcè che e je biele. Duncje comprade par metile intor simpri, no dome par judâ la sagre e doprâle dopo dome par lâ a durmî (Venier al rît ndr). Insume: une vere e proprie maiute Friûlpoint fashion, buine di stâ a pâr cu chês altris, ma fate par te client. Une linie di pueste che si zonte a chê tradizionâl di produzion leade al catalic».
Dopo Make Frico e dut il rest si continuaran a cjatâ li che lis vin simpri cjatadis, ai bancuts di FriuliDoc, par esempli. Come cuant che dut al è scomençât. ❚
✒ Oscar Puntel

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +